لأنك في الأول قد إيه كنت مهتم بيها وفجأة بقيت عادي إنك تقعد وقت كبير مش بتكلمها و لما تكلمك ترد على قد سؤالها وبقيت تطلب تخرج معاها كل فين وفين فكل ده طبعًا بيحسسها إن حبك ليها قل.
تعرف بنت تانية
إن في بنت تانية شغلاك وإنت ناوي ترتبط بيها وهى خلاص بقت حمل عليك وقصدت إنك متهتمش بيها عشان تضايق وتبعد عنك من نفسها.
القهوة شغلاك
القعاد على القهوة، البلاي ستيشن، أصحابك، الشغل. هى بتشوف إن إنت مش مهتم بيها عشان شغلاك الحاجات دي و مش معنى كدة إنها أنانية. وعايزاك تبقى ليها لوحدها بس لأ دي عايزاك تديها نفس الإهتمام اللي بتديه للحاجات التانية مش تهملها وكأنها مش موجودة في حياتك.
حاجة مضايقاك
لما بتيجي تسألك مالك متردش وده بيخليها تحس إنك حتى مش عايز تقول اللي مضايقك عشان تقدر تساعدك في إنك تتخطاه حتى لو كانت هى مضايقاك تشوف ضايقتك في إيه وتصلحه.
فـ ليه تخلي دماغها تروح وتودي وتأنب نفسها وتقول هو أنا ضايقته في حاجة وتحاول تعصر دماغها عشان تسترجع كل الكلام اللي دار ما بينكوا يمكن قالت حاجة ضايقتك عشان كدة إنت مش مهتم بيها .
وبعد لما بتفتكر الكلام بتلاقي إنها مقلتش حاجة بالعكس كل كلامها ليك بيعبر عن حبها ليك وده بيخليها يصعب عليها نفسها في إنها بتعاملك بحب وإنت بتقابل حبها بعدم إهتمام.
ممكن تبص على الموضوع إنها مكبراه شوية بس عايزة أقولك إن الأنثى حساسة بطبعها فإحساسها إنك مش مهتم بيها ده بيكون في الغالب صح.
وعليك إنها لو سألتك إنت مش مهتم بيا ليه تصارحها وتقولها ومتسبهاش زعلانة منك مضيعوش وقت في الزعل إنتوا مفروض ارتبطوا عشان بتحبوا بعض.
والحب عشان يكمل على خير لازم لو أي زعل حصل ما بينكوا تصالحوا بعض على طول عشان الحب ما بينكوا يفضل متماسك ميتهزش أبدًا. حافظوا على بعض
