زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
النهاردة معادنا مع عمهم، كبيرهم، مع ملك الغابة، ورئيس السلسلة الغذائية في العالم، توكيل اللحمة الفريش، غزلان ماشي، حمير وحشي ماشي، بقر ماشي، الكبير الزعيم الشديد، معادنا مع “برج الأسد” LEO
برجنا النهاردة برج “ناري” زي برج “الحمل” كدة، مواليد 23 يوليو ل 22 أغسطس، وسبحان الله رغم انهم بعد برج “السرطان” الشهير ب”سوما العاشق” إلا انهم عكس البرج ده تماما…يمكن لأن “الشمس” هي الجرم السماوي اللي مسيطر عليهم، ف تلاقيهم كدة مشعنينين، ومجانين، ومسيطرين….فلازم عامة كل شلة هتلاقي زعيمها “أسد” وكل واحدة نجمة ومزة هتلاقيها “أسد” برضه
يلا نبدأ مع بعض عشان نستكشف البرج البرنس ده، وكالعادة، الستات الأول
-
بتكره الروتين
ستات برج “الأسد” أكتر شئ مميز فيهم انهم بيكرهو الروتين، لذلك دايما بيبعدوا عن الوظايف التقليدية، المكاتب التقليدية، لو بتروح الشغل كل يوم هتلاقيها بتجرب طريق جديد كل يوم، رايح جاي، هتلاقيها بتحاول تغير روتين يومها، معندهاش ثوابت في حياتها عامة، كل يوم بستايل وكل يوم بروح جديدة، امرأة برج الأسد الروتين بيموتها عامة.
-
مبتسامحش
شعارها الأساسي هو “عض رغيفي ولا تعض قلبي” ممكن تنصب عليها في فلوس، او تاخد منها ميكياجها وأكلها وشربها وكل ما تملك بس، لو خنتها هتقتلك حرفيا، عيب كبير في شخصية امرأة برج “الأسد” انها بتسامح وتنسي كل حاجة ماعدا “الخيانة” لا بتعرف تسامح ولا بتعرف تنسي ولا بتغفر، لذلك دايما لو اتخانت بتسيب من دون نقاش، معندهاش فرصة تانية بأي شكل، حذاري من خيانة الست دي.
-
مهووسة بفكرة الكمال
لو فتحت شنطة أي واحدة من برج “الأسد” هتلاقي فيها كمية “ميكياج” مهولة، مش عشان هي بتحب الميكاب، هي ممكن تكون بتكرهه جدا، بس دايما عاوزة تكون ف أجمل صورة وأجمل شكل، دايما عندها سعي انها تفضل أحسن واحدة في الكون، لذلك متحاولش تقارنها بأي بنت عرفتها ف حياتك، لأنها بالتأكيد هتكون أجمل منها، لو مش ف الشكل ف بالروح، ثقتها ف نفسها كبيرة رغم انها دايما شغالة علي نفسها وعلي ال Look بتاعها، ودي حاجة نادر تجتمع في ست عامة.
-
سهل تحب…صعب تحافظ عليها
سهل توقع واحدة برج “أسد” في حبك، لكن صدقني صعب أوي علاقتكم تستمر لو انتا محافظتش عليها، ليه؟ شعارها في الحياة هو “زي ما هتحبني هحبك” ف لو حضرتك بتحبها بس أخدتها For Granted وسبتها للظروف كدة هي هتبعد تلقائي، وبرغم كل اخلاصها ليك، لو دخل واحد تاني لحياتها هتلاقيها هي اللي بتسيبك، علاقتها بحبيبها بتبقي زي الزرعة اللي لازم تتراعي، لو متسقتش وشافت الشمس والهوا هتموت، ومش علاقتها بحبيبها بس، لأ بصحابها كمان، لو مش بتلاقي تقدير من صحابها باستمرار زي ما هي بتقدرهم الصداقة بينهم بتموت بشكل بشع..!
-
أنثي أفعوانية
يكفي اننا نعرف ان شخصيات زي “مادونا” و “جاكي كينيدي” من مواليد برج الأسد عشان تعرفو قد ايه الستات ف البرج ده عظيمات، للأسف أحيانا شخصية امرأة برج الأسد بتكون أقوي من الراجل بتاعها، وأحيانا بسبب العصبية أو الطبيعة النارية بتخرج عن السيطرة، وممكن تخنق الطرف التاني، لذلك الموضوع محتاج صبر، ومحتاج انها تتعلم تتحكم ف نفسها شوية يا أوختي، الراجل مش بييجي بالساهل كدة بردو..!
الرجالة بقي “خلو بالكم يا بنات:
-
أغار عليها..!
عيب قاتل في شخصية رجل برج “الأسد” انه غيور بشكل لا يصدق، تحقيقات زي “كلمتي مين؟” – “قلتو ايه؟” بتتكرر كتير في علاقته مع شريكته، بيقال انه “سجان في سجن دهب” بيحاول يحاوط حبيبته بكل حاجة حلوة عشان متتعاملش مع رجالة تاني غيره، وبيزعل جدا لو كلامه اتكسر، وخصوصا لو حاجة اتكلمو فيها كتير قبل كدة، بلاش تحاولي تفلفليه لأنه مش هيبقي متفلفل، ده هيولع فيها كلنا 😀
-
مبذراتي
من أكتر الأبراج اللي بتحب “النزاهة” وتحب ترش علي كل اللي حواليها، وأكتر الأبراج ادمانا للقمار، والشوبنج هما: رجالة برج الأسد..أيوة..الرجالة بتحب الشوبنج هنا..!
رجل برج الأسد بطبيعته بيعشق الحياة المرتاحة، وبيشتغل بشكل كبير وبيحاول يبقي عنده أكبر كمية فلوس عشان يحس بالعز، خصوصا علي صحابه، وبيته.
-
قائد
فيه ناس مولودين بجينات القيادة، عندهم الكاريزما بتاعتها، ملهمين، بيعرفو يحركو الناس من نظرة عين، الناس دي مواليد برج الأسد
يكفي عزيزي رجل برج الأسد انك تعرف ان برجك هو برج: نابوليون بونابرت، بيل كلينتون، فيديل كاسترو، عشان تتملا فخر بأن حضرتك بتتولد زعيم من صغرك، زعيم اه مفيش مشاكل بس علي نفسك بردو
-
مغرور حبيبي كتير
طبعا بما ان حضرته “قائد” ف طبيعي انه بعض الأحيان يفقد السيطرة علي نفسه وعلي الEgo بتاعه، ويتحول لكيان مغرور، لكن في الحقيقة هي بتكون قشرة بس، وهو لا مغرور ولا حاجة، هو بس بيرسم نفسه، لكن ف حضن حبيبته بيتحول مخلوق تاني، لذلك دايما كل عظيم ف برج الأسد له الست اللي بتحوله “قطة” زي “جوزفين” مرات “نابوليون” كدة وانتا فاهم انا قصدي ايه
-
متسلط
-
“انا قلت كدة ومحدش هيناقشني” – “لكن يا باشا، ملكنش” وهكذا، دي دايما بتبقي ردود أفعال أي حد بيحاول يتناقش مع رجل من برج الأسد، اللي بيحب يقول الكلمة مرة واحدة مش مرتين، ومبيحبش حد يراجعه فيها، ولا يتناقش، حتي لو غلط، ف طبعا متسلط وعنيد ومقرف، ف حاول تاخده بالسياسة، أو تاخده علي عيبه وتخلص نفسك
كعادة كل الأبراج النارية، قلبهم طيب بس مجانين، عاوزين بس يا بنات نخلي بالنا من رجال “الأسد” لأنهم محتاجين معاملة خاصة كدة من حبيباتهم، ف دي روشتة سريعة مني ليكي كدة عشان تعرفي تحافظي عليه وتجننيه:
-
ارضي غروره
-
اعمليله مفاجآت.
-
خليكي جنبه، ساعديه.
-
خليكي انثي طول الوقت معاه، بلاش تحسسيه انك صاحبه محمود.
-
الزقيله، اعملو سوا حاجات وأنشطة جديدة..
