أول حاجة هتيجي في بالك لما يبقى معاك مبلغ محترم قوي انك ياتجيب شقة جديدة أو عربية، أما بقى لو ربنا كرمك وبقيت مليونير، فأكيد سقف طموحاتك واللي هتبقى عايزه هيبقى أعلى.
بس في المقال ده هنقدم شوية نماذج لمليارديرات مش بيفكرو زينا، وبيتعاملو مع فلوسهم بطريقة ممكن تفاجئنا.
ستيف بالمر
ستيف بالمر
يعني مثلا لما اتكلمنا عن موضوع الشقة والعربية، أول حاجة هتيجي في بالنا لو كنا مليونيرات اننا هنجيب قصر وعربية مش أقل من bmw.. بس ممكن نستغرب لما نعرف ان ستيف بالمر رئيس مايكروسوفت السابق بيسوق عربية ميعديش تمنها 25 ألف دولار، و وارين بوفيت رئيس بيرك شاير هاثاواي فضل بتاع 35 سنة من حياته وهو غني عايش في نفس الشقة.
كيانو ريفز
كيانو ريفز
وفي نفس نقطة العربيات، في كتير من المليونيرات ونجوم هوليوود زي كيانو ريفز مثلا بيحب يتحرك بالمترو، رغم إن عنده عربيات كتيرة.
مارك زوكربيرج
مارك زوكربيرج
حاجة تانية كمان مش لازم كل لبسك وهدومك يبقو من ماركات عالمية، وتقعد بالساعات تعمل shopping، اوتيجي الصبح تحتار تلبس ايه النهاردة.. في مليونيرات بيستنوا فترات ال sales وينزلوا يبضعوا عادي زي باقي الناس.. وافتكر ان مارك زوكربرج مؤسس فيسبوك معندوش تقريبا غير نسخ كتيرة من نفس الطقم بيلبسها كل يوم.
 تايلور سويفت
تايلور سويفت
غير اللبس مش لازم برضه كل يوم تروح تتغدا وتتعشى في مطعم شيك ولا فندق كبير، وممكن تعمل زي المغنية تايلور سويفت اللي بتحب تطبخ أكلها بنفسها.
إنجفار كامبرد
إنجفار كامبرد
لما تركب طيارة في الفيرست كلاس هتوصل برضه لنفس المكان وفي نفس التوقيت اللي هيوصلو فيه اللي راكبينها معاك في درجات أقل.. مؤسس أيكيا إنجفار كامبرد مثلا مكنش بيسافر غير في الدرجة الاقتصادية، رغم إن معاه فلوس تشتري الطيارة كلها وممكن خط الطيران نفسه.
القرش الأبيض بينفع في اليوم الأسود.. المثل المصري ده بيطبقه مليونيرات كتير ومنهم نجمة هوليوود جينيفر لورانس، اللي مابتصرفش من فلوسها غير على قد الحاجة بس، والباقي محوشاه لوقت عوزة.