كل واحد فينا بيحب فصل معين، فيه مننا اللي بيحب الصيف وفيه اللي بيحب الشتاء، لكن هل تعرف ان برجك ممكن يكون هو المتحكم في حبك أو كرهك لأي فصل من فصول السنة؟!، انهاردة ومن خلال المقال ده هنتكلم معاكوا عن علاقة الأبراج بفصل الشتاء، يا ترى انت من اللي بيحبوه؟ تعالى نشوف برجك هيقول ايه…

برج الحمل .. يصيبه الشتاء بالكأبة

بيحب فصل الصيف لإنه مرتبط عنده بالاجازة، ولإنه كمان بيحب السفر والخروج والسهر مع اصحابه، وعشان كدة فصل الشتاء بالنسباله سجن وتقييد وكئابة  فظيعة.

برج الثور .. الصيف والشتاء عنده واحد

لإنه شخصية روتينية وبيتوتية، مبتحبش الخروج ولا السفر وبتفضل الحياة الأسرية والقاعدة في البيت، مبيفرقش معاه صيف من شتاء، الاتنين عنده واحد.

برج الجوزاء .. بيكره الشتاء جداً

برج الجوزاء من اكتر الأبراج الزهوقة اللي بتحب تسافر وتتنطط وتروح وتيجي، وفصل الشتاء بالنسباله تقييد لإنه بيمنع عنه الحاجات اللي بيحبها وعشان كدة بيكرهه.

برج السرطان .. لا بيحب الصيف ولا الشتاء

برج السرطان بقى لا بيحب الصيف ولا الشتاء، بيعشق فصل الربيع لإنه بيجمع بين مميزات الفصلين، من ناحية بيقدر يخرج ويستمتع بالمناظر الطبيعية، ومن ناحية تانية مش بيعاني لا من برد ولا من حر.

برج الأسد .. كائن صيفي

على الرغم من إن  برج الأسد بيكره الحر للدرجة اللي ممكن تخلي مزاجه وحش طول الوقت، إلا إنه علاقته بفصل الصيف زي علاقة السمك بالمياه، بيستمتع جداً بالسهر والخروج والرحلات، وعشان كدة بيتخنق جداً أول ما بيجي الشتاء.

برج العذراء .. بينه وبين الشتاء عداوة

مواليد برج العذراء شخصيات عملية جداً، لكنها في نفس الوقت بتحب تبسط نفسها، المهم انهم في الحالتين بيكرهوا الشتاء وبيكتئبوا من الهدوء اللي بيغطي الشوارع والليل اللي بيطول وكل الحاجات اللي مرتبطة بالشتاء دي.

برج الميزان .. يعشق فصل الشتاء

برج الميزان بقى بيعشق فصل الشتاء، كله على بعضه كدة، بجوه البارد وهدوء لياليه ورومانسيته، ده غير طبعاً عشقه للإستجمام والقاعدة قدام الدفاية وهو بيشرب مشروبه السخن وبيستمع بالموسيقى الهادية.

برج العقرب .. كائن شتوي بحت

لإنه اصلا غامض وبيميل للكأبة، الشتاء بيكون دايماً هو الفصل المناسب لشخصيات برج العقرب، بتفاصيله وهدوءه والضلمة اللي بتغطي شوارعه، كلها كدة تحسها شبه صفات مواليده.

برج القوس .. الشتاء بيدمر نفسيته

يعتبر فصل الشتاء هو أسوأ فصول السنة بالنسبة لمواليد برج القوس، وده لإنهم بيحبوا الإنطلاق والسفر والخروج، وعشان كدة هدوء الشتاء بيصيبهم بإحباط وكأبة شديدة.

برج الجدي .. الشتاء بيطلع الجنان اللي جواه

على الرغم من إن حياته العملية هي أولى اهتماماته، إلا إنه بيحب خروجات الشتاء والجري تحت المطر، من الأخر كدة بيخرج طاقة السنة كلها في الفصل ده.

برج الدلو .. هو والصيف دونت ميكس

حر الصيف بيخلي برج الدلو يحس بالضيق والكأبة، وعلى الرغم من إنه بيحب الشتاء إلا إن فصل الخريف هو الأفضل بالنسباله على الإطلاق.

برج الحوت .. بيستمد طاقته في الشتاء

مواليد برج الحوت بيعتبروا فصل الشتاء فرصة عشان يستجمعوا قواهم ويستمدوا طاقتهم ويستعدوا خلاله لإستقبال فصل الصيف، اللي هو وقت الانطلاق بالنسبالهم.