5 اسباب لماذا انت اهم شخص في حياتك

كل يوم وكل مرحلة في حياتنا بيدخل فيها ناس كتير وبيخرج منها ناس أكتر، فيه اللي بيدونا درس كان لازم نتعلمه وفيه اللي وجودهم زي عدمه مبيفرقش وفيه اللي بينورولنا حياتنا وبيزوقونا اننا نبقى ناس أحسن. في ناس كتير اوي نفسنا نقولهم اننا سعدا اننا قابلناهم بس لسبب ما مش بنعرف، انا النهارده جاية اقولك ان الشخص الوحيد اللي انت المفروض تكون سعيد انك قابلته هو انت! ايوه انت المفروض تصحى كل يوم تقول انا سعيد اني قابلتني! تعالى اقولك ليه..

• انت اول واحد قابلته في حياتك

فكك بقى من جو انا فتحت عيني على الدنيا لقيت معرفش مين في وشي، انت اصلا فتحت عينك على الدنيا لقيت الدكتور بيشدك يعني اول حد شفته كان الدكتور اللي ولد مامتك مش اي حد تاني

• الناس بتمشي وانت ثابت

مهما كان مين حواليك دلوقتي هيختفي، إما لأسباب دنيوية (الدنيا هتاخده، هيسافر، هيتجوز ومراته هتقوله متكلمش بنات) أو هيبعد لأسباب اكبر زي انه يموت مثلا عادي كلنا هنموت. فأنت الوحيد اللي موجود مع نفسك لغاية ما انت كمان تموت.

• مفيش حد بيشيل هم حد

مهما كان اللي قدامك مبينلك انه مهتم وشايل همك هو في الحقيقة مش كده، ده مجرد تعاطف معاك بينتهي أول ماتقوم او تقفل التليفون، انت اللي مش بتنام بليل من كتر الهم اللي عندك مش هو.

• الناس مبترحمش

لما بتغلط الناس هتتكلم عليك وممكن متسامحكش، لكن انت هتعرف تسامح نفسك وتعيش عادي، اخطاءك بتقويك مش بتضعفك ولازم تتقبل اننا كلنا بشر وبنغلط وكلنا لازم نسامح نفسنا

• انت املك الوحيد

اللي هيكبرك ويخليك توصل لأهدافك وتبقى حاجة هو انت ومش اي حد تاني، انت اللي هتشتغل على نفسك وتعلم نفسك وتتمرمط لغاية ماتوصل مفيش حد هيفضل يزق فيك لأنه هيكون معندوش وقت وشغال على نفسه. المقال ده مش هدفه انك تكره الناس، بالعكس انا هدفي انك تحب نفسك قبل اي حد واي حاجة تكون بتعملها يكون الهدف منها رضاك عن نفسك مش رضا الناس. اشتغل على نفسك واوعى تبطل تتعلم وتحب عشان نفسك مش اي حد تاني!