العشرينات اقصر واسرع مرحلة عمرية في حياتنا . يمكن عشان طبيعة السن فيها اننا بنكون مقبلين على الحياة وفي دماغنا خمستلاف حاجه عايزين نعملها . بس محتاجين ننظم تفكيرنا صح عشان نستغل كل دقيقة فيها .
وبصفتي واحدة لسة بتعدى خطوة العشرين حاولت اجمع مجموعة خطوات عملوها اللي اكبر مني وفعلا قدروا يخلوا حياتهم مش تقليدية وفي نفس الوقت استغلوا وقتهم في حاجات ممتعة ومفيدة ..
1- ماتتجوزش بدرى
اه واللهِ زي ما بقولك كده . جواز يعني التزام يعني اطفال يعني مسئولية وانت لِسّه في بداية حياتك . ايه بقى اللي يخليك تشيل كل الهموم دي بدري كده ! ده غير ان فكره الجواز نفسها محتاجة تفكير كتير جدا قبل ما تاخد خطوة زي دي , وتقرر تعيش مع حد باقي عمرك كله وانتوا لِسّه معدتوش مرحلة النضج ! فبدل ما تدخل في تجربة احتمال فشلها اكتر من 80% وتخرج منها بنظرة سيئة للارتباط عموما . خد وقتك وفكر كويس قبل ماتنفذها . حاول كمان تعرف كذا حد الاول , ومش لازم على فكرة عشان تكون ليك تجارب انك تصاحب نص بنات مصر او انتِ تكوني ماشية مع البلد كلها ! لا مجرد انك ليك صحاب كتير بنات وولاد هتفهم النوع التاني بيفكر ازاى ! وكمان هتلاقي كذا فرصة ادامك تقدر تختار منهم مش once انك قابلت حد اتعلقت بيه فاتجوزتوا وخلاص كده من غير ما يكون ليك تجارب او خبره مسبقة في العلاقات . فياريت at least قبل ال25 سنه تلغي فكرة الجواز والارتباط المقدس من مخيلتك تماما .. ايوه الجواز مش هيطير لكن العشرينات هتعدى ومش هترجع تاني
2- نمي موهبتك
انت عندك موهبة ممكن تكون لِسّه مش عارف ايه هي بس المهم انها موجودة . عشان تكتشفها جرب اكتر من حاجه مثلا حاول تكتب شعر او قصص مانفعتش جرب تعزف مزيكا , اختار اي الة موسيقية واتعلمها مانفعتش برضه ! معلش متيأسش جرب التصوير ومش لازم تشتري كاميرا ب4000 جنيه عشان تتعلم التصوير لا طبعا ! دلوقتي كلنا معانا smart phone جرب الاول تتعلم على كاميرة موبايلك لو حبيت التصوير ابقى اشتري كاميرا بروفيشنال . كمان موهبتك ممكن تبقى الطبخ او الرسم او الغنا او التمثيل … المهم دور على موهبتك فين وطورها . وموهبتك دي هي الحاجة اللي هتلاقي نفسك بتعملها من غير ما تزهق او تتعب .
3- اتعلم حاجة غريبة
هي مش بتكون حاجة غريبة واللهِ بس المجتمع لما هيلاقيك بتعملها هيبصلك نظرة استغراب شوية ! مثلا لو انت ولد اتعلم الطبخ او ازاى تغسل المواعين , ازاي تغسل هدومك وتكويها , ازاي ترتب سريرك وتروّق مكانك كده . ولو انتِ بنت اتعلمي تغيري لمبة , ازاي تصلحي فيشة , ازاي تدقي مسمار او تركبي انبوبة وماتفجريش البيت ! حاجات سهلة وعادية جدا هتنفعك لو قررت/ي تستقل عن اهلك وتعيش لوحدك وحتى لو لِسّه في بيت اهلك لازم تكون بتعرف تعملها كنوع من الاعتماد على النفس وكمان عشان ماتتحوجش لحد .
4- سافر
السفر حاجة حلوة وتجربة ممتعة ده غير انها بتغيرلك مودك 180 درجة وتخليك تبص لكل حاجه حواليك بشكل جديد ومختلف وطبعا هتتعلم منه كتير . جرب الاول تسافر جوا مصر , هي صحيح مصر مش اجمل بلاد العالم بس فيها حاجات كتير حلوة عندنا اماكن اثرية ماتتعدش واماكن ساحلية تحفة ..
5- اشتغل اكتر من شغلانة
فكرة انك تتخرج من جامعتك تلاقي وظيفة الاحلام مستنياك دي لازم تمحيها من مخيلتك . الكلام ده كان في السبعينات خلاص احنا دلوقتي في 2016 والبلد كلها معاها شهادات نصهم قاعد على القهاوى . ده غير انك حتى لو اتخرجت واشتغلت في نفس مجالك الموضوع هيكون ممل ! حاول تجرب اكتر من شغلانه ومن خلالهم هتقدر تعرف ايه المناسب ليك وتكمل فيه , ومش هتكون بتضيع وقتك اطلاقا بالعكس فترة المرمطة بين كذا مكان ووظيفة هي احلى فترات عمرنا – بيقولوا كده يعني 😀 – انا في تانية جامعة واشتغلت 3 شغلانات قبل كده وبدور على الرابعة . هما صحيح ملهومش علاقة بمجال الدراسة بس على المستوى الشخصي استفدت منهم كتير .
6- اقرا
القراية حلوة , وبتفتح المخ , وبتشيل الصدا اللي فيه وبتعمله صنفرة .. حاول تقرا على قد ما تقدر حتى لو 4 كتب في السنة المهم انك تقرا . وكونك بتقرا كتب دراستك او كتب ليها علاقة بالتخصص بتاعك فدي مش ثقافة على فكرة ! في فرق بين الثقافة والمذاكرة . اقرا حاجه بعيدة عنك عشان تاخد منها خبرة مختلفة .
7- العب رياضة
الرياضة مفيدة ومهمة دوّر على اي نوع رياضة تكون مهتم بيها واتعلمها صدقني هتنعكس على حياتك بعد العشرينات , واكبر مثال عندنا عمرو دياب “انا مهما كبرت صغير” . سباحة بقى او كورة او تنس المهم تكون بتمارس رياضة في المطلق . لو معندكش وقت ليها اتمشى على قد ما تقدر او اجرى . وماتنساش تشرب مياه كتير مهمة برضه .
8- ابعد عن السوشيال ميديا
اكتر حاجه بتضيع الوقت هي السوشيال ميديا . هي اكيد ليها مميزات كتير بس اكتر من خمس ساعات في اليوم ماتقعدش ! – مع ان خمس ساعات كتيربرضه – المهم حاول تقلل منها على قد ما تقدر . القعدة طول اليوم وانت بتكتب بوستات للفولورز بتوعك عشان اللايكات والشير مش هتفيدك بحاجة على فكرة ! طيب ده حتى الفولورز اللي بتكتبلهم كل واحد بيشوف البوست بتاعك في دقيقة وبعدين يكمل حياته عادي انت بقى حياتك فين ؟! ده غير طبعا ان اي حد دلوقتي يقدر يعمل اكونت ويكتب اي حاجه والواحد بقى يجيله اكتئاب من كمية البوستات الغبية اللي بيشوفها .
9- ماتلتزمش بحاجة
انطلق جرب واتعلم وشوف حاجات جديدة .. ماتلتزمش بمكان معين ولا اشخاص معينه .. عشان انت مش زرعة مستنية اللي يرويها
