بسبب ان عندي Writer’s Block مزمنة ملهاش علاج، وبدل ما أتجه لسرقة أفكار من زمايلي جوة نفس المجلة وشكلي يبقي وحش وكدة، قررت أني أستمد أفكار من حياتي اليومية البائسة الملهاش لازمة علي الاطلاق –علي رأي كابتن مدحت شلبي- وقررت أكتب ليكم المقالة دي من وحي مشوار قمت بيه للشهر العقاري في الجيزة، وحسبي الله ونعم الوكيل فيك يا فخري..!
المقالة دي عن أنواع موظفين الحكومة اللي ممكن تقابلهم في أي مصلحة حكومية، غير ان شعارهم كلهم “فوت علينا بكرة” ف ليهم انواع وفصائل وقبائل، دول ليهم نوع دم مختلف عن باقي البشر، فصيلة الدم (س) سخيف يعني..!

 

1- مديحة ضوافر

download

دي بتكون شابة في العشرينات او الثلاثينات من عمرها، متعينة بعقد مؤقت، وغالبا بتكون بنت حد من الموظفين الكبار في المكتب، أو معاها واسطة كبيرة عشان تتعين ف مصلحة “حقيرة” زي دي، مديحة ضوافر دي بتكون ضوافرها طويلة مدببة، غالبا ما بيكون فيها لون مانيكير، أو ترتر، أو جليتر، بتحط فول ميكاب، وبيبقي شكله مضحك جدا في الحر، غالبا تميل للف الطرحة سبانش، وخطها بيكون وحش فشخ.!

 

2- سيد أبو سبحة

download (1)

الأستاذ سيد المتدين، اللي نادرا ما بتلاقيه علي مكتبه، فهو يا بيستغل الوقت بحجة الصلاة ومزوغ ع القهوة، يا ف التواليت بيتوضي، الأستاذ سيد أبو سبحة غالبا ف ايده سبحة لاففها زي الحظاظة وفيه زبيبة صلاة محترمة علي جبتهه العريضة، مش بنقصد الاساءة ليه أو للدين، لكن الكليشيه بتاعه نادرا ما بيشتغل ف اليوم أكتر من عشرين دقيقة..!

 

3- فتحية المستخبية

145148184083482

دي موظفة، غالبا ما بتروح بدري بحجة “ساعة رضاعة” نادرا ما بتظهر، مستخبية أغلب الوقت، دايما بتكون قاعدة نايمة علي مكتبها أو مخبية وشها جوة الدرج، ولو بتخلصلك ورقة غالبا ما بتلاقيها دافنة راسها جوة الدوسيهات، دايما تحسها كانت عاوزة تبقي Serial Killer بس مجابتش مجموع فاشتغلت ف “السجل المدني”..!

 

4- ماما الحاجة وبابا الحاج

3895702092

الموظف/ الموظفة الكبار في السن، اللي قربو يطلعو معاش، غالبا بيكونو تعبانين م النقرس والسكر والضغط، أغلب الوقت بيكونو مبتسمين حتي لو قالولك “فوت علينا بكرة” بس بردو بابتسامة عريضة، ماما الحاجة بتكتب بصعوبة أو بتستخدم الكيبورد بصباع واحد، حاول تكون صبور قد ما تقدر، كذلك بابا الحاج، وده ممكن يسمحلك تقعدي قصاده لو انتي بنت، وبان عليكي التعب من المشوار المرهق، أما لو ولد ف انسي، لو قعدت مش بعيد يتحول عليك ويقتلك..!

 

5- عبده الرايق

Capture

من أكتر أنواع الموظفين انتشارا في المصالح الحكومية، عبده الرايق اللي بييجي مكتبه الساعة 11 ويروح الساعة 1، بيخلصلك الاجراءات ببطء شديد ولو بيملالك استمارة مثلا زي “كعب العمل” ممكن يقضي نص يوم فيها، مش لأنه بطئ، لأنه بيشتغل في أوقات فراغه عصفورة بين المدير وزمايله، أو بيروح يجيب عيش لمدير الادارة، أو يشيل الشنط لرئيس الحسابات، وهكذا، هو بيسلك أموره ورايق ف الوقت نفسه..!

 

6- خالتي فرنسا

hqdefault

الموظفة الصايعة ، أماكن وجودها بشكل أساسي داخل “السجل المدني” و “الشهر العقاري” بتمتاز بصوت عالي مسرسع مزعج، وعندها قدرة انها تاكل اللي قصادها لو مثلا غلط وقالها “ممكن بسرعة شوية يا استاذة” ف هترد عليك بالكلمة الشهيرة “منا بشتغل أهو” والسندوتش ف بقها، او قايمة تجيب الشاي، او بتتفرج علي جلابية جابهالها الراجل اللي بيبعلهم الحاجات بالقسط، وهكذا..

 

7- القرفانة

download (2)

دي واحدة معقدة نفسيا، بتبص لكل الناس بقرف، تماما من نفس نوعية الستات في المترو اللي بتبصلك من فوق لتحت لو انتي مبتسمة، او بتحقد عليكي لو بتكلمي خطيبك، شعارها الأساسي “صباح الزيفت” عليكوا، بتبتسم نادرا، بتمارس هوايتها المفضلة في قلب ملامحها في وشوش الناس المساكين اللي ساقهم حظهم العثر قدامها النهاردة وربنا يستر.
بس دول كانو أنواع الموظفين اللي ممكن تقابلهم لو رحت لأي مصلحة حكومية، وسلملي علي  الحكومة إلكترونية