جيل التمانينات ولغاية نص جيل التسعينات ثقافته مع الألعاب الإلكترونية كانت محدودة بالمقارنة مع أجيال دلوقتي .. طبعاً ده بسبب التقدم الرهيب دلوقتي .. بس مع ذلك إحنا كنا بنلعب بشغف تقريباً مش موجود دلوقتي .. وكنا بنعتبر أي لعبة بنلعبها حتة مننا وجزء مهم في حياتنا اليومية.
ومع التطور الطبيعي لأجهزة الألعاب الإلكترونية .. بداية من الأتاري الأسود أبو دراع ومروراً بالسيجا ونهاية بالبلاي ستيشن والإكس بوكس .. كنا في كل مرحلة بنرتبط بلعبة معينة وبنعشقها وبقى لينا معاها ذكريات كتيرة.
تعالوا نفتكر إيه هي الألعاب دي مع بعض.
لعبة الطيارات (في الأتاري الأسود أبو دراع)
تقريباً دي أول لعبة أتاري وعينا عليها في الدنيا .. كانت أشهر لعبة في الأتاري الأسود أبو دراع .. تقريباً كنا بنشتري الأتاري ده عشان اللعبة دي .. تحس إن دراع كان مصمم بطريقة تريحك وأنت بتلعب اللعبة دي .. اللي بالنسبة لي كانت من أصعب الألعاب اللي لعبتها.
كانت في محاولات مع بداية سيطرة الكمبيوتر على عالم الألعاب أنهم ينزلوا نسخة من اللعبة على الكمبيوتر .. بس طبعاً اللعبة دي مينفعش تتلعب غير على الأتاري الأسود أبو دراع ومن غيره تبقى صايصة ومن غير طعم.
سوبر ماريو
الرأسمالية بدأت تسيطر على العالم .. والأتاري الأسود أبو دراع انقرض .. وبدأت تظهر أشكال وتصميمات جديدة من الأتاري .. وقال إيه بقى بيتركب له شرايط وبتاع .. بس كل ده مش مهم لأن التطور ده كان سبب في ظهور أسطورة جديدة في عالم الألعاب .. “سوبر ماريو”
ماريو ده كان واحد من العيلة مش مجرد حد بنلعب بيه .. كنا بنقضي وقت معاه أكتر من اللي بنقضيه مع أهالينا والراجل مكنش بيزهق أو بيشتكي، لا وفضل مكمل معانا في كذا نوع من الأتاري لحد ما انتهت أسطورة الأتاري نفسها وبدأت تظهر أجهزة جديدة.
طبعاً أي محاولات لتقليد ماريو على الأجهزة الأكتر تطوراً من الأتاري كانت فاشلة ومداوتش الجرح اللي في قلوبنا بسبب انتهاء أسطورة ماريو.
كراش
بعد النقلة النوعية اللي حصلت لنا من الأتاري للبلاي ستيشن .. ظهرت أسطورة “كراش” .. اللعبة الوحيدة اللي أجمع على حبها الولاد والبنات في البلاي ستيشن .. وقدرت أنها تجيب رجل البنات للبلاي ستيشن رغم سيطرة الولاد عليه بسبب لعبة “اليابانية”.
كراش فعلاً من أمتع الألعاب اللي ممكن تلعبها في حياتك على أي جهاز .. متعة السباقات والمقالب اللي بتعملها في اللي بيلعب معاك متتوصفش …والسنة دي هتنزل نسخة جديدة من اللعبة والبوستر نزل من يومين والواحد منتظر يشوف هتكون بنفس القوة ولا هنفضل نفتكر اللعبة الاولي
بيبسي مان
بيبسي مان من الألعاب القليلة برضه اللي قدرت تجيب رجل البنات لبلاي ستيشن وان .. من أكتر الألعاب اللي اتعلق بيها الشباب في الوقت ده .. واتعمل منها نسخ كتير فيها كلام بالعربي واتسف عليها كتير وذكريات حلوة زي لما بتقلب الدراع وأنت بتلعب في مرحلة معينة عشان الاتجاهات بتبقى معكوسة.
لعبة Snake (على الموبايلات)
الوضع هنا مختلفة لأنها لعبة مش بتتلعب على جهاز ألعاب ولكن على تليفون محمول .. بس لعبة Snake من الألعاب اللي قلبت المجتمع المصري .. لأنها كانت مع بداية ظهور جيل جديد من التليفونات المحمولة .. بعد مرحلة التليفون الـ 688 .. وظهور موبايلات نوكيا وسيطرتها على السوق المصري.
تقريباً هي أكتر لعبة اتلعبت على أي موبايل نزل .. من بداية ظهور الموبايل ولغاية يومنا هذا .. وكانت أكتر لعبة فيها منافسات بين أصحاب الموبايلات ومحاولات ضرب السكور .. واللي مكنش معاه موبايل كان بياخد أي موبايل يلعبها ويرجعه لصاحبه.
قولوا لنا .. هل فعلاً ارتبطتوا بالألعاب دي وقضيتوا عليها وقت كبير من عمركم .. ولا كان في ألعاب تانية أهم بالنسبة لكم .. ولا ملكمش في الألعاب خالص؟!
