كتابة: ساندي حسام

النهارده افتتاح الدورة التانية من مهرجان الجونة السنيمائى اللي بيتعمل للمرة الثانية على التوالى بعد نجاحه السنة الفاتت، السنة دى قرروا يخلوا المهرجان مُميز أكتر بدعوة “سيلفستر ستالون” لمصر! بس هل يا ترى الموضوع مستاهل الحماس ده كله عشان سيلفستر جاى؟ تعالى نحدد..

 

١- سيلفستر ستالون الرجل الثالث فى التاريخ اللى إترشح للأوسكار مرتين لنفس الفيلم كأفضل مُمثل وأفضل كاتب بعد Charlie Chaplin وOrson Welles!

 

٢-  سيلفستر صّور وكتب واحد من أشهر الأفلام فى العالم “روكى” بعد ما اتحمس وشاف محمد على كلاى فى مباراة ملاكمة.. الفيلم حقق أكتر من ٢٠٠ مليون دولار و٣ جوائز أوسكار رغم إن تصويره ماخدش غير ٢٨ يوم وكتابته ٣ أيام بس!

 

٣-  ولاية فيلادلفيا استخدمت مدخل المتحف الفنون بتاع المدينة وسمته بـ “The rocky steps” وعملت لشخصية روكى اللى تمثال جنب المتحف!

 

٤-  سيلفستر ستالون على رأي الأستاذ الفنان أحمد شيبه من الناس اللي الزهر لعب معاها جامدلأنه كان فقير جدًا فى أول مشواره لدرجه أنه باع كلبه وصديقه الوحيد لغريب مقابل ٢٥ دولار عشان يأكّل نفسه! و دلوقتى يُقال أن ثروته بلغت ٤٠٠ مليون دولار.

 

٥-  سيلفستر اتعرض عليه ياخد ١٢٥ ألف دولار مقابل سيناريو فيلم روكى من غير مايمثّل فيه ورفض، وبعديها اتعرض عليه يمثل فيه مقابل ٣٥ ألف دولار بس هيمثّل فيه.. وافق!

 

٦- سيلفستر ستالون رغم إعاقته الجسدية اللى موجودة ف وشه اللى عبارة عن شلل ف بعض الأجزاء اللى كان ممكن تمنعه خالص من التمثيل ممنعتوش إطلاقا وبقى من أشهر نجوم هوليوود في العالم!

 

بعد كل كدة.. هل شايف حماسنا الزايد بأن ستالون جاى ف محلُه؟ فى النهاية كلها آراء، بس من الأكيد أن الراجل ده عظيم وهيبقى إضافة للمهرجان كبيرة جدًا.