كلنا عاوزين نطفش من بيت أهالينا، كرجالة أو كبنات، طبعا الرجالة عندهم فرصة للطفشان كبيرة، بما انه ولد محدش هيعرف يكلمه، لكن احنا كبنات الموضوع بالنسبة لنا، أهلنا فاهمين الاستقلال هو سجاير وسكر وعربدة وخمر ونساء، مع انه مسئولية كبيرة أوي، ودايما الكلمة المشهورة “لما تبقي ف بيت جوزك ابقي اعملي اللي انتي عاوزاه” وبالنسبة للرجالة “اللي ياكل لقمتي يسمع كلمتي” وهلم جرا..
فيما يلي روشتة من خمس نقط، طبقتها ولسه بطبقها وانا ف بيت أهلي، ومستقلة تماما عنهم ماديا ومعنويا، ولو سبت البيت من بكرة مش هحس بأي دروب معنوي او مادي، والآن إلي التفاصيل:
-
التزم بكلام واضح
لما تقعد مع بابا وماما، علي حسب اللي ماسك مصروف البيت، خلي كلامك محدد، انا هساهم بمبلغ كذا ف البيت، انا هدفع الايجار، انا هلتزم بأكل الكلب، واتيفر انتا حابب تلتزم بيه تعهد بيه ومتخالفش كلامك، ولما تكون راجل ف كلمتك هيزيد احترامهم ليك وهتحس انك بتدفع مساهمة معقولة ف البيت.
-
امشي انجليزي
زي ما انتا كنت/ي صح ف كلامك مع أهلك، امشي معاهم انجليزي، لأنك انتا كمان لك ميزانية، متخليش الحاج يلبسك ف فلوس ديلفري، متخليش حد ياخد منك فلوس أكتر من المقرر، لأن الفلوس دي ببساطة شديدة هتدخل في طي النسيان، ومحدش هيفتكر غير الكام ملطوش اللي بتحطهم أول كل شهر، ف الأحسن امشي انجليزي، الانجليز ناس محترمة 😀
-
خليك خفيف
بلاش النوم ع الكنبة طول الليل وقشر اللب ف كل مكان، طبق/ي سريرك وانتا نازل الشغل الصبح، علق/ي هدومك، اقفل/ي وراك نور المطبخ، يعني مامتك بردو مش الشغالة اللي جايبهالك بابا، ف لازم تفضل حسيس، اتعامل بمبدأ انك ضيف ف البيت ده، وان أهل البيت دول أغراب، وميصحش نزعلهم.
-
اشتغل اشتغل اشتغل…متقعدش ف البيت
أكبر عدو للاستقلال هو انك تكون “عواطلي” عن العمل، وتمد/ي ايدك للحاج أو الحاجة عاوز فلوس، أول كلمة هتسمعها “عندي شحط نايم ليل نهار وبيمدلي ايده” ولو انتي بنت “قومي اغسلي المواعين بدل قعدتك دي” ومتقولش البلد مفيهاش شغل، فيها وانتا دور كويس، واشتغل أي حاجة ولو بألف جنيه، المهم تحافظ علي مورد دخلك ثابت.
-
هدايا من وقت للتاني