فى كلام كتر على إن نهر النيل العظيم فرع مصر ..بقى فيه تماسيح كتير بعد مشكلة إنخفاض منسوب المياه والناس حصلها ذعر غير مبرر, مش فاهم إيه المشكلة؟ أنا شايف إن فى مزايا كتير لدخول التماسيح مصر منها مثلا.
بديل رخيص للحيوانات الأليفة
بعد زيادة الضرائب على أكل الحيوانات الأليفة بنسبة 40% لأنها سلع إستفزازية الناس بتدور على بديل تانى يكون كويس وكمواكبة لدول العالم الحديث إحنا هنبقى أول دولة بتستبدل حيوانات أليفة مكلفة بأخرى صديقة للبيئة ..كمان هنحل مشكلة إختلاط السلالات فى الكلاب والقطط واللى خلت سوقهم مليان غش ..ممكن تجيب كلب جيرمان شيبرد على أنه ألمانى يطلع نتاج كلب بورسعيدى على كلبة صعيدية ولونهم ظبط .. سوق التماسيح هيكون أمان جدا أكيد مش هتشترى تمساح على أنه longhair ويطلع بعد شهرين shorthair .. التمساح تمساح محدش يعرف يغشه حتى لو جوزه لسحلية.
حل لمشكلة السمك النافق
دلوقتى نهر النيل بقى مليان أسماك ميتة ورغم إن فى مسؤول صرح بإن دى مش أسماك ميتة دى فى غيبوبة وبدل ما التجار اللى معندهمش ضمير بيلموا السمك ده ويبيعوه على أنه طازة ..التمساح هيمشى يأكل حى فى ميت ونقطع الشك باليقين.
إيقاف التعديات على ماء النيل
لما التماسيح تكتر وتملا النيل هتكون بمثابة حارس أمين اللى هيفكر يفك زنقة أو يرمى زبالة التمساح هيجيبوه من لغاليغوه ونخلص..
تشجيع المشروعات الصغيرة ومتناهية الصغر
لو التماسيح زادت عن حدها وكترت وحاولت تعمل نفسها أصحاب مكان ,حلها سهل جدا نبدأ نصطادهم ونوردهم لورش تصنيع الشنط والأحذية وبالتالى هيكون مشروع قومى يعالج مشكلة البطالة بدل مشروع ال 200 عربية خضار وفاكهة اللى الرئيس أعلن عنه بس لسه محتاج تمويل. فى نفس الوقت هيكون عندنا منتج محلى ينافس عالميا.ده غير إن كل فلوكة ماشية فى النيل هيكون عندها مصدر دخل تانى من صيد التماسيح.
الطب الشعبى
زى ما فى مسؤول إكتشف فوائد الفوسفات الموجود فى مياه النيل للصحة أكيد فى مسؤول هيكتشف فوائد التماسيح فى النيل اللى فيه فوسفات.. دى توليفة جديدة محصلتش فى العالم كله قبل كده.. غالبا هيتقال إن التماسيح منتج لعلاج الضعف الجنسى لأن 90% من الحاجات بتعالج من الضعف الجنسى عندنا كمصريين. وإذا كان البط والحمام والسمك مفيدين للجنس تخيل فائدة التمساح.
مفيش أى سبب للخوف من التماسيح ممكن تكون هيا الحاجة الوحيدة المضمونة فى النيل اليومين دول.
