كتبت: داليا الحلوانى
ميزتنا احنا كمصريين اننا مش بنتعب قدام أي حاجة صعبة تتعمل بالعكس كل حاجة بتمشي و مفيش حاجة بتقف قصادنا و بنلاقيلها دايمًا حل حتي لو بالفتي و ده بيأكد انك مصري اصيل و اتربيت على مصطلح بنسميه فهلوة او بمعني اصح ” مش يمكن لما اجرب اطلع باعرف!”.  

المصري الاصيل مبيقولش لأ

“هو قالك فين؟” عمرك سمعت الكلمة دي قبل كده؟ الكلمة دي بتأكد ان الشخص مش فاهم حاجة بس هو مش هيقولك مش عارف، لأ هيفكر شوية و يقولك امشي يمين في شمال بعد كده اسأل تاني، نصيحة للمستقبل ماتصدقهوش و اسأل حد تاني!

أكله الأونطة و ياكل علي قفاه

لو انت مش مصري فأنت هتفتكر الاونطة دي اكلة و قفاه الطربيزة اللي بياكل عليها، بس الحقيقة معناهم غير شكلهم، بكل بساطة انك بيتضحك عليك و بيجملك الكلام و يقنعك بحاجة مش حقيقية ولا منطقية!

تصليح الاجهزة و الادوات الكهربائية  

أه في حاجة اسمها كهربائي و سباك و جميع التخصصات لتصليح الأجهزة و الأدوات الصحية بس احنا مابنعترفش بيهم! احنا بنفُك الحاجة و نرجع نركبها من جديد و سبحان الله بترجع زي الاول و احسن! أو بقولك ايه اقفله و افتحه تاني! انفخ فيه هيشتغل! بقولك فهلوة يابني!

بتزوغ من الشغل و بترجع علي ميعاد الإمضاء

اكيد دي من المهارات اللي مش هتتعلمها ف اي مكان تاني. تروح الصبح تمضي و تختفي و لما حد يسأل عليك قوله انك في مأمورية. و ارجع علي ميعاد الامضاء و لا من شاف و لا من دري!

دهن الهوا دوكوا

بالصلاة علي النبي بنقدر نبيع اي حاجة مهما كانت، بس أهم حاجة انك تكون مُقنع و دي أساليب تسويق مش موجودة في أجدع كورس موجود.

“انتي مراتي يا بت”

و ده عُذر أي شاب مصري اصيل لانه يجرجر حبيبته، خطيبته او صاحبته، و أكيد النصيحة دي حيرت كبار مُحللين العلاقات في العالم علشان مش طبيعى انه جملة زى دي يبقى ليها تأثير مع البنات! إلا لو في مصر.

لبس طاقية ده لده.

دي حاجة ميعرفهاش إلا الشاب المصري اللي بيستلف كتير، و معناها انه يكون مستلف من حد فلوس و مسلف حد فلوس و يلبسهم في بعض و يخلع هو، الله عليك يا حبيب والديك!

علاجك عندي

إلا يعني الدكتور الدوا اللي بيديه ده بيعمل حاجة؟ حتي لو كانت مشكلة نفسية فعلاجك عندي اغلي شوية بردقوش مع شبت و حط عليهم عسل و لمون و هتقوم حلو و زي الفل.

بس ده مش معناها حاجة وحشة خالص بالعكس ده معناها ان عقلنا بيفكر و بيلاقي حلول مهما كانت المشكلة حتي لو احنا فهلوية و الموضوع بيجيب في اوقات كتيرة و حتي لو مش بيجيب بس في الاخر دمنا زي العسل!