زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..!
حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير”ومائي “بلاش تنزل في الغويط”.
النهاردة بنتكلم عن ال”بركان الخامد”، عن الناس اللي تبان جامدة وناشفة وهي من جوة طرية زي البسكوتة، وعلي رأي عنترة العبسي “سكتت فغر أعدائي السكوت وظنو بأني طري كالبسكوت..!”، برج شعاره الدائم “مائة عام من العزلة”، شخصيات البرج ده أكتر شغلانة تليق بيها هي “زعماء مافيا” و “زوجات زعماء مافيا”، برجنا النهاردة قرصته والقبر، هو برج “العقرب”..!
علي الرغم من ان طبيعة شخصية البرج ده صعبة وغريبة إلا انه برج مائي، بيسيطر عليه برج المريخ، وغالبا هنلاقيه هو نقيض برج “الثور”، ولذلك لو عقرب وثور ارتبطو احتمالات فشلهم كبيرة
مواليد البرج ده اتولدو ما بين 24 أكتوبر – 21 نوفمبر، جو خريفي بامتياز يطلع عباقرة وعلماء وزعماء مافيا، الأسطورة الاغريقية بتقول ان العقرب كان بيموت ناس كتير، وكان في صراع مع الصياد، لحد ما لدغه وقتله، وقرر انهاء الصراع للأبد، ولذلك قرر “زيوس” ترقيته عشان يبقي كوكبة نجوم..
! نبدأ كالعادة مع سيدات برج العقرب “معرفش ليه كلهم بيفكروني بAmy بتاعة Gone Girl”، يلا يا ستات..!
1- يا أبيض يا أسود
من أهم عيوب البرج ده ان السيدات فيه مش بيقبلو أي حلول وسط، يا أبيض يا أسود، مافيش رمادي، مفيش حاجة اسمها كدب أبيض يا هانيا، أكتر الناس تمسكا بالمبادئ، أكتر ناس معندهاش مرونة مع أي حاجة ف الكون، التعامل معاهم عامة صعب..!
2- مثابرة وعندها إرادة
المثابرة وقوة الإرادة هما شعار ستات البرج ده، بالتالي أكتر ناس بينجح معاهم الدايت هما الناس دي، أكتر ستات بتعمل نفسها هما ستات البرج ده، سيدات بيتحدو الظروف والمجتمع والتقاليد وبيعرفو يعملو اللي هما عاوزينه وبيثبتوا انهم صح ف الاخر..!
3- كتومة
التطبيق العملي لجملة “سرك في بير”، ورغم ان الست العادية متوسط مدة احتفاظها بالسر حوالي 3 أيام، إلا ان بنات وسيدات برج “العقرب” بيعرفوا يكتموا الأسرار وبيعرفو ينسوا ان حد قالهم حاجة أصلا، من أكتر الصديقات المخلصات في الحياة، يابنات اللي عندها صديقة من برج العقرب تحافظ عليها، دي ثورة قومية وكنز..!
4- شكاكة
“كنت فين السنة اللي فاتت الساعة 7 بالليل بعد ماتش الأهلي ومزارع دينا؟” – “لقيت شعرة بيضا علي ياقة قميصك، بتاعة مين دي؟” – “وانتا نايم كنت عمال تقول يا سالي يا سالي تقدر تفهمني مين سالي دي؟” وهكذا، الحياة عامة مع ستات وبنات برج العقرب هي نوع من أنواع الجحيم المطبق، وخصوصا لو كان راجل عينه زايغة مثلا زي “الأسد” أو رجل بيحب كل الستات زي برج “الميزان”، حاسب لو بتلعب بديلك عشان هتجيبك هتجيبك..!
5- ذاكرتها قوية
لو فيه ست حاطة هارد ديسك خمسين تيرا في دماغها، وبتعرف تفتكر كل حاجة من ساعة لما أمها فطمتها لحد ما بتموت، تبقي الست دي من برج العقرب أكيد، عندها ذاكرة حديدية فوتوغرافية فيديوهية وربنا يسترها علينا كلنا ان شاء الله..!
والرجالة بقي “بيفكروني بالدون كورليوني ألف رحمة ونور عليه”
1- خاين بطبعه
بما ان الرجل ده بيسيطر عليه كوكب المريخ، فتلاقيه مش عارف يقعد كدة علي بعضه، دايما في حالة بحث واحتكاك وعلاقات مع الستات، لذلك الراجل ده بيخلي عينين مراته ف وسط راسها، ودايما لازم يتفتش وراه ويتشك ف اي حاجة بيقولها عشان هو يا اما خاين، ياما بيفكر ف الخيانة، ياما اوريدي بيخطط يخون
2- محارب
من قلائل الرجال اللي عايشين حياتهم علي انهم “محاربين”…الحياة بالنسبة ليهم معركة، ولازم يكسبوها بأي شكل كان، لازم كل اللي حواليهم يساعدوهم علي اللي بيعملوا، قدامهم هدف كبير انهم يكسبوا الحياة بأي طريقة مشروعة أو غير مشروعة..!
3- غامض
ميزة وعيب في الراجل ده انه مش بيبان علي ملامح وشه اللي بيفكر فيه، دايما مدي الPoker Face طول الوقت، ف محدش عارف هو مبسوط ولا زعلان ولا متضايق ولا عنده حموضة ولا ايه، غامض وقامط ف نفسه، مش قلتلكوا زعماء مافيا..!
4- قاسي
بسبب ان رجل برج العقرب عايش حياته كمعركة، دايما تلاقي أحكامه قاسية وشديدة، شخصيته نفسها بتكون صارمة جدا، بيمشي كل حاجة علي رقبته، حتي لو هتضايقه بس القانون قانون..!
5- صاحب حاسة سادسة
” الحاسة السادسة في البرج ده قوية جدا بالنسبة للرجالة، لدرجة مثلا انه لو شافك متضايق هيعرف ايه معكننك، وايه اللي حصل، وانتا اتغديت ايه امبارح، وابنك جاب كام ف ثانوية عامة، حاسة الفراسة عنده عالية جدا..
مش قلتلكو الرجالة م البرج ده زعماء مافيا..! ممكن برضه يا ستات أديكم روشتة سريعة كدة عشان تكسبي ثقة رجل برج الـ “عقرب” ده لو عقلك بيوزك ترتبطي بواحد منهم، والروشتة كالتالي :
– حاولي تفهميه، وشجعيه يتكلم.
– احكيله تفاصيلك، وأسرارك.
– دايما نشني ع الوقت الصح.
– خليه يثق فيكي.
– اهتمي بيه جدا.
