من أكتر الفئات اللي بتعاني في حياتها هي فئة اللي بيلبسوا نظارة .. أنتو مش متخيلين حجم المعاناة اللي بتسببها هذه القطعة البلاستيكية ذات الذراعين لينا .. وأحياناً بتكون المعاناة بشكل يومي .. أو في مواقف معينة .. معاناة مش هيحس بيها صاحبك اللي مش بيلبس نظارة واللي كل ما يشوفك يقولك وريني نظارتك كدة .. ويلبسها ويقولك “الله شكلي حلو أوي بيها .. نفسي ألبس نظارة” .. ألبس ياخويا وماله .. مانت هتلبس فعلاً !
وعشان كدة قررت أكتب عن معاناتي ومعاناة كل اللي بيلبسوا نظارة .. يمكن الجبلات اللي إحنا بنقابلهم يحسوا بينا

1- معاناة البحث عن النظارة

1
أنت متخيل يعني إيه تدور على حاجة وأنت مش شايف أصلاً والحاجة دي هي اللي هتخليك تشوف؟ .. شعور وحش أوي وإحساس بالعجز .. طب أنت متخيل أن الحال ممكن يوصل بيك أنك تدور على النظارة وأنت لابسها أصلاً؟! .. تخيل بجد عشان ده بيحصل فعلاً معايا ومع ناس كتير غيري.

2- نظارة الشمس رفاهية مش مكتوبة لنا

2
بالنسبة للي نظره ضعيف لو حب أنه يلبس نظارة شمس هيبقى قدامه حل من تلاتة .. يا إما يعمل نظارة شمس بعدسات طبية وده شيىء مقزز أوي .. أو يلبس عدسات تحت نظارة الشمس وده حل مش مضمون لأن العدسات بتتعب العين .. أو يلبس نظارة الشمس زي ما هي كدة ويبقى درويش وماشي في نور الله.

3- فاجعة كسر النظارة

5
إحنا بنعلن حالة الحداد لو النظارة اتكسرت .. ده بجد على فكرة .. النظارة لو اتكسرت ومكنش عندك نظارة تانية هتضطر غالباً أنك تقعد في البيت كام يوم كدة لحد ما تعمل واحدة جديدة .. بدل ما تنزل تلوش في الشوارع.
ويا سلام بقى لو نسيت ونمت بالنظارة .. احتمال تصحى على صوت الكسر وأنت بتتقطع من جواك.

4- عوامل التعرية

7
المطر .. التراب .. الشبورة .. الرطوبة .. وغيرها من الحاجات اللي بتزاولنا وإحنا ماشيين وبتبهدل النظارة .. لازم تبقى مستعد في الظروف دي ومجهز مناديل معاك.

5- سماجة الآخرين

4

اللي يشوفك قالع النظارة ويقولك “دول كام” .. واللي ييجي يهزلك النظارة من ورا ودانك .. واللي يمسك النظارة من العدسات ويسيبلك بصمته القذرة عليها .. نماذج مثيرة للاشمئزاز بنقابلها أحياناً
ده كان جانب من معاناة اللي بيلبسوا نظارة زي حالاتي .. طبعاً ده غير معاناة أفلام الـ 3D في السينما واضطرارنا اننا نلبس نضارتين فوق بعض كأننا فالهالوين.. ومعاناة لعب الكورة بالنظارة .. ومعاناة الفلاش اللي بيضرب في النظارة وإحنا بنتصور وبيخلينا شبه الأندرتيكر كدة .. احكوا لنا عن معاناتكم مع النظارة وإيه أكتر حاجة بتعانوا منها