بما اننا في الصيف، والصيف يعني سفر، والسفر يعني بحر، والبحر يعني مايوه، لازم تعرفي ان شكل مايوهك مهم جداً، مش بس لإنه بيعكس ذوقك وستايلك، لأ ده لإن شكل مايوهك المفضل كمان بيكشف شخصيتك، تعالي وانا اقولك ازاي..

1- البيكيني الـ”edgy cut

لو الشكل ده من المايوهات هو المفضل ليكي، فا انت شخصية بتحب دايماً تكون مميزة وتجذب الإنتباه في أي مكان تدخله، ده غير إن ليكي طلة كدة تسحر أي حد، عندك أصحاب كتير ومعجبين أكتر، وده لإن كل اللي بيعرفك بيحبك.

2- التانكيني “Tankini

البنت اللي بتفضل المايوه التانكيني تعتبر واحدة من البنات اللي بيتميزوا بالطيبة والتواضع، لكن ده مش معناه ابدا أنها “هبلة” أو بيضحك عليها، لإنها بتعرف كويس قوي ازاي وامتى ومع مين متبقاش كدة، اما في الحب بقى فا تعتبر من أكتر الشخصيات جرأة، وده لإنها على الرغم من إنها عارفها حدودها كويس قوي، إلا انها بتعشق المغامرة.

3- الـ”Bandeau

بالنسبة للبنت اللي بتفضل الشكل ده من المايوهات، فتعتبر واحدة من الشخصيات اللي بتعشق الحرية ومش بتحب القيود، ده غير انها بتتميز بشخصيتها القوية والمستقلة اللي بتخليها تقدر تعتمد على نفسها في كل تفاصيل حياتها من غير ما تحتاج حد .. من الاخر يعني “strong independent woman”.

4- القطعة الواحدة “one piece

على الرغم من ان المايوه القطعة الواحدة ده يعتبر واحد من التصميمات الأكثر شعبية، وأن صاحبته ممكن تبان وكإنها بنت تقليدية جداً، إلا إن ده مش صحيح، الحقيقة هي ان البنت اللي بتفضل النوع ده من المايوهات تعتبر شخصية صريحة، واثقة في نفسها، مالهاش في المجاملات ومش بيهما رأي حد فيها، بتحب البساطة ومالهاش في التعقيدات.

5-البيكيني “ Bikini

اما بقى عاشقات البيكيني، فهما شخصيات بتتمتع بقدر عالي جداً من الثقة بالنفس، عارفين قيمة نفسهم ومبيسمحوش لحاجة او حد يهز ثقتهم بنفسهم، لكن للأسف لازم ياخدوا بالهم لإن ثقتهم الزايدة دي ممكن ناس كتير تعتبرها نوع من أنواع الغرور.