لو بدأت الموضوع بدخلة أن قد ايه مصر فيها أماكن جميلة المصريين ميعرفوش عنها حاجة في أن في أجانب كتير بيعيشوا يحلموا يزوروا المكان ده، مش هبقى أوفر ولا بقول كلشيهات انا شفت ده بعيني حقيقي وعلى أرض الواقع، الموضوع بدأ برحلة رحتها في أبريل السنة اللي فاتت في مكان أسمه أبيدوس/العرابة المدفونة وده مكان تابع لمحافظة سوهاج، المكان ده فيه معبد يخص مصر القديمة وفي طاقة قوية جداً ونقية.. ليه المكان ده بيختلف عن باقي الأماكن الأثرية في مصر..هقولك:
-
بيت الحياة
في منطقة أبيدوس، اللي هي عبارة عن أرض زراعية وراها جبل وقدامها طريق سفر سريع وبين الجبال معبد\ أبيدوس والأزوريون – المقبرة الرمزية لأوزريس- هتلاقي صرح شامخ كده اتعمل من سنة ونص تقريباً واتأسس على أيد راجل صعيدي أسمه الحج محمد – الشهير بحورس- الحج محمد في الأساس بيمارس العلاج بالطاقة الطب الفرعوني، وورث المعرفة دي عن ست كانت عايشة هناك حكايتها أسطورة – هجيلكم في النقطة الجاية- وبقى عنده القدرة أنه يستخدم طاقة المكان في علاج بعض الأمراض، كل زباين الحج محمد في منتجع بيت الحياة أجانب، وكلهم جايين عشان يتعالجوا عنده، وفي منهم ناس حالتها بتتحسن بالفعل.
-
أم سيتي
أم سيتي هي ست انجليزية، كان عمرها ما جت مصر، ومع ذلك من وهي صغيرة كانت بتقول لأهلها أنها روحها اصلا مصرية وان وطنها مكان اسمه ابيدوس وان فيه ابنها، لحد ما كبرت وجابت ولد وسمته سيتي، وبالمناسبة الملك اللي بنى معبد ابيدوس اسمه سيتي الاول، ولما كبرت جت ابيدوس اول مرة وكانت اخر مرة لانها مخرجتش منها، هجرت كل حياتها في الستينات وجت عاشت في ابيدوس باقي عمرها في بيت طوب جمب المعبد وكانت بتعرف حقايق طول الوقت عن مصر القديمة الناس مكنوش فاهمين هي بتعرفها منين وكانوا بيتأكدوا انها حقيقة، ناس كتير من وزارة الاثار نفسها كانوا بيجوا يزروها ويتكلموا معاها وفضلت اسطورة لحد ما ماتت وادفنت عند بوابة الجنوب زي ما طلبت، ولو رحت هناك هتلاقي المحلات والقهاوي على اسمها ” ام سيتي”
-
الطاقة
عالمياً، منطقة أبيدوس بتتميز بوجود طاقة عالية فيها وده بسبب وجودها جنب مركز كبير من مراكز الطاقة في كوكب الأرض ومراكز الطاقة دي بيتقال عليها بوابة النجوم، بمعنى أن الطاقة بتعدي كده دايركت من نجوم للارض في المنطقة دي بدون اي حاجز وده بيخلي الطاقة في قمة فعاليتها، فلما تيجي تتعالج او تذاكر او تتعلم حاجة هناك تتعلمها بشكل اسرع وده انا جربته بنفسي لما عشت هناك 4 شهور. اتعلمت السباحة في شهر في حين اني فشلت تلاتين سنة اني اتعلمها بشكل صح . وممكن تقرا اكتر عن الموضوع ده لو عملت سيرش على جوجل بـ abydosstargate
-
الهدوء
لما بنعوز نتريق على لحظات الصمت والهدوء الاوفر بنقول اننا مش سامعين غير صوت صرصار الحقل، في الواقع لو عشت فترة في ابيدوس/، خاصة لو كانت شقتك في المنتجع بتطل على الأرض الزراعية، أحب أقولك أنك بليل فعلا وحرفياً مش هتسمع غير صوت صرصار الحقل، وتبتدي تكتشف ان جسمك بيعمل اصوات وانت بتتنفس عمرك ما سمعتها، ولو عطست وانت في شقتك تلاقي الغفير اللي في اخر المنتجع بيقولك يرحمكم الله .
-
ميصحش والله
لما كنت هناك قابلت راجل كندي اسمه مارك طبيب علاج طبيعي ومهتم بأمور الطاقة العلاج بالطب الفرعوني، وطلعنا مع بعض المنطقة اللي بيتقال ان فيها بوابة النجوم، لقيت عينه دمعت وقالي انه فضل مستنى سنين عشان اللحظة ده، وانه كان طابع صورة المكان ده من جوجل ايرث ومعلقة في اوضته كحافز له انه يحوش ويجي المكان ده، في حين أن المكان ده كان يبعد عني 7 ساعات بس بالقطر ولحد من شهرين مكنتش أعرف عنه حاجة أساسا. ده غير أن المعبد اللي في ابيدوس كان المكان اللي المصريين القدماء بيحجوا فيه على مر الاف السنين، وشفت بعيني مجموعة امريكية معتقين الدين ده وجم عشان يحجوا !
طبعا شئ غريب انك تلاقي اهتمام شديد بمكان في بلدك وانت عمرك ما سمعت عنه …ممكن يكون نص الكلام فالمقال انت مش مقتنع بيه ؛ بس الحقيقة ان المكان تجربة تستخق تخوضها وعالاقل تشوف اماكن جديدة في بلدك .
