لو أنت من سكان القاهرة، وفي بالك أنك تحافظ على قواك العقلية سليمة فلازم مرة كل شهرين على الأقل تبعد عن القاهرة بكل تفاصيلها و تفاصيل حياتك و تروح تفصل في مكان بعيد عن المدنية شوية زي نويبع مثلاً او سافاري في أي صحرا.. المهم انك متخرجش من القاهرة وتروح محافظة تانية شبيهه ليها، ليه بقى لازم تبعد عن القاهرة كل فترة عشان الأسباب دي
1- انا معانا ولايا يا درويش
الميكروباصات وسواقين الميكروباصات.. محتاجة أقول أكتر من كده؟!
سواق الميكروباص بيتعامل مع الركاب اللي معاه على أنهم كائنات أكتوبلازمية قادرة على التجسد والتموضع في أي مكان جوا الميكروباص، ومهما الميكروباص أتملى، إيمان السواق في قدرتك على التأقلم أكبر من أي منطق، ودائماً وأبداً “خشي يا انسة.. المكان فاضي ورا”
2- انا مش عارف أتنفس
في ناس كتير فاكرة أن هوا اسكندرية أصيع حاجة ممكن تحصله في مصر، وده طبعا شخص ماعداش على سينا ولا راح حتت بعيدة في الصعيد زي ابيدوس، حيث لا عوادم سيارات، حيث لا عربية ر و مبيدات.. مفيش أي حاجة غير الهواء النقي اللي بنسمع عنه من زمان ده وفي ناس فينا لحد دلوقتي مجربتهوش فعلا، احنا فعلا في القاهرة مش بنتنفس ولا عارفين نتنفس تنفس طبيعي.
3- مين طفا النور
كل الخرافات بتاعت شايفة القمر يا فلانة، أو انا سهران أعد النجوم، دي كلها أكاذيب، احنا فعلا في القاهرة لا بنشوف النجوم و لا بنشوف السما ولا بنشوف القمر وفي أيام لما الجو بيقلب علينا جامد مش بنشوف بعض أساسا، أحنا عايشين في حالة من الضباب السرمدي ولو الضباب خف في يوم أسطوري ، كل العماير اللي قافلة على شباك أوضتك مش هتخليك تشوف حاجة بردو وإن شفت غالبا هيكونوا جيرانك في أوضاع مريبة
4- الباب لأ
لو ركزت هتاخد بالك أن الناس من كتر ما هما بدأوا يتأقلموا مع الدوشة في القاهرة بدأ يجلهم حاجة شبه الصمم المهني، فبدأوا يعلوا صوتهم في الطبيعي حتى لو بيتكلموا عادي عشان يسمعوا بعض، يعني الموضوع مبقاش ازمة أنك متخرجش من البيت عشان تتجنب الدوشة، وأنت في البيت هتلاقي أمك واختك مشغلين التلفزيون ومعلينه وقاعدين يتكلموا جمبه بصوت عالي عشان يسمعوا بعض لحد ما طبلة ودنك تفرقع وأعصابك تنهار
5- الهري
طول ما أنت في القاهرة هيكون صعب عليك أنك تبعد عن الهري، هتركب مع سواق تاكسي هيهري في السياسة، هتروح شغلك زمايلك هيهروا في مشاكل الشغل، هتروح بيتك أمك هتهري في كل الإنجازات اللي انت لسه محققتهاش في حياتك، هتدخل على الفيسبوك –منبع الهري اصلا- هتلاقي كل الناس تحولوا إلي خبراء فيما يخص كل شيء وكأن لو الشخص مقالش رأيه في أي حاة بتحصل هيدفع ضريبة
