مع صعوبة الحياة الحالية؛ والظروف الأقتصادية؛ وعمل الأم والوقت السريع جدا ؛وضغوطات الحياة الكثيرة؛ واحيانا لظروف صحية أو طبية تمنع أحدهم من الخلفة مرة أخرى؛ أو انفصال الأم والأب؛ أو لتأخر سن الزواج؛ أو لظروف أخرى خاصة بالأسرة؛ أصبح بعض الأسر يفكرون أو يضطرون للأكتفاء بطفل واحد فقط ويتبع هذا القرار بعض المميزات وايضا بعض العيوب هنعرض بعضها هنا لتساعد من يفكر فى اتخاذ هذا القرار الصعب فى مجتمع يفضل ويشجع على كثرة الخلفة.
المميزات :
1-الهدووووء
هتقدر تستمتع بالهدوء والراحة فى بيتك أكتر لأنه طفل واحد فقط هتستطيع تشغله ببعض الألعاب او تلهيه فى الرسم والتلوين؛ المهم هتعرف تسيطر بخلاف لو معاه طفل أخر أو اثنين هيقلبوا المكان لفوضى وهيكون صعب السيطرة عليهم لأنكم هتفقدوا أعصابكم وصبركم بسرعة وهيتحول البيت الهادئ لملاهى وصريخ وزعيق وهتشوفوا أهواااال.
2-القليل من المال
تربية الأطفال بقت من أصعب الأمور فى الوقت الحالى ومكلف ماديا جدا من أول قدومه وتبدأ الطلبات تنهال عليك ومصروفات لاحصر لها من بامبرز وزيارات عديدة للدكاترة والكثير الكثير من الملابس والألعاب والحضانة وباص الحضانة والمدرسة وماأدراك بالمدرسة وغيرها من مصاريف لانهائية؛ فتخيل بقى لو خلفت أطفال أخرين توقع افلاسك السريع؛ لكن مع طفل وحيد تكون الأعباء المالية قليلة ألى حد لطيف.
3-الأهتمام كبير والوقت كتير
طبعا لما يكون عندك طفلة أو طفل هتديله كل أهتمامك وهتغرقه بكل الحب والحنان والرعاية. لان مفيش غيره وهيكون عندك متسع من الوقت لتنمية مهاراته والتركيز معاه وتربيته وتعليمة بأفضل شكل ممكن بدون تشتت بين اثنين او اكثر من الأطفال..
4-طفل مسؤول:
يتعود الطفل من وهو صغير على تحمل مسؤلية تصرفاته كامله فليس لديه أخوات أخرين ليرمى عليهم أخطائه وتحمليهم أفعاله السيئة بل يتحمل كل مصيبة صغيرة يفعلها فيكون فى النهاية شخص مسؤل يتحمل وحده نتيجة أخطائه.
5-الدلع كله
بما انه الطفل الوحيد فتقريبا كل اللى بيحلم بيه بيحصل عليه وديما طلباته بتتحقق فلا يوجد غيره فيأخذ الكثير من الدلع والألعاب واهتمام زائد بكثيرعن كل الأطفال اللى لديهم أخوات أخرين؛ وايضا الأم والاب بيحصلوا على قسط وفير من الدلع فبعدم وجود الكثير من الأطفال بتكون حركتهم أخف وأسهل بيقدروا يسافروا ويخروجوا فى أى وقت ويقوموا بأى أنشطة بيحبوها وبيستمتعوا بالحياة بعيدا عن الضجيج والصخب.
العيوب :
1-الشعور بالوحدة
بيمر الطفل الوحيد بفترة ما من عمره يشتكى فيها من الوحدة وانه لايوجد أحد يلعب معه وانه يريد أخ أو أخت مثل فلان وفلان ولمعالجة هذا الأمر ان الأب والأم يجعلوه يشارك فى الكثير من الأنشطة عشان احساسه بالفراغ فى وقت كبير هو اللى هيسببله الشعور بالوحدة وايضا فى حل لطيف انك تربى فى البيت حيوان أليف بيفضله؛ ويلعب دايما معاه عندما يريد اللعب مع أحد أخر.
2-الشعور بالذنب
شعورك بالذنب تجاه ابنك أوبنتك من تركه وحيدا وبدون أخوات معه بيكون أكثر ضرارا عليه من أى شئ أخر ممكن يكون طفل وحيد ولكن أكثر سعاده من أطفال أخرين لديهم أخوات ولكن تعساء؛ فلازم تاخدوا بالكم ان شعوركم السلبى هيتنقله وهيشعر بأحساسكم بالذنب والشفقة وممكن الشعور ده يخليه غير متزن نفسيا على الأطلاق ويأثر على شخصيته مدى العمر .
3-الأهل والمجتمع
من أصعب الأشياء اللى ممكن تواجها فى قرار انجاب طفل أول بس بدون طفل تانى وثالث ضغط الأهل والمجتمع عليك فأنت لست على الصورة النموذجية للأسرة فى المجتمع المصرى فتجد الجد والجدة والعم والعمة والخال والخاله وكل العائلة والأصدقاء وحتى الأشخاص العابرين عندما يروكم لايتحدثون عن شئ أخر سوا هتخلفوا تانى أمتى؟ وهاه يالا عشان تجبيله اخ! ولو أخبرتهم انك لاتريد أطفالا أخرين كأن القيامة قامت أو كأنك منعت عنهم الطفل اللى هيحل كل مشاكل العالم وهينقذهم من الدمار !
حلك الوحيد انك تكون حاد وصارم معاهم وانك تهدد بقطع علاقتك بيهم ان تحدثوا مرة أخرى فى أمورك الشخصية لأنك الوحيد الأعلم بالأصلح والأفضل لحياتك وليس الأخرين.