كلنا بنمر بلحظات إحباط و تعب وضغط نفسي من وقت للتاني، لكن لما يتحول الموضوع لحالة من الإكتئاب، يبقى أكيد فيه حاجة غلط، وعشان تقدر تحل المشكلة لازم في الأول تعرف سببها، وعشان كدة هنتعرف من خلال المقال ده على أشهر 7 أسباب للإكتئاب.

1- الـover thinking

الـover thinking جملة بنسمعها وبنرددها كلنا، لكن هل كنت تتخيل انه ممكن يكون سبب من أهم الأسباب إللي بتأدي للإكتئاب؟ الحقيقة إن كتر التفكير في المشاكل ممكن جداً يوصل للإكتئاب، وده لأنك بتفضل تعيد وتزيد في التفكير في نفس المشكلة من غير ما تركز على محاولة حلها، فبيزيد الضغط النفسي اللي بتعيشه وبيتطور لحد ما بيتحول لإكتئاب حاد.

2- توقع الاسوأ

وده برده نوع من أنواع الـover thinking لكن الخاص بالمستقبل مش بالحاضر او الماضي، و بيبقى عبارة عن التفكير في حدث أو حاجة هتحصل في المستقبل وتوقع اسوأ السيناريوهات ليها، زي مثلاً: تغييرات في شغلك فا تحس انك هتترفد قريب وتفضل تفكر في الموضوع ليل نهار لحد لما تسيطر عليك حالة من الضغط النفسي ومع الوقت تتحول لإكتئاب.

3- المشاكل المادية

وطبعا ده سبب مهم من أسباب الاكتئاب المشهورة. المشاكل المادية اللي الواحد ممكن يتعرض ليها وتأثر على إسلوب حياته وتفاصيلها، أو الديون إللي بتتراكم عليه ومش بيبقى عارف يسددها، أو إنه يخسر فلوسه أو حتى جزء منها.

4- عدم الرضا عن شكل الجسم

فكرة إنك تبقى مش راضي عن شكل جسمك سواء عشان عايز تتخن او تخس او حتى تعمل فورمة ومش عارف، ده في حد ذاته يجيب اكتئاب، وفي الحالة دي اهم واحسن علاج هو انك تحاول تنمي ثقتك بنفسك ومتستسلمش لليأس او الاحباط.

5- المشاكل العاطفية والـbreak up

اما بقى السبب إللي أكيد كلنا عارفينه فا هو ال”break up” او “الفركشة” زي ما بيقولوا، وده يعتبر واحد من اشهر اسباب الاكتئاب، خصوصاً لما بتكون بتحب قوي أو متعلق بزيادة بالطرف التاني، لأنك بعد ما بتسيبه بتحس بإحباط ووحدة شديدة ومش بتبقى عارف ولا عايز تتعامل مع الناس، وده بيزود الضغط النفسي إللي بتعيشه وبيدخلك في حالة من الإكتئاب.

6- ضغط الشغل

ضغط الشغل كمان ممكن يكون سبب من أسباب الاكتئاب، وخصوصاً لو كنت أصلا بتشتغل شغلانة مش بتحبها، وده لانك مهما حاولت تستحمل هيجيلك يوم وتزهق وتبدأ واحدة واحدة تدخل في مراحل الاكتئاب، بداية من الضغط النفسي والإحباط وبعدها الكأبة الحزن لحد ما يوصل للاكتئاب وبعد كدة الاكتئاب الحاد.

7- التقدم في العمر

ساعات كتير السن بيكون ليه دور، يعني ببساطة الواحد لما بيحس انه كبر وخصوصاً لما بيعدي سن الـ50، بيحس إنه فقد بريقه وجماله وشبابه وبالتالي بيحبط نفسيا وبيبدأ يدخل في حالة من العزلة والاكتئاب، وعشان تتفادى ده حاول تفكر في انجازاتك في الحياة وتشغل نفسك بعيلتك و أفراد اسرتك.