كتبت دينا بدر

لو بتهتم بالأبراج، تبقى أكيد عارف انها ممكن تساعدنا نكتشف السمات الأساسية لشخصية كل واحد فينا وتعرفنا أكتر على طباعه وصفاته وعيوبه وهواياته المفضلة وحتى مفاتيح علاقته بشريك حياته، واللي من خلالها نقدر نوصل للأسباب اللي ممكن تخليه يقرر انه ينهي العلاقة فوراً وميكملش فيها مهما كان مقدار الحب اللي بيحمله قلبه للطرف التاني، وهو ده موضوع مقال انهاردة.

برج الحمل .. لو حاولت تحبطه

الحمل شخصية طموحة، بتسعى دايماً لتحقيق اهدافها مهما كانت صعبة، وعشان كدة لو حس إنك وجودك في حياته بيحبطه ومش بيساعده يحقق احلامه، هتلاقي همه الوحيد هو إنه يتخلص منك ويخرجك برة حياته عشان يقدر يكمل في الطريق اللي راسمه لنفسه.

برج الثور .. لو حس انك متسرع ومش صبور

مواليد برج الثور مش بيحبوا التسرع، وخصوصاً في العلاقات، وده بيخليهم يحتاجوا يأخدوا وقتهم في التعرف على الطرف التاني كويس قبل ما يخادوا أي خطوة تجاهه أو يبقى فيه أي “commitment” بينهم، فانت لو مديتهمش فرصتهم واستعجلت في طبلك بإن العلاقة تاخد شكل محدد ومعروف، ممكن جداً يقرروا ينهوها من قبل ما تبدأ اصلا.

برج الجوزاء .. لو حس ان علاقتكوا بقت مملة

شخصية الجوزاء معروف عنها انها بتزهق بسرعة وبتحب التغيير طول الوقت، وعشان كدة لو حسوا انهم في علاقة مملة وروتينية ومفهاش أي جديد هينهوها فوراً وبدون أس مقدمات، وعشان كدة هنصحكم نصيحة، لو كان حد فيكوا مرتبط بشخص من مواليد برج الجوزاء لازم يبقى دايماً متجدد وميخافش ابداً من  تجربة حاجات جديدة طول الوقت لإن ده هيقوي العلاقة بينكوا..

برج السرطان .. لو مش بتعرف تحتويه

مواليد برج السرطان شخصيات حساسة جداً وبتخاف على مشاعرها من إنها تتجرح سواء بقصد منك أو من غير قصد، وده بيخليهم يحتاجوا دعم مستمر لمشاعرهم من الطرف التاني، ولو ملاقوش الدعم ده مش هيترددوا في انهم ياخدوا القرار بالانفصال لإنهم ويكملوا لوحدهم، لإنك بالنسبالهم في الحالتين مش موجود.

برج الأسد .. لو محسستوش باهميته

على الرغم من انهم شخصيات قوية ومستقلة، إلا ان مواليد برج الأسد بيحتاجوا دعم قوي من شريك حياتهم يساعدهم على تقوية ثقتهم بنفسهم واحساسهم بذاتهم، وللاسف لو ملاقوش الدعم ده بينتهزوا أول فرصة للانفصال من غير حتى ما يحاولوا يفسروا أو يشرحوا السبب اللي خلاهم ياخدوا قرار زي ده.

برج العذراء .. لو مش بتهتم بيه وبأفكاره

لو مهتمتش بأفكار وأراء ومشاعر مواليد برج العذراء تبقى كتبت بايدك كلمة النهاية، لإنه في الجزئية دي بالذات معندوش تفاهم، يا اما تديله فرصة يتكلم ويعبر عن رأيه ووجهة نظره في الأمور حتى لو كانت متناقضة مع أرائك وأفكارك، يا اما هيخرجك من حياته دون رجعة!

برج الميزان .. لو حس انك بتستغله

مواليد برج الميزان شخصيات اجتماعية جداً، بتحب كل الناس وبتهتم بمشاعرهم وبتكون دايماً حريصة على تساعدهم وتقف جنبهم لو احتاجوا أي مساعدة، لكن للاسف بمجرد ما يحسوا انك بتستغلهم أو بتستغل طيبتهم، مش هيترردوا في انهم يقطعوا علاقتهم بيك، اوعى تستهون ابدا بذكائهم لإنهم لو قلبوا عليك هتلاقي شخصية تانية تماماً عمرك ما كنت تتخيلها.

برج العقرب .. لو خدعه أو كدبت عليه

اول واهم الأسباب اللي ممكن تخلي العقرب ينهي علاقته بيك هي “خيانة الثقة”، وده لإنهم شخصيات مخلصة جدا وبالتالي بتسنى من شريك حياتها ان يبادلها نفس المقدار من الثقة والاخلاص ويحسسها بالأمان والراحة وعشان كدة لازم تعرف ان كدبة واحدة ممكن تكون بالنسبالك صغيرة جداً كفيلة تخليه يخرجك من حياته لإنه بيعتبرها خيانة لثقته فيك.

برج القوس .. لو قيدت حريته

مواليد برج القوس بقى شخصيات بتحب الحرية وبتكره أصلا فكرة الارتباط لإنه بالنسبالها مصدر تقييد، وعشان اهم سبب ممكن يخليهم يقرروا الانفاصال هو انك تحاول السيطرة عليهم أو تقييد حريتهم او تحسسهم انهم محتاجين طول الوقت يبرروا تصرفاتهم أو يشرحوا أسبابها.

برج الجدي .. لو مدعمتش افكاره وطموحاته

الجدي من أكتر الشخصيات الطموحة والعملية اللي لما بتحط هدف قدامها لازم توصله مهما كانت التحديات والصعوبات اللي بتواجهها، وعشان كدة بيتنوا من شريك حياتهم الدعم المستمر لطموحاتهم، ولو ملاقوش الدعم ده بينسحبوا فوراً وبينهوا العلاقة باكملها عشان يقدروا يكملوا في طريقهم من غير ما حد يعطلهم أو يعيقهم عن إنجاز المهام المطلوبة.

برج الدلو .. لو حاولت تغيره

مواليد برج الدلو بيحتاجوا شريك متسامح، منفتح، وقادر انه يحبهم زي ما هما من غير ما يطلب منهم أي تغيير لطباعهم أو شخصيتهم أو طريقة حياتهم اللي اتعودوا عليها، وعشان كدة لو ملاقاش فيك الصفات دي هيبقى بعده عنك وإنهاء علاقتوا بيك أسهل بكتير من الحرب والصراعات اللي هيعيشها معاك.

برج الحوت .. لو مدعمتوش عاطفياً

مواليد برج الحوت شخصيات حساسة وعاطفية، مشاعرهم بتأثر جداً عليهم وعلى قراراتهم، وعشان كدة بيحتاجوا شريك يعرف ازاي يعاملهم ويكون لطيف معاهم ويدعم مشاعرهم طول الوقت، ولو مقدرتش تقدملهم الدعم العاطفي اللي محتاجينه، هتلاقيه شخص تاني تماماً غير اللي عرفته واتعودت عليه، وساعتها هتضطر انت تسيبه ومش هتستنى لحد ما هو اللي يسيبك.