يا مساء الفل إنت دلوقتي في علاقة.. أمر الله ونفذ ها نعمل ايه.. في علاقة ومضغوط وجايب أخرك وكل أحلامك الوردي و الحمرا وكل الألوان أتبخرت في الهوا.. إنت دلوقتي تعيس بائس وفي موقف منيل بنيلة.. عقلك عمال يقولك إخلع ياض بالطريقة لكن مش عارف.. ما تقلقش تعالى ها أقولك الطريقة.
القاعدة الأولى والأخيرة للخلعان بشياكة.. “إوعي تسيب وراك دليل”.
الطريقة الأولى: لهذا خلق الله الطاقة السلبية
بص بقى كلنا عارفين إن الستات هما مصدر النكد في الأرض.. حتى الأساطير الإغريقية قالت إن الأرض كانت عايشة في نعيم لحد ما جت واحدة ست ” بندورا” وفتحت الصندوق فخرج منه المرض والحزن والهم والغم والنكد والطلبات اللى ما بتخلصش، ده صحيح بس إحنا كمان كرجالة ممكن نكون مصدر للنكد ومصدر ملهم كمان.
أولا يا برنس أتلكك على أى حدث عام وإدخل في مود إكتئاب.. أى حدث مهما كان.. مفيش أكتر من الأحداث عندنا.. بص إن شاء الله تاخد خروج تليفونات أسيوط من كاس مصر حجة أو هبوط حرس الحدود لدوري المظاليم ذريعة.. وحمل إكتئابك بجمل عاطفية شاعرية زي ” إنتي ما تعرفيش تيران وصنافير بالنسبة ليا إيه.. قبل ما اعرفك كنت بروح هناك كل سنة شهرين وليا هناك ذكريات حلوة صعب أنساها” أو ” انتى عارفة يعني إيه حرس الحدود ما يبقاش في الدوري إنتي مدركة حجم المأساة إللى أنا عايشها”.. اشتغل في الخط ده كتير بقى.
رد فعلها في الأول لو ما استهيفتكش على طول وشافتك خرع.. ها تتعاطف معاك ظاهريا.. بس طبعا هاتكون اسبابك تافهة جدا علشان تدخل في مود إكتئاب و بالمناسبة ماتركزش في اسباب إكتئابها هي لانها غالبا بتكتئب لأنها مالقيتش لون المونكير اللي ها يمشى على الشنطة اللى ها تمسكها في إيديها يوم كتب كتاب بنت خالة عمتها اللى هي دلوقتي عندها 4 سنين أصلا.
بعد فترة تعاطف ها تطول شوية أو تقصر ها تبتدي تحاول تخرجك من اكتئابك.. ومهما كانت المغريات أرفض، نروح السينما لاء، نلعب كورة لاء، تخرج ما اصحابك لاء، اشتريلك بلاستيشن 4 لاء، أرفض و أوعى تضعف يا ابن الناس لو ضعفت يبقى تنسى.
هاتبتدي ترمي طوبتك و تبتدي تتحاشي تتعامل معاك لان شخص مصدر للطاقة السلبية- اللى الست بالمناسبة كيان منتج ليها ومحتكرها- هنا بقى نخش في ثانيا.
ثانيا يا بوب كل اللى عليك تعمله إنك تحسسها بالذنب ويا سلام لو قفشتها بتضحك في مرة اشهق شهقة سعيد صالح في العيال كبرت وإنزل نزلة يوسف وهبي في أي فيلم ليه، وقول بصوت كئيب جريح ” إنتي بتسخري من أحزاني.. مش عاملاها أعتبار” وافضل قولها إنها تخلت عنك في محنتك وسابتك لديابة حزنك تفترس الباقي من الضي جواك لحد ما تيجي تقولك انا زبالة ومش ها ينفع نكمل مع بعض.. مبروك يا برنس إنت حر بس لسه ثالثا.
ثالثا وإعملا للقاعدة الأولى والأخيرة للخلعان لازم تقعد شهر تنوح على الحب اللى كان والستات اللى مالهاش أمان اللى باعت قلبك وحبك واشترت الفرفشة والإنبساط وخروجات صحابها وإنك هاتعيش وحيد شريد ولا إنك تسلم مشاعرك لست ما بتحترمش أحزانك، شهر بالطريقة دي يبقى انت نفذت الجريمة الكاملة.