بما ان في رمضان الواحد بيبقي محتار يتفرج علي ايه فحاولنا نجمع لكم اكبر كم من المسلسلات اللي اتفرجنا عليها …في حاجات طبعا ملحقناش نشوفها وفي حاجات مينفعش نشوفها (لانها كده كده لا تصلح للفرجة ولا حتي لتضيع الوقت عليها) ونبدأ مع :

1- ونوس

timthumb

يحي الفخراني يعود بقوة شديدة للدراما بعمل مبني علي مسرحية فاوست ؛ السناريو كالعادة لعبد الرحيم كمال واخراج شادي الفخراني ؛ المسلسل ينصح به بشده وان في مشاهد كانت مباشرة بزيادة ؛ ولازم اللي بيتفرج يعرف ان الفخراني طالع بدور الشيطان عشان يفهم الاحداث

 

2- جراند اوتيل

images
دراما بوليسية مبنية علي مسلسل مكسيكي بنفس الاسم واتعمل بكذا نسخة ؛ وده مكتوب علي تتر المسلسل فعلا وده يحسب لصناعه خصوصا ان عادة ان لم يكن معظم الوقت المصرين لما بيمصروا عمل مبيكتبوش الاصل ؛ السيناريو لتامر حبيب والاخر لمحمد شاكر خضير في تاني تعاون بينهم بعد طريقي ؛ المسلسل مليان ناس حلوة بس طبعا موهبة متفجرة هي محمد ممدوح تخليك تتابع العمل بشغف شديد ومع ممثل في راي الشخصي قوي جدا بس هو لسه مبداش ظهور قوي هو خالد كمال ؛ وطبعا دينا الشربيني واحمد داوود كذلك
الموسيقي لايمن ابو حافة اللي عامل كذلك ونوس والميزان والحقيقة انه اعتقد هو احسن موسيقي السنة دي خصوصا ان التلت اعمال بنفس القوة

3- نيللي وشيريهان

مسلسل-نيللي-وشريهان
كوميديا السنة دي بلا منازع دنيا وايمي في احسن حالاتهم ومعاهم دويتو افشخ هما بيومي فؤاد وسلوي خطاب وكمان اخراج احمد الجندي اللي نقدر نقول عليه متميز فالحتة دي كويس جدا .

 

5- افراح القبة

5201616215333214البوسترات-الدعائية-لمسلسل-أفراح-القبة-2
رواية نجيب محفوظ اللي تعتبر مخاطرة شديدة خصوصا لطبيعة العمل ؛ بس رغم كده العمل خارج بشكل كويس وخصوصا بنسبة الممثلين الكتير اللي فيهم ؛ بس نخص بالذكر مني زكي وصبري فواز وصابرين (اللي رغم السخرية من باروكتها فوق الحجاب)الا انها عاملة دور شديد البراعة وكذلك صبا مبارك ونخص بالذكر كمان : الديكور والتصوير لعبد السلام موسي و الموسيقي المميزة لهشام نزيه
مشكلة المسلسل للان هي ان اللي مقراش الرواية هيلاقي نفسه تايه فالاحداث بشدة ومش ماسكها بايده ويمكن ده بسبب انسحاب مؤلف العمل الاصلي (محمد امين راضي) قبل فترة قصيرة من بداية التصوير ؛ الاختبار هنا هو ازاي هيتجنب محمد ياسين اللخبطة دي ؛ وكذلك لهجة جمال سليمان احدي مشاكل العمل خصوصا ان الدور اللي بيأديه هو مصري صرف حسب رواية محفوظ

6- يونس ولد فضة

SLIDER0-1-1r9nixoobwerbv70qy5kfoo3nkpbqgehkfwao03knskk
عمل اخر للمؤلف عبد الرحيم كمال واخراج احمد شفيق …محاولة لعمل مسلسل درامي صعيدي كوميدي ؛  مشكلته انه بنا قصة درامية ولكن الكوميديا جز منها اشبة بمسلسل الكبير لمكي ..بس المسلسل يستاهل المشاهدة لحد دلوقتي .

 

7- بنات سوبرمان

384
مسلسل اخر كوميدي بس ليه روحه المختلفة واللي حقيقي بيضحكني معظم الحلقة ….بيحاول يقرب اكتر لروح الكوميديا الامريكاني في السف بس بايفيهات مصرية خالصة ونكرر اسم بيومي فؤاد في تاني عمل كوميدي اللي برضه هو احد اسباب متابعتي للعمل ده ونضيف الثلاثي الحلويات .. يسرا اللوزي و ريهام حجاج وشيري عادل

 

8- رأس الغول

مسلسل-راس-الغول-4
مكنتش متشجع ليه بس جربت اشوف حلقة عاجبني جدا …. تحس ان محمود عبد العزيز روحه شابه زي ايام الكيف وكوميديا لطيفة …يعيب المسلسل هو ان في مشاهد مطاردة الجرافيك بتاعها كان اسوء من السئ وكان يفضل انها تبقي حقيقة حتي باستخدام بدائل للممثلين ؛ كذلك السيناريو والحبكة فيها نفس روح مسلسل عمله محمود عبد العزيز من كام سنة اسمه باب الخلق …الاتنين مبنين علي مبدأ الصدف وسوء الحظ اللي بتحول مواطن لارهابي ؛ بس الفرق انه هنا هو ليه ماضي جهادي … من ميزات المسلسل جمعه لعدد كبير من الناس زي ميرفت امين وفاروق الفيشاوي ومظهر ابو النجا  والقلعاوي … وده في حد ذاته لطيف وكمان ممثلين شباب لطاف زي مصطفي ابو سريع

9- الطبال

الطبال

الحقيقة مش من متابعي امير كرارة … بس بصيت عليه لاني مهتم اشوف ممثلين زي خالد كمال و وليد فواز و كذلك مصطفي ابو سريع … والحقيقة لحد دلوقتي المسلسل مش بطال … الحلو طبعا اداء خالد كمال لشخصية قام بيها ماجد الكدواني في فيلم الفرح وكنت اشك حد يقدر يتخطاه الحقيقة ان خالد عمل ده لحد دلوقتي واتمني يحافظ عالمستوي لاخر المسلسل .

 

10-فوق مستوي الشبهات

فوق-590x332

 

يسرا خرجت اخيرا من عباءة المسلسلات الوعظية بحاجة ساسبينس كده بس لطيفة واخراج هايل من هاني خليفة وكذلك وجود شيرين رضا …بقالي سنين متحمستش لمسلسل ليسرا من ايام شربات لوز.

 

11-الميزان

54218

مسلسل لطيف وهادي …مع انه في جو اكشن حلو ؛ اخراج الحاجات الاكشن لما نزلت عالسوشيال ميديا حمستني اتفرج عليه بعيدا عن مسميات الفيديوهات بانها مشاهد اكشن هوليوديه ؛ الحقيقة ماحنا عندنا مخرجين كويسين اهو مش ضروري نشبههم بحد ؛ تاني اخراج لاحمد خالد موسي اللي شايف انه من اكتر المخرجين الجداد موهبة ؛ وطبعا المسلسل مليان اسباب تشوفه عشانها : غادة عادل وشيرين رضا وصبري فواز وبيومي فؤاد (للمرة العاشرة) وطبعا الموهوبة بشدة ناهد السباعي ومحمد فراج .

9- الخروج

575521cb21966
مسلسل مصري بروح مسلسلات امريكاني شبة true detective اكثر شئ شاددني لحد دلوقتي فالمسلسل هو اللوكيشنز واختياره …مشكلة المسلسل اوفرة الممثلين فاغلب الادوار

10- هي ودافنشي

Heya_Wa_Dafinshi-728x300
في مسلسلات بتتفرج عليها بدون سبب …او لسبب بعيد عن المسلسل نفسه ..انا عن نفسي بحب اشوف ليلي علوي فبشوف المسلسل عشانها فقط 😀

11-سقوط حر

maxresdefault

 

طبعا نيللي كريم كان من المميزين جدا جدا اخر 3 سنين عالتوالي لكن مشكلتي مع العمل رغم انه من اخراج شوقي الماجري وده مخرج من المفضلين عندي ؛ لكن مفيش حد يصمم يقعد 4 سنين بنفس الاسلوب حتي لو القصص مختلفة وتشد ؛ ممكن لو ممثلة تانية بتعمل المسلسل كنت هانبسط بيه ؛ بس انا هافضل قاعد مستني نيللي تتكلم بعد 3 حلقات صمت ؛ وفالاخر تعيط وتقول معرفش معرفش معرفش بصوت كل شحتفة …اتمني السنة الجاية تحاول تعمل مسلسل كوميدي تفصل بيه شوية …خصوصا انها ممثلة لسه عندها كتير جدا

 

12-مأمون وشرؤكاه

مأمون-وشركاه

عادل امام يظل عادل امام ؛ الحقيقة مش ببص عالقصص كده كده اخر 4 سنين هما هما مش بيتغروا وكاتبة يوسف معاطي نمطية للغاية  ؛ بس بنحب الراجل هنعمل ايه يعني لازم نتفرج طبعا

 

 

13- شهادة ميلاد

مسلسل-شهادة-ميلاد

 

ممكن يكون اتاخر كتير عن انه يكون بطل لوحده ويشيل مسلسل ..بس حقيقي طارق لطفي بقاله سنتين في تميز واجتهاد عظيم باين في اغلب المشاهد …يستحق المتابعة والاشادة

 

لمحبي متابعة الدراما الغير مصرية

14- ساق البامبو 

maxresdefault-1r6u6zoa7g8n7tpyga9f3m04drptgz9agt5qb6fyrutg

مسلسل عن الرواية الفائزة بالبوكر العربية من سنوات …دراما تقيلة والسيناريو للناقد المصري رامي عبد الرازق …ارشح العمل بقوة

 

15- سمرقند

KkV5ouRO_400x400

مسلسل بيدور في سمرقند عن حسن الصباح كبير الحشاشين واخرين …المسلسل مثير بس طبعا مشكلة المسلسلات التاريخية العربية لسه معندناش القدرة علي محاكاة التاريخ بشكل كبير فباستثناء بعض الملاحظات فالجرافيك او شكل المدينة ..هو مسلسل جيد الصنع