شخصيات أوعي تروح معاهم السينما

السينما طقس مقدس للكتير من الناس، بس الناس اللي بتحب الأفلام بجد، أما بالنسبة لباقي الناس فهم بيتعاملوا مع دخول السينما على أنه نزهة أو رحلة، ويجمعوا بعض ويروحوا الفيلم مجموعة كبيرة سوا، وده ساعات بيكون لطيف، بس ده في حالة أنهم داخلين السينما عشان يتفرجوا عليه فعلا مش عشان يحللوه ويحولوا حياة حد جي بيتفرج فعلا الي جحيم، عامة وانت رايح السينما، لازم تختار اللي هيتفرج معاك على الفيلم، ولازم تتجنب شخصيات بعينها تاخدها معاك.

• الرغاي

الشخص الرغاي.. هل تظن أن وجوده في السينما هيمنعه من أنه يمارس هوايته المفضلة ويتكلم أثناء الفيلم، لأ عادي هيتكلم، وهتقوله أكتر من مرة أسكت ومش هيسكت، وهتحرج نفسك اذا حد وراكم أو قدامكم لفت نظركم، م انت أكيد هترد عليه مش هتنفض له يعني، وساعتها يبقى الفيلم راح عليك وأحرجت نفسك وخسرت الشخص الرغاي ده لأنك على نهاية الفيلم أكيد هتفقد أعصابك

• اللي شاف الفيلم

ممكن يحصل معاك الموقف بمنتهى السهولة، واحد صاحبك شاف الفيلم بالفعل، وعجبه، ونصحك بيه وشجعك وقالك تعالي نروحه تاني سوا، فحماسه انه يدخل فيلم دخله قبل كده يشجعك ويخليك تخمن ان اكيد الفيلم حلو، بس لما توصل معاه السينما والفيلم يبدأ تفهم الفخ اللي وقعت فيه، حماس كتير بقى، وكل شوية “بص.. بص”، ويحرق لك احداث مهمة في الفيلم، هتكره الفيلم ومش بعيد تخسر صاحبك ده فمفيش داعي.

• المغصوب

ساعات لما بيكون اتنين مرتبطين، وحد منهم بيحب يروح السينما والتاني لأ، بيحصل نوع من انواع الضغط، يفضل اللي بيحب يروح السينما يضغط على التاني عشان يروح معاه، خاصة لو اللي الطرف اللي بيحب السينما ده البنت، وتستخدم كل وسائل التعذيب وتقوله يعني لو مجتش معايا هروح مع مين، فيضطر الطرف التاني يروح  غضب عنه، وفي الحالة دي صدقني لما هتروح مش هتتبسط، هيقعد يفرك، ويتأفف ومش هيخليك تستمتع بالفيلم خاصة لو كان حد بيحب يتريق فممكن جدا يسخف لك الفيلم بسهولة.

• المزعج

وده الشخص اللي بيحب السينما بس بيعتبرها رحلة أكتر من كونها فُرجة على فيلم، وتلاقيه كل شوية بيفتح كيس شيبسي والسينما كلها هادية ويقعد يقرمش طول الفيلم، ويضحك بصوت عالي جدا واوفر، ويجي له تليفون يرد عادي، و كل شوية يغير قعدته ويغطي على اللي وراه ميخلهوش يشوف، الشخص ده اللي لما انت بتروح لوحدك بتبقى تتمنى ان حد يجي يخرجه من السينما، فليه تعمل في نفسك كده وتروح معاه.

• الامهات 

الامهات اللي بتقرر تاخد اطفالها معاه السينما اللي بيفضلوا يعيطوا الساعتين كاملين فلا نستمتع بمؤثرات الفيلم الصوتية ولا نفهم حاجة منه ولا بنطيق حياتنا اصلا بعدها …أرجوكم تعالوا من غيرهم

عشان كده، دايما وانت رايح السينما مش شرط اللي يروح معاك يكون شخص مقرب منك او يكون صديقك، المهم انه يكون بيحب السينما زيك ورايح عشان يركز و يتفرج وينفصل عن العالم تماما.