مهما كانت العلاقة قوية بين أي اتنين، سواء كانت علاقة حب أو صداقة، وارد جداً إن يحصل بينهم مشاكل وخلافات كتير، لكن المهم هو إزاي يقدروا يتعاملوا مع المشاكل دي ويحلوها بتفاهم وهدوء من غير ما الموضوع يكبر منهم والمشكلة تبقى مشكلتين، وعشان كدة هنقولكوا انهاردة من خلال المقال ده على اكتر حاجة بتستفز كل شخص في الخناقات من خلال برجه عشان تقدروا تتجنبوها.
برج الحمل .. البرود
أكتر حاجة ممكن تضايق مواليد برج الحمل في الخناقات هي البرود، وده لإنه بيحب يدي لكل حاجة حقها، يعني وقت الخناق خناق ووقت الهزار هزار ووقت المناقشة والكلام الهادي هتلاقيه بيتناقش، كل اللي عليك هو إنك تعرف امتى المفروض تعمل ايه.
برج الثور .. المجادلة
متقعش في غلطة مناقشة برج الثور لما يغلط، وده لإنه في لحظة زي دي عمره ما هيعترف بغلطه بالعكس تماماً ده انت كدة هتعصبه وتضايقه وتخليه يعند زيادة ويصر على رأيه مهما كان من جواه عارف ومتأكد انه غلط وغير منطقي.
برج الجوزاء .. السخرية
هما يتريقوا اه، لكن انت تتريق ليلتك سودة!! هما كدة مواليد برج الجوزاء مجانين، هتلاقيهم وهما بيتخانفوا معاك عمالين يهزروا ويتريقوا لكن لو فكرت انت ترد الهزار ده بهزار هتستفزهم وتعصبهم وفي ثانية هتقوم حريقة مش هتعرف تطفيها.
برج السرطان .. الطرف التالت
أكبر غلط ممكن تعمله في مشكلة بينك وبين شخص من مواليد برج السرطان هي إنك تدخل طرف تالت بينكوا عشان يحل الخلاف، وده لإن بيحب يحل مشاكله بنفسه وبخصوصية من غير ما يدخل حد فيها.
برج الأسد .. السيطرة
لو حس مولود برج الأسد إن مش هو المنتصر في النقاش وإن الطرف التاني هو المسيطر على سياق الكلام هيفقد هدوءه ويبدأ يهاجمك حتى لو كنت انت صاحب الحق، فعشان توصل معاه لحل للمشكلة لازم تحسسه ان هو الطرف الأقوى.
برج العذراء .. المقاطعة
في اي مشكلة تحصل بينك وبين شخص من برج العذراء تقدر تعمل اي حاجة غير إنك تقاطعه وهو بيتكلم ومتديلوش فرصة يعبر عن رأيه ووجهة نظره، لإنك ببساطة لو عملت كدة هينفجر في ؤشك من شدة الغضب.
برج الميزان .. الأفورة
مواليد برج الميزان شخصيات مبتحبش الكأبة والزعل، وعشان كدة لو حصل بينك وبينه مشكلة حاول على قد ما تقدر متكبرش الموضوع لانه هيحس انك بتخلق موضوع من مافيش، صدقني الأمور معاه ممكن تخلص بالمناقشة الهادية ومن غير افورة.
برج العقرب .. الاستهتار
إياكِ لأي سبب إن كان تحسس مولود برج العقرب انه بيقول اي كلام او تستهتر بمشاعره او تحسسه انه مكبر الموضوع مثلاً، لو فعلاً عايز تصالحه وتنهي المشكلة حاول تأكدله انك فاهمه ومقدر زعله وواخد بالك من الحاجة اللي مضايقاه.
برج القوس .. تغيير الموضوع
متحاولش ابدا تغير الموضوع او تتكلم في اي حاجة تانية مالهاش علاقة بالمشكلة الأساسية اللي بينك وبين اي حد من مواليد برج القوس لإنه هيتوتر ويفقد اعصابه، حاول تفضل تتناقش معاه لحد ما توصل لحل يرضي الطرفين وبعد كدة اتكلم في اللي انت عايزه.
برج الجدي .. الهزار
حتى لو كان هدفك تهدئة الموقف وكسر التوتر وإنهاء المشكلة، اياك تحاول تهزر وانت بتتناقش معاه لأنك بكدة هتبقى بتستفزه وهتلاقي رد فعل عنيف ومش متوقع.
برج الدلو .. التحدي
الشخصيات دي عنيدة بطبعها ومش بتستسلم بسهولة، وعشان كدة اكبر غلط ممكن تعمله من مولود برج الدلو هو انك تفكر تتحداه أو تثبت إن وجهة نظرك هي الصح لإنه هيفضل يعاند معاك لأخر نفس فيه.
برج الحوت .. الدراما
الدراما هي أكتر حاجة بيكرها مواليد برج الحوت وخصوصاً في المشاكل، وعشان كدة لازم تخلي بالك كويس قوي من طريقتك ونبرة صوتك وحركات ايدك وتعبيرات وشك عشان متلاقيش رد فعل يفاجئك.
