ومين فينا مش بيتأسفن له في الشغل وبيكون في كام شخص كده او شخص واحد حطه في دماغه جداً ومش ناوي يسيبه في حاله ابداً، كلنا طبعاً، ده كاس وداير ومحدش هيفلت منه بالمرة، وعشان كده بعد سنين طويلة من الشغل بتلاقي نفسك بدأت تكتسب –الي حد ما – بعض المهارات اللي بتساعدك تفضل على قيد الشغل بعد كل الحقن والأسافين، ساعات بتجيب معايا نتيجة.. و عشان ابقى صريحة.. ساعات انا اللي مش بتسحمل اصلا الاجواء المريضة وبمشي من نفسي، بس دي النصايح اللي اقدر اقدمها بعد 11 سنة شغل.
  • أشتغل لوحدك

hqdefault

انا مش عارفة أنت شغلك ايه وهل ظروفه تسمح بكده و لا لا، بس لو في فرصة انك ماتشتغلش في فريق وأن يكون شغلك لوحدك ومحدش يعرف عنه حاجة بحيث يكون منك للمدير على طول، أعمل كده فورا، وخلي نتايج شغلك هي اللي تتكلم عنك، وفي الحالة دي الأسافين  والحقن من الناس المنفسنة كلها هتروح في اتجاة شخصي من في الشغل لأنهم ميعرفوش حاجة عن شغلك اساسا، ولو انت شغال في مكان محترم ومعاك مدير ذكي، مش هيتهم الا بشغلك ومش هيفرق معاه اساسا الحقن  الشخصية
  • ما تنزلش لنفس المستوى

facebook-comments_22

طبعا بعد اول حقنة ، الغل هيعشش في قلبك والرغبة في الانتقام هتسيطر عليك وكل اللي هيشغل مخك انك ازاي تنتقم من الشخص اللي فقعك الزمبة، جميل واحنا بشر وعادي ان ده يحصل، بس لو ركزت للحظة هتلاقي ان 70 % من مجهودك هيضيع في التخطيط انك ازاي تنتقم وطالما دخلت مخك وجسمك سموم بالافكار دي فبلاش تقنع نفسك انك في اجواء نفسية زي دي هتقدر تنجز شغل كويس، كبر مخك، دي ناس مريضة، كل طاقتك حطتها في شغلك والمفروض الناس دي تصعب عليك مش تغل منها.
  • ناقش نفسك

968452784

لازم عشان تعرف تحقق النقطة اللي فوق، تسأل نفسك  هما الناس بتنفسن عليك ليه وبيدوك حقن ليه؟ ، مفيش اي سبب مقنع لرغبتهم انهم يتخلصوا منك غير انهم حاسين انك تهديد عليهم أو أنهم غيرانين منك على المستوى الشخصي بعيد عن الشغل، وفي الحالتين ده ملوش معنى غير انهم حاسين انك احسن منهم لدرجة أنهم يبذلوا مجهود عشان يعملوا مؤامرات عليك، تفتكر ده مش كفاية عشان تكبر مخك
  • ادي مساحة للكارما

1

الكارما أو العواقب الكونية عمرها ما خيبت، اللي بيعمل حاجة بتلف تلف وترجع تلزق فيه، فبلاش تلغوش على شغل الكارما وتخطط للإنتقام منهم، لأن ترتيبات الكارما بتكون افضل بكتير من ترتيبك انت الفقير للأمور، سيبهم خالص  واتفرج من بعيد عليهم والكارما بتاخدلك حقك منهم ومفيش مرة خيبت مهما طال الوقت.
انا مش بقول اننا نبقى سلبيين، بس كل اللي اقصده أن لو في كل مكان شغل دخلناه قابلنا بني ادمين وحشين من جوا غيروا فينا حتة من جزانا وخلونا زيهم، على اخر شغل هتروحه هتلاقي نفسك بقيت مصاص دماء.