منى المتيم
” ده حب بقي يا هدى ” .. الحب زمان كان ليه وضع مختلف؛ الكلام الرقيق والعيون اللي بتلمع أول ما تشوف حبيبها، وده طبعاً قبل ما ندخل عصر الفيس بوك و ” الكراش او crush ” والحاجات الغريبة دي … دلوقتي بقي انسى الكلام اللي فات، لأن كل حاجة بقيت بتتعمل على الفيس بوك .. حتى الحب.
واللي لسة ميعرفش يعني ايه ” كراش ” هو الشخص اللي معجب بيك وبيحاول يتقرب منك .. وأنت يإما مش واخد بالك .. يإما مش معبره وحاطه في الفريندزون.
النهارده، هانخليك تعرف مين الشخص اللي بيكراش عليك، وفي جواه مشاعر ليك وأنت ولا أنت هنا
- الشخص اللي دايمًا بيبعتلك رسايل على الفيسبوك:
دايماً الشخص اللي بيحاول يكراش عليك تلاقيه بيبدأ هو بالكلام معاك على الفيسبوك .. يحاول يخترع أي حجة عبيطة لمجرد أنه يتكلم معاك .. شوفت اللي حصل النهارده .. ايه البوست اللي أنت كاتبه ده ..قلقلتني عليك .. أو ممكن بردو تبعتله ايموشن بيعيط وتقوله ممكن منديل … وهكذا
وديما الشخص ده بيكون مهتم بيك وبأمورك جداً، ومش بعيد يكون وقع في حبك، وأنت ولا أنت هنا بردو.
- هتلاقيه ناحية الحياة الشخصية أكثر:
دايماً هتلاقي الشخص اللي معجب بيك أو بيحاول يكراش عليك بيروح بأسئلته ناحية حياتك الشخصية – حتى لو كنتوا بتتكلموا في الشغل الأول – دايمًا بيبان من أسلئلته أنه عاوز يعرف أكتر عن حياتك الشخصية، كأنه بيحاول يدور جواك على الحاجات اللي أنت مخبيها عن كل اللي حواليك.
- أهم حاجة التفاصيل :
الاهتمام بالتفاصيل .. وده في حد ذاته دليل على الاهتمام والإعجاب في أوقات كتير، كأنه عاوز يشارك كل دقيقة في يومه معاك، حتى لو كانت تفاصيل بسيطة، هي بالنسباله مهمة لأنه يشاركها مع الشخص الي جواه مشاعر ليه.
- التلميحات :
هتلاقيه ديماً بيلمحلك في كلامه انه معجب بيك وأنك حد جميل .. مفيش منه على وجه الأرض (ما تصدقوش طبعاً J) ، وغير انك هتلاقيه أول واحد بيعملك لايك وكومنت على اي بوست ليك على الفيسبوك .. حتى لو عطست J ، هيكون شايف أن ده حدث فني جميل وبيقول أنك شخص مفيش منه .. تخيل .. مش بيقولوا مراية الحب عامية !!!
