مفيش شك أن لحظات الأنتخة بتبقى من أسعد لحظات أي حد فينا .. وكل ما زادت الفترة اللي ممكن تشغل فيها مود “الأنتخة” .. كل ما السعادة بقت أكبر .. شعور أنك مش مطالب أنك تعمل حاجة أو تتحرك من مكانك شعور لا يُقدر بثمن.
ولكن مع ذلك ممكن تواجهنا شوية تحديات وإحنا مأنتخين .. تفسد علينا متعة لحظات الأنتخة والكسل .. تعالوا نشوف
1- مأنتخ وجعان ومفيش حد يحضر الأكل
أسوأ شعور ممكن يقابل واحد مأنتخ هو شعور الجوع وأنه يضطر يحضر الأكل لنفسه .. في اللحظة دي بيقول في نفسه “إيه ده أنا شبعت فجأة الحمد لله” .. وبيواجه صراع بين رغباته الفطرية في مقاومة الجوع وبين غرائزه المكتسبة في الأنتخة.
2- مأنتخ ومفيش حاجة حلوة على التلفزيون
الأنتخة تحب التلفزيون والتلفزيون يحب الأنتخة .. والتلفزيون هو الجهاز الالكتروني المفضل لعشاق الأنتخة .. فمعنى أن مفيش حاجة حلوة تتشاف على التلفزيون في وقت ما تقرر تشغل مود الأنتخة .. أن لحظات الأنتخة هتنهار قدام عينيك من غير ما تستغلها.
3- مأنتخ والموبايل هيفصل
في حالة أن معندكش “باور بنك” طبعاً اللي حل المشكلة دي .. الأنتخة ليها طعم تاني مع الموبايل والنت .. سواء باقة أو واي فاي .. وضروري جداً أن الموبايل يكون مشحون قبل ما تدخل في مود أنتخة عشان مش طالبة تفضل مستنيه يتشحن ومش طالبة أنه يفصل منك وتضطر تقوم وتشحنه.
4- مأنتخ وعندكم ضيوف
مود الأنتخة مش بيطلب تواجد أي ضيوف في البيت .. لأنك ببساطة مش هتعرف تخلص من زن أمك عشان تروح تقعد مع الضيوف .. وفي نفس الوقت مش هينفع تأنتخ على الكنبة وأنت قاعد معاهم.
دي أصعب المواقف اللي بتقابل أي حد قرر يأنتخ .. ..الاصعب من كل ده لما تقرر يكون يومك انتخة وتسمع صوت جاية من الصالة يقولك قوم انزل هاتلنا حاجات من اي مكان .. شكرا ماما مدمرة الانتخة .
