كتابة :نوران جمال الدين
في ظل الظروف اللي احنا فيها البنات بقت بتشتغل اكتر من الولاد دلوقتي ، ممكن عشان اشطر –اه ده تحيز- ممكن عشان مش بيتنكوا عشان يشتغلوا وممكن عشان اسباب تانية مجهوله المهم يعني ان البنات بقوا كتيير اوي في اي شركة وممكن نقسمهم للأنواع دي:
-
الDrama Queen
طلبتوا اكل من غيري بجد!!!! شكرا جدا يا جماعه مكنش العشم وتتقمص يومين و ممكن تروح تشتكي لل HR !
-
الفاشونيستا
بتعتبر ان الشغل هو ال runway بتاعها كل يوم لبس جديد و accessories وميك اب وغالبا لو روحت وقفت جنبها هتلاقيها فاتحة Amazon او Ebay لو مستواها المادي عالي و Jumia لو مستواها متوسط
-
الشكاية
بتتلكك عشان تشتكي، “انا اكيد مش هلحق اخلص كل الشغل ده، انا زميلي مضحكوش في وشي النهاردة، على فكره انا اصلا المفروض اكون مديرة”
-
الحضن
دُرجها مليان شوكولاته، اي حد متضايق بيروح يتكلم معاها او هي بتروحله وتديله شيكولات عشان تهون عليه
-
ال Party Animal
صورها على طول في Cairo Zoom، و دايما هتلاقيها يوم الخميس بتسأل: يا جماعه حد رايح طبله او 6 degrees الويك اند ده؟
-
عايزة اتجوز
هي اساسا مش عايزه تشتغل ولا في دماغها الشغل، هي في دماغها هدف واحد: العرييييس، فطول الوقت هتبيّن مهاراتها في البيت. احمد دوق الملوخيه دي كنت عملاها امبارح، لأ طبعا يا جماعه فرح ايه هو كتب كتاب و لا ايه رأيك يا احمد؟و في الغالب احمد بيلبس في الآخر
-
البلطجية
اشطر واحده في الشركه، بتكره كل الناس و الناس كلها بتكرهها بس هما سايبنها تشتغل و مدلعينها و مدينها صلاحيات كتير و مش بيوافقوا انها تمشي لأنها بتجيب للشركه فلوس كتييييير
-
الFresh Grad
الللللللللله بجد ده النوع المفضل بالنسبالي، الخريجين الجداد دول كنز و الله…طاقه ايجابيه كتير وهنلاقي عندها روح المبادره كده لغاية ما تثبت نفسها وبعدين أحلامها تتحطم على أقرب صخرة واقع وتتحول بالتدريج ل”واحد مننا”
-
الرادار
دي بقى متبعاكي وعارفة كل تحرُكاتك من غير ما تبيّن، هتلاقيها بتقولك انا خدت بالي من صورة صاحبتك اللي اتجوزت اللي انت عملالها لايك هو فرحها كان فين؟
-
المدام
المتجوزة اللى فى أى مكتب، هتلاقيها دايما بتحب تشير مع اللى حواليها خبرتها فى شغل البيت والأماكن اللى فيها تخفيضات دلوقتى على لبس الأطفال والأدوات المنزلية تحديدا، وأكتر يوم الشركة كلها هتكرهها فيه هو اليوم اللى عيالها مش هيروحوا فيه المدرسة/الحضانة لأى سبب وطبعا حبايب ماما هييجوا مع ماما الشغل عشان يقرفوا كل اللى فى المكتب لحد ما يروحوا
-
المخطوبة
ودى اللى ما صدقت –حرفيا- انها اتخطبت، طول ما بتتكلم من بعد الخطوبة لازم هتجيب سيرة خطيبها؛ خطيبي جابلى، خطيبي ودانى، خطيبي معزوم عندنا… إلخ. وطبعا طول ماهى بتتكلم أو مبتتكلمش لازم ايديها اللى فيها الدبلة تكون فى وش أى حد بيكلمها “بناااات، أنا اتخطبت!”