قبل ما نتكلم ازاى تتخلص من الكسل, خلينا نعرف الاول هو الكسل ده وراثة و حاجة بتجرى فى دمك ولا حالة نفسية ؟!
من الحاجات اللى بتسببلك الاحساس بالسعادة “الاكل ,الجنس والحركة” لكن اغلب الناس بيحسوا بالمتعة فى الاكل والجنس اكتر من اى نشاط تانى محتاج حركة؛ اتعملت تجربة على الفيران علشان يعرفوا علاقة الكسل بالجينات؛ لاحظوا حركة الفيران وقسموها لمجموعين؛ اللى بيجروا كتير والمجموعة الكسلانة؛ وعلى مدار10 اجيال الفيران اللى كانت كسلانة خلفوا فعلا فيران كسلانة زيهم وحركتهم اقل .
هو انت فعلا بتورث شوية جينات بتتحكم فى بعض صفاتك وعاداتك لكن لو اعتبرنا ان كل حاجة انت مكسل عنها دى غلطة جدك مش غلطتك يبقى احنا دخلنا فى مرحلة (اللي ابعد من الكسل.. ومش هنقدر نوضح اكتر من كده عشان مش هينفع تتنشر في مقال) فأزاى بقى نتخلص من الع..الكسل ؟

 

1- كلنا هذا الشخص 

1

كل واحد فيه حتة كسل بتظهر فى حاجات معينة بيكسل قبل ما يعملها ,السبب الاكبر للكسل هو لان مفيش حافز علشان تعمل الحاجة دى اصلا؛ سواء كانت الحاجة دى مملة او تقيلة على قلبك او صعبة؛ فإما انك تختار حاجات انت بتحب تعملها من الاول او لو الحاجة المملة دى لزماك قوى ولازم تعملها كمل باقى النقط.

 

2- مش بالنية 

20151115_132424_8150

النية لوحدها مش كفاية وتخيل النتائج وانك واقف عالمسرح والناس بتسقفلك ممكن يسخنك شوية بس الطريقة دى مش هتكمل معاك وده الـ ego depletion ؛ حافز التخيل ده مهم انك تبتدى بيه بس بينتهى بالوقت لو ملحقتش نفسك وابتديت بتفضل محبوس فى الخيال ده كتير.

 

3- دبس نفسك 

2

ابدأ دلوقتى ..ايوه سيب اللى فى ايدك وقوم يلا “تنمية بشرية قوى ” .
زى ما اتفقنا “ان كل واحد كسول فى حاجات معينة وحاجات تانية لأ , شوف مين صاحبك اللى مش كسول فى الحاجة اللى انت عاوز تعملها وارشق معاه “صاحبك اللى مش بيكسل من الجيم مثلا” او ايا كانت الحاجة دى دور عاللى عملها قبلك وخليه يقولك الزتونة علشان متفضلش تجرب وتعك كتير وانت اصلا مش ناقص.
التأجيل بيجيب تأجيل انا فضلت اربع سنين كلية بقنع نفسى انى هشد من اول الترم الجاى

 

 أصعب مرحلة فى اى حاجة هى انك تبتدأ اصلا ,مجرد ما تبدأ وتدبس بيبقى عندك احساس تانى وهو ان ورايا حاجة عاوز اخلصها او احساس انك مش عاوز تضيع اللى عملته Zeigarnik effect” “وهو ده الحافز يا عاطف”.

 

4- الكبير تاتا..تاتا

reading-a-book

عارف اما تمسك كتاب كده تلاقيه كبير فتقول “هو انا لسه هقرا ده كله” اللى عقلك بيعمله انه بيشوف التاسك ده كبيره جدا فبتبدى تشوف تاسكات اسهل تهرب بيها “تفتح الفيسبوك مثلا” , متقفلش نفسك من الحاجة من قبل ما تبدأ يعنى امسك الكتاب الحاجة الكبيرة قسمها لاهداف صغيرة “هقرا مقدمة الكتاب بس” ,عقلك هيحس انها اسهل و نسبة انك تنجز هتزيد

 

5- جدول بقى 

1 (1)
 اكتب الحاجات اللى عاوز تعملها فى ليست؛ لو ناوى تنجز 5 حاجات النهاردة و مش حاطط فدماغك انا المفروض اخلص ايه امتى؛ اليوم هينتهى وانت معملتش حاجة اصلا . شخصيا لو بخلص شغل عاللابتوب بكتب اللى عاوز اعمله فى sticky note تفضل قدامى والحاجة اللى تخلص بمسحها؛ لما بتشوف الليست بتقل قدامك بتلاقى حاجة تسخنك تعمل اللى بعدها وهتنجز
ومتنساش تحط لنفسك deadline علشان الوقت ميسرقكش؛ وخد بريك عادى جدا مش معنى انك قررت تتخلص من الكسل انك تنفخ نفسك بالعكس ,فى دراسة اتعملت على احسن ناس بتعزف “كمان” فى العالم ولقوا ان اغلبهم بيتمرن 90 دقيقة و يريح 20 دقيقة ؛ ظبط انت الوقت اللى تريح فيه بمزاجك لانك لو الحماس خدك وضغط نفسك هتتقفل من الشغل وهترجع حتى لو بنية انك مش هتخلصه بس هشوف فيه ايه .

6-الخمرة والنسوان والمالتى تاسك 

avatar

اغلب الناس مبتعرفش تركز فى حاجتين فى نفس الوقت ,اعتبر نفسك من الاغلبية دى وانجز حاجة واحده ومتشتتش نفسك .

 

فى النهاية انت لو وصلت للسطر ده فانت تمام وعلى الطريق الصح ,لان الـ….كسالي بصوا عالمقال وقالوا احنا لسه هنقرا ده كله !