من اكتر المواقف االى بتخوف بعض الولاد والبنات -بس الولاد اكتر- هى “انا فريدندزوووند يا معلم!”وبتبقى حاسس بحرج كل ما تشوف الشخص اللى حطك في الفرندزون …طب انا هخرجك منها لا ومش بس كده انا هاخليها توافق بيك …توافق بيك ايه يا معلم انا هاخليها تجرى وراك وانت بقى حطها في الفرندزون…
1-بص مبدئيا كده فكك من جو “خلف الدهشورى” اللى انت عايشلى فيه ده انساااه خالص كدة، انت مش اشيك واحد في الجامعة، وخالك معندوش مصنع صنادل، و”غادة عادل” مبتحبكش على فكرة!!
2-حاول تقعد معاها اكتر وتعرف عنها اكتر وعرفها بنفسك اكتر.
3- حاول تغير من ستايلك للافضل …بلاش ستايلات 2008 اللى انت عايش فيها دى الحزام ابو توكة كبيرة ،والسوالف العريضة ،ورفع ياقة القميص كل دى اسباب انك فى الفرندزون اصلا.
4-متحسسهاش انها ماشية مع “سوما العاشق” مش لازم كل 2 متر تقولها مجاملة …ده مش هيفيدك، استنى هيا كمان تجاملك وتشكر فيك!
5-اتصرف بطبيعتك بلاش شخصية سفاح المعادى الى انت متقمصها دى، على عكس المعتقد ان معظم البنات بتحب شخصية الباد بوى وكدة … فى بنات بتحب الجود بوى برده، فمش لازم تخشلها وتعمل مدمن كوله والجو ده… فاكس خليك بين الشخصيتين دول.
6-لو انت مسمى نفسك على الفيس بوك (احمد رامبو او العشق الاخير او انتى حياتى…) صدقنى الارتيكل ده مش هيحل مشاكلك للاسف، وهبقى كداب لو قولتلك ان فى مخلوق يقدر يساعدك.
7-اوعى تتجنن وتقولها انتى زى اختى اوعى! .. ده لو عايز تخرج من الفرندزون يعنى.
8-لو هى قالتلك انت اخويا والنظام ده اعمل نفسك مسمعتش حااجة وتجاهل كلامها ده تماما.
9-مش لازم كل كلمة تقولها هى انت توافق عليها اعترض وقول رأيك، بس متبقاش غتت يعنى وجو انا جى اعترض وخلاص ده.
10- برده ابعد عن انك تكتبت بوستس الكئيبة على الفيس بوك وكل 5 دقايق تكتب انك رايح تنتحر،وتقعد تقلبلى البروفايل بيكتشر سودة، وبلاش برده نظام انا بقيت اقوى من الاول وعدت للحياة من جديد لانتقم منك والبوستس الغامضة اللى اخرها مقصودة، كل ده هيخلى الناس تشك في سلامة قواك العقلية ….
11-متقعدش طول اليوم تفكر فيها وتعيط على حظك لا …فكر في خطة وحاول تحببها فيك.