كتابة: منى المتيم

 كل واحد فينا فيه شويه صفات كده بتضايق الناس اللي في حياته، دي حقيقة محدش فينا يقدر ينكرها ومش تقليل ابداً من نظرتنا لنفسنا، بالعكس دي طبيعة بشرية معترف بيها، أصل محدش فينا خالي من العيوب يا جماعة.

 المدهش بقي أن الصفات الوحشة دي، واللي بتضايق الناس منك أو مني، هي في الحقيقة دليل على الذكاء والعبقرية.

 وبيني وبينكم كده ممكن حد فينا يكون “آينشتاين”  التاني وأحنا مش واخدين بالنا، وعلى فكرة ده مش كلامي، دي نتايج قالتها مجموعة من الدراسات العلمية الحديثة واللي قاموا بها مجموعة من علماء النفس.

والصفات دي هنقولكم عليها النهارده في المقالة دي

لو بتقدر تستفز اللي حواليك

لو أنت بتقدر تستفز اللي حواليك بسهولة، مش معني كده أنك رخم أو دي حاجة وحشة فيك، ،  ابسولوتلي نوت، ده دليل قوي على ارتفاع معدل ذكائك.

 وطبعاً ده مش كلامي، أنتو تصدقوا عني أن أنا أقول كده!!!!،  لا طبعاً، ده كلام العالم ستانلي هنتر، واللي أكد في دراسته أن الأشخاص اللي عندهم حس استفزازي هما من الأشخاص اللي عندهم نسبة ذكاء عالية.

الكائنات الليلة أو خفافيش الظلام

خفافيش الليل أو حبايب الليل وآخره، سموهم زي ما تسموهم مش هاختلف معاكوا، اللي اقصدهم الناس اللي زيي وزيك كده، الناس اللي مابتعرفش تنام بسهولة وبتفضل السهر بالليل.

 والحقيقة أن ده في حد ذاته دليل قوي على الذكاء والعبقرية، عشان كده دايماً علماء علم النفس في الدول الأوربية ينصحوا الناس دي أنهم يستثمروا الوقت ده في أي حاجة مفيدة.

لو أنت بتحب البلاي ستيشن PS

وكمان البلاي ستيشن و الفيديو جيمز. مش طلع مجرد لعبه بنضيع فيها وقتنا والسلام، لا بالعكس، البلاي ستيشن من الحاجات اللي اكتشف العلماء أنها بتوسع الإدراك والمهارات المعرفية والتفكير، وكل الحاجات دي بتزود نسبة الذكاء عند الأشخاص.

عرفتوا ليه بقى بنحب البلاي ستيشن وأحنا مش واخدين بالنا

لو أنت شخص فوضوي أو عشوائي

 روح يا فوضوي، تعالى يا عشوائي، في الحقيقة لما كان حد يقولنا زمان كده، كنا بنزعل ونأخد على خاطرنا، لكن اكتشفنا بعد كده أنهم بيمدحونا مش بيشتمونا يا جماعة

وده طبعاً اللي اكتشفوه علماء من جامعة غرونينغن العالمية في دراسة ليهم سنه 2012، واللي أكدت أن الأشخاص اللي دايماً بيحاولوا يحافظوا على نظافة مكاتبهم معندهمش حس ابداعي أو قدرة الابتكار بتكون قليلة شوية، بعكس الأشخاص الفوضويين واللي قالت نفس الدراسة عنهم بردوا أنهم من الأشخاص الأكتر ذكاءاً في العالم.

لو بتقدر تضحك اللي حواليك :

وده اللي أكده البروفيسور جيل غربنغروس أستاذ علم النفس بجامعة أبيريستويث من خلال دراسة عملها، وكانت نتائجها بتقول أن الأشخاص اللي بيقدروا يضحكوا الناس اللي حواليهم ربنا ميزهم بقدرات إبداعية وذكاء ومهارة في رسم الضحكة على وشوش اللي حواليهم ، وده- في حد ذاته- دليل على الذكاء والعبقرية.

لو ماتفرجتش على أفلام 18+

لو أنت ماحاولتش تتفرج على أفلام 18+ وأنت في سن المراهقة،  وشايف أن كل حاجه هتيجي في وقتها، فده في حد ذاته دليل على الذكاء الحاد والعبقرية.

لو بتبالغ في الحلفان وأنت بتتكلم

أه والله، ماتستغربش، ده اللي قالته دراسة عملها باحثين في أمريكا سنه 2014 ، واللي أكدت نتايجها أن الأشخاص اللي دايماً بيقسموا أو بيحلفوا في كلامهم  عندهم نسبة ذكاء عالية جداً بالمقارنة للأشخاص التانينن.