في مرة من المرات اللي كنت بتناقش فيها مع صحابي على القهوة، واحد صاحبي قال جملة رنت في وداني كدة .. “عايز أبطل كلمة “عايز”! الجملة دي واقعية ومعبرة أوي .. إحنا في مصر دايماً “عايزين” نعمل حاجات كتير وللأسف مش بنبدأ ناخد خطوات جدية عشان نعمل الحاجات دي، وبنفضل نأجلها لحد ما ننساها والدنيا تلهينا. وعشان كدة أنا هتكلم في المقال ده عن أكتر حاجات ، المصريين، وخصوصاً فئة الشباب، بيبقوا عايزين يعملوها وغالباً مبيعملوهاش!

1- عايز أخس/أعمل ريجيم

1

في كل شلة شباب أو بنات، هتلاقي دايماً الشخص اللي كل شوية يقولك أنا عايز أخس وعايز أعمل ريجيم وأبطل “فاست فود” .. ودايماً يقولك هبدأ إن شاء الله من أول الأسبوع/الشهر/السنة .. هو دايماً رابط الموضوع بأول أي حاجة … وفي الآخر بلح!

 

2- عايز أبطل سجاير

Image processed by CodeCarvings Piczard ### FREE Community Edition ### on 2015-07-25 17:17:06Z | http://piczard.com | http://codecarvings.com

والشخص ده غالباً بيبقى موجود بين الشباب لإن التدخين مش منتشر أوي بين البنات. الشخص اللي تلاقيه في وسط القعدة كدة ومرة واحدة، وهو ماسك السيجارة في إيده، يقول يا جدعان أنا عايز أبطل سجاير أو قررت أبطل سجاير .. ولازم بعديها على طول يعرض خدماته على صاحبه اللي بيدخن جنبه ويقوله ما يلا بينا نبطل مع بعض.

3- عايز أروح الجيم

3

نفس الكلام في موضوع الريجيم، هتلاقي شخصية كدة بقالها خمس سنين عايزة تروح الجيم من يوم السبت الجاي، ويوم السبت ده مبيجيش أبداً.
 ولو ربنا كرمه وراح الجيم بيبقى “بروفيشنال” وتلاقيه جايب عدة الفورمة كلها بس للأسف “بيفيص” من أول حصتين.

4- عايز أخد كورس

4

ودي بتبقى في مرحلة الجامعة وما بعدها .. هتلاقي الشخص اللي على طول عايز ياخد كورسات، أياً كان نوع الكورس ده، وبيفضل كدة لحد ما بيلاقي نفسه مش عارف يكتب إيه في الCV.

 

5- عايز “أحوش”

5

دايماً هتقابل الشخص اللي عايز “يحوش” فلوس وغالباً هتلاقيه أكتر حد تعرفه بيصرف. النوع ده بيتسحل في الجمعيات ولو طلع دوره الأخير بيخلع من الجمعية قبل ما تبدأ.

 

في النهاية .. أحب أقولكم إني مش قصدي إني أسخر من حد أو أتريق عليه .. محدش عارف ظروف التاني وكلنا بنبقى مشغولين ونفسنا نعمل حاجات كتير ومبنلاقيش وقت نعملها .. بس أنا اتكلمت عن الحاجات دي عشان أنصح نفسي وأنصحكم بأن لو عايز تعمل حاجة ابدأ فيها على طول ومتأجلش الموضوع لحد ما الظروف تتغير. عايز تلعب رياضة ومعندكش وقت .. ممكن تلعب في البيت أول ما تصحى من النوم وتواظب على ده، أحسن ما تروح الجيم مرة وما تكملش.