لما بنت بتقرر انها تستقل عن أهلها تماما وتعيش لوحدها، ولأننا دولة عالم تالت، مابيكونش علشان هي بقت ناضجة او قادرة تعيش لوحدها او علشان الاستقلال في حد ذاته. دايما بيكون فيه قصة مأساوية وراها الاهل او شخص منهم. بنات كتير بتكون فاكرة إن الاستقلال عن الاهل هينهي صراعهم العظيم لكن ميعرفوش انه بعد مشاكلهم مع اهلهم بتوصل لنهاية، الصراع بيتحول لنوع تاني مختلف تماما!

 هيتعرض عليكي كتير يكون ليكي مستقبل وظيفي عظيم في الدعارة
لإن المصريين لحد دلوقتي مش عارفين يعرفوا مصطلح ‘الحرية’، فكرة إن بنت تكون عايشة لوحدها ومسؤولة عن حياتها وقرارتها مسؤولية كاملة بتخلي أول فكرة تيجي في دماغهم لما يسمعوا عن بنت عايشة لوحدها انها عايز تشتغل رقاصة شرقية وتعرف 17 راجل في نفس الوقت. علشان كده ومن غير مجهود هيتعرض عليكي كبنت مستقلة عقود عمل في اماكن مشبوهة لإنك اتصنفتي عاهرة خلاص في عيونهم. والعروض هتجيلك من كل الاشخاص اللي ممكن تتوقعيهم او لا

لو قررتي تتجوزي، هتكوني لوحدك يوم فرحك 
مش هيكون فيه والدتك معاكي في الاوضة بتتأكد إن شعرك والفستان مظبوطين. المشهد اللطيف لوالدك وهو بيوصلك لجوزك وبيدمع ده مش هيكون موجود. او هيتغير شوية. انتي اللي هتكوني كل حاجة لنفسك يومها.

الشغل مبقاش اختيار
هتكوني مجبرة تشتغلي لحد اخر يوم في عمرك. الأمان والبيت والحاجات اللي اتعودتي على وجودها مش هتكون موجودة ببلاش تاني. يا اما هتوفريهم لنفسك او هتفضلي تشتغلي لان مفيش اختيار تاني! هتشتغلي هتعرفي تعيشي، هتقرري ترتاحي من غير خطة مالية، مش هتعرفي تنامي في الشارع حتى لانك مش هتكملي 10 دقايق سليمة بره حيطان شقتك.


انتي هدف محتمل لكل الرجالة المصرية بداية من البواب لحد مديرك في الشغل
جيرانك، زمايلك في الشغل، مديرك، الحي بتاعك، صحابك الولاد، اهالي صحابك الولاد والبنات.. كل الناس ديه هتشوفك هدف جنسي سهل ومريح. بما اننا اتفقنا على فكرة انك عاهرة في عيون كل الرجالة المصرية، ماتستغربيش من أي عرض جنسي من الاشخاص ديه. خليكي كمان عارفة إن بواب عمارتك هيتولى مسؤولية نشر فكرة استقلالك، يعني مش بعيد لما تطلبي أكل من بره يكون ولد التوصيل عارف انك مستقلة.

 نسبة انك تتجوزي واحد مصري هتبقى مستحيلة
لو حصل معجزة وتقبلك راجل مصري زي ما انتِ من غير ما يحاول يغيرك او يرجعك تحت سيطرة ذكورية تاني، فالاكيد إن أهله مش هيتقبلوا فكرة إنهم يروحوا يقابلوا بنت لوحدها ويتقدموا ليها وهما مش عارفين معلومات عن أهلها. مفيش ست شرقية هتقبل تجوز ابنها لست مصرية اختارت تكون حرة وضربت بالمبادئ الشرقية كلها عرض الحيط.

  • Ahmad

    أنا حزين جدا على الواقع اللي بتعشوه ده ، لكن من فضلكم قاوموا من فضلكم استمروا ، كله افضل من سجن الأهل و اعتبارهم حياتك لعبة في ايديهم ، الاستقلال هيخلق لك كيان .

  • rally

    هى لا تحرش ولا جنس حتى ….مجرد مؤامرة اخوانية على اى واحدة تخلع الحجاب او تتمرد ضد العادات بتحريض العامة عليهم فى الشارع والشغل لغاية ما يرجعوهم للطريق القويم

  • Yasmine Samy Ibrahim

    إللى كتب المقالة دى مقهور عشان معندهوش الشجاعة انه يعمل الخطوة دى بنفسه فبيحاول انه “يخوف” البنت من انها تعيش حياة مستقلة طبيعية فى مجتمع متخلف، يا رب انشاء الله كل بنت تبقى عندها الحرية انها تشتغل و تهتم بنفسها و تبقى مستقلة و تستحمل المجتمع المتخلف الذكورى إللى هى عايشة فيه و تتجاهل اى اتهامات متخلفة عقليا نابعة من عقول متخلفة عقليا و انشاء الله متتجوزش واحد متخلف عقليا يا رب D: