هو الاب يا عينى كده دايما مظلوم ، غالبا بتبقى الام اقرب لعيالها منه ، بيشتغل طول النهار وييجى ينام فبنكبر قبل ما نتعرف عليه ، بس احيانا بس مش كتير الاب بيبقى صاحب لعياله وصديقهم وحبيب بناته حسب بقى شخصيته عشان كده هنحول نعرف شويه شخصيات لابهاتنا ونشوف ابونا مين فيهم .
1- الاب الـ هاني سلامة
ده الاب الكيوت اللى لسه مش مدرك انه اتجوز وخلف وعايش حياته بالطول والعرض ، وده غالبا بيبقى شبه هانى سلامه كده في فيلم واحد صحيح او شبه اى ممثل مطول شعره وبونيتيله حلو والحياه كلها جيم وسهر وسفر وتان وصور وانستجرام والعيال بالنسباله صحاب وحاجه شبهه على صغير ودايما عايزه شبهه فبيطوله شعره وبيلبسه شبهه في كل حاجه ، وبياخده معاه الخروجات اللى تنفع زى الكافيه والقهوه ويتبسط اوى لما يلاقى ابنه العيل الصغير عنده صحبات كتير حلوين فالحضانه ويقف يتفشخر وسط صحابه ” طالع ذوقه حلو زى ابوه “
2- الاب الـ بيومى فؤاد
ده الاب ابو دم خفيف اللى بيطلعلك وبتتكعبل فيه في كل حته ، شخصيه مشهوره في اى مكان ، تروح الكافيه تلاقيه، تروح الشغل تلاقى مديرك عارفه ،صحبات مامى كلهم بيحبوه عشان دمه خفيف ، دايما بياخد الحياه على انها نكته ولازم نضحك وننبسط وده غالبا شخصيته مرحه والام غالبا هى اللى بيبقى شخصيتها نكد كطبيعه اى انثى مصريه اصيله .
3- الاب الـ حسن الرداد
ده الاب اللى تحسه مضطرب في نفسه كده ساعات شايف نفسه حلو وساعات شايف نفسه دمه خفيف وساعات مش عارف هو عايز ايه بس هو في كل الاحوال علاقته باولاده حسب مود هو شايف ايه ساعتها اللى هو لا ضرر منه ولا ضرار
4- الاب الـ وائل الابراشي
ده اب ربنا مايحكمش علينا يعنى دايما ناقد ناقم ، يرتاح نفسيا بعد مايوقع الناس في بعضها يوقعك في امك ولو فشل يوقعك في اخواتك ولو فشل يوقعك مع ولاد الجيران او صحابك يحاول بكل الطرق امه يبقى فالنص انت شخصيا مش هاتعرفله مله ولادين ولا راى ولا قضيه الاب اللى معاهم معاهم بس عليهم عليهم وده غالبا بياخد ابنه الاكبر معاه قعدات الصلح اللى بتقلب خناقات بين صحابه .
5- الاب الـ مرتضى منصور
ده اب دمه خفيف لسانه طويل ، يشعر براحه غريبه فالشتيمه خاصة بالام ، ده الاب اللى ليه اهتمامات مالهاش اى علاقه ببعض اب يحب الرياضه وبيفهم فالقانون وبيفهم فالسياسه وحاشر نفسه في كل حاجه ، اصحابك كلهم بيتريقوا عليه بس بيضحكهم ودمه خفيف على قلبهم وبيخافوا منه لانه ماسك على كل واحد فيهم حاجه تخليهم يخافوا يجروا شكله .
6- الاب الـسبكى
ده راجل تلاقيه شعبي كده في نفسه بيحط فلوسه في اى موضه ، يقدر الجمال والهلس والغنا الشعبي ، بتبنى المواهب الشابه الاستعراضيه وده اب جميل ممكن تقنعه باى حاجه بس هيبقى شرطه الوحيد فيها لخفيها .
7- الاب الـ حمدى الوزير
وده اسمه لوحده كفايه ده اللى بيعاكس كل صحابك البنات ، ده الاب الحبوب لما يلاقى صاحباتك حلوين ولو وحشين بيقلب عليك قلبه سودا ، دايما هزاره مع صحباتك ابيح نوعا ما تحسه بصاته مش سالكه كده ، متحرش قديم .
8- الاب المؤلف السيناريست
ده الاب الاقرب لقلب اولاده خاصتا لو كان صاحبهم دايما بينصحك بتفاصيل اكتر فالحدوته والقصه اللى انت جاى تألفها على امك عشان تسبك عليها كدبتك ، ده اب لذيذ كده بس غامض ماتعرفلوش ماسكه هو بيديك نصايح فعلا لقصتك ولا هو بيوقعك عشان تتكشف ويسلمك تسليم اهالى لمراته اللى هى امك عشان تتلهى عنه فيك ويفضى هو للى بيعمله ، والاب المؤلف ده تقدر تقول هو الاب الجامع الشامل لكل انواع الابهات اللى فاتت هو عارف امتى يرسم شخصيته ويبقى هاني سلامه وامتى يبقى رداد وامتى يبقى الاب السبكى وغالبا ده بيبقى اول الشهر وهو نازل معاكوا يجيب طلبات البيت وامتى يشعللها حريقه كالاب الابراشي وامتى يمسك عليك زله ويبقى الاب المرتضى منصور ، الاب ده اكتر نوع تخاف منه لانك حتى لو انت ابنه ممكن يشرد لقصتك في فيلم او كتاب او مسلسل .
