لكل الناس المستقلة الطاحنة نفسها شغل وعمرها ما بترتاح ولا بتفكر تفصل او تعمل حاجة تانية في حياتها؛ احب اقولكم في حاجات هاتندموا عليها…
اكيد برافو.. نجحتم و اجتهدتم و اتعلمتوا الاكتفاء بنفسكم و عدم احتياجكم لحد… اتعملتوا ازاي تكملوا في حياتكم و ازاي تقوموا تاني بعد ما تقعوا.. وكل ده من غير مساعدة حد…
ده انجاز علي فكرة؛ ومتسمحوش لأي حد يحاول يقلل من اللي عملتوا واللي وصلتوله..
بس الحقيقة اللي مش كتير بيوصلها الا متأخر ان لازم تعملوا توازن في حياتكم عشان تقدروا تكملوا صح ومن غير التوازن ده هاتقعوا… و التوازن ده بيختلف بين ناس و التانية, يعني في بيحتاج توازن بين شغل و حياة اجتماعية, و في اللي يحتاج يعمل توازن بين حياة عائلية و مشروع ما, و هكذا…
لو سألتوا مجموعة من الستات و الرجالة اللي في مختلف الاعمار اللي اشتغلوا من بدري, هايقوقولكم نصائح معينة محدش قالولهم عليها و لقوا نفسهم بيتمنوا لو قدروا يعملوا الحاجات دي بدري شويتين :
ادي شغلك حقه.. مش اكتر من حقه
اكيد سمعتوا عن اللي طحن نفسه في شغل و لما وقع ملقاش تقدير!؟ فحاولوا مهما كنتم بتحبوا شغلكم متيدهوش اكتر من حقه… و اتأكد ان اجتهادك في عدد ساعات العمل بس هو المقياس علي نجاحك مش اكتر.. مدير اجنبي مرة قاللي انه بيستغرب في مصر لما يلاقي ناس بتتأخر في شغلها و انه بيستغرب اكتر من ان بعض المديرين بيعتبر ده نجاح, لكنه في الاصل فشل… و في مثل اجنبي برضه بيقول حب عملك بس متحبش مكان عملك عشان انت متعرفش مكان عملك هايبطل يحبك امتي!
في حاجات في الحياه غير الشغل و النوم علي فكرة
و ده مترتب نوعا ما علي النقطة الاولي, لو في تأخير في الشغل اكيد جسمك هايكون تعبان و مش هاتعملوا حاجة غير النوم… حتي اللي بيخلص في معاده و بيفضل ميخرجش هايحس بعدين ان في حاجات كتير كان ممكن يعملها… كان عندي واحدة زميلة بتنام من الساعة 8 بعد ما بتخلص شغل, طبعا دي حاجة صحية النوم بدري لكن لما ابتدت تخرج كانت بتقولنا انها اكتشفت حاجات كتير بتحصل في العالم بعد الساعة 8 بالليل و انها كانت فاكره انها لما تخرج مش هاتقدر تكمل يومها في الشغل تاني يوم, لكن طلعت غلطانة و انها لما بتخرج بتكون فايقة تماما تاني يوم و بتحس ان في تغيير… و علي فكرة استغلالك للوقت بعد الشغل مش لازم يكون في حاجة مفيدة, يعني مش لازم تاخد كورس او تذاكر مثلا, مجرد انك تتمشي في مكان مفتوح ده هايفيدك اكتر مما تتخيلي او تخرجي مع ناس تضحكي ده هايفرق كتير قوي..
محدش يعرف تفاصيل حياتك الشخصية
دي القاعدة رقم واحد و لازم نكون فاكرينها دايما… مش بس كده ده الافضل كمان ان يكون مفيش علاقات شخصية في الشغل لان قليل قوي لما تلاقي مفيش ضرر من الموضوع ده… حتي لو صدف و لقيت نفسك في علاقة مع حد تعرفه شخصيا, افتكر ان في الشغل مفيش مجاملات, مفيش تجاوزات, مفيش استثنائات… و من اكتر النصائح اللي كتير قالوها, خصوصا لما تبتدي شغل جديد و كل الناس تحاول تعرف كل حاجة عنك, ابعد حياتك الشخصية تماما من الاول هايفهموا انها قاعدة و مش هايحاولوا تاني.
حاولوا متقعدوش في نفس المكان حياتكم كلها
انا ممكن افهم من الناس اللي بتفضل في مكان شغل واحد طول حياتها, ان دايما في جديد في الشغل و انهم بيستفادوا او مرتاحين بالمرتب او حاسين بالأمان لدرحة انهم معندهومش حتي النية انهم يغيروا… لكن في بعض منهم اتحط في ظروف انه لازم يغير مكان شغله, و فجأه لقي نفسه ان مستواه الوظيفي مفيش فيه جديد من سنين او حس فجأه ان خبرته طول السنين اللي فاتت كانت في حاجة واحدة بس او مكان واحد بس.. و انهم اتحولوا من غير ما يحسوا لموظفين ارشيف.. محدش عارف بكرة في ايه و عشان كده لازم الواحد يفكر في احتمالات كتير قوي في مستقبلك و خصوصا مستقبلك الوظيفي… طول ما انت حاسس بالامان في شغلك مش هاتطور من نفسك, طول ما انت قاعد في مكان واحد هاتخسر خبرات تانية كتير رفضتها لمجرد انك مش عايز تجازف… جازف دلوقتي عشان ممكن يجي وقت ميكونش ده اصلا اختيار موجود قدامك.
الأجازات مش عيب علي فكرة.. دي حقك
كل الشغل اللي في الدنيا طول ما هو رسمي يبقي اكيد في اجازة,الشغل او المدير اللي يحسسك انك بتطلب حاجة مش من حقك او بتطلب معروف يبقي مش عارف شغله… لازم تتأكد ان الاجازة حقك الطبيعي و مش عيب انك تاخد اجازتك طول ما انت مش مقصر في شغلك… يعني تخيل وانت بتمضي عقدك يبقي مكتوب فيه مفيش اجازات! او طول ما انت عايش عمرك هاتقضيه حصري معانا! و علي فكرة المدير الناجح اللي يبقي متأكد ان الشغل مابيقفش علي حد… خد اجازتك من غير تأنيب ضمير و كمان متمارسش شغلك في اجازتك (لو احنا واخدين الاجانب قدوة فهما بيعملوا كده علي فكرة).. سافر قضي وقت مع عيلتك او اعمل حاجة مختلفة عن شغلك ايا كان.
العائلة تأتي اولا
سمعت عن مدير البنك اللي ماحسش بحياته اللي قضاها في الشغل و ماحسش ازاي بناته كبروا كده و اتجوزوا امتي.. في حاجات كتير هاتفوتك هاتتمني لو بس تفتكر حصلت امتي و هاتتمني انك تعيشها تاني و تديها وقتها من غير استعجال… في الاول هاتعيش سعيد بنجاح في شغلك مش كتير بيوصله و هاتحس انك عملت كل حاجة زي ما انت عايز بالظبط… لكن كل ده هايتغير بمجرد ما تحس ان عيلتك مش محتاجاك لأنهم عاشوا من غيرك… و احتاجوك و مش كتير لما كنت بتبقي موجود عشانهم… الدنيا بتلف و هاتكون في مكانهم و مش هاتحب الاحساس اللي وصلت نفسك ليه.
احسن مشروع هاتشتغل عليه هو مشروعك انت
و احسن نجاح هاتحسه و تعيشه هو نجاح حاجة انت عاملها بأيدك و عامل دراسة الجدوي بتاعتها و عارف تفاصيلها من الاول للأخر.. ناس كتير بتقول لو الوقت رجع بيها كانوا استغلوا جزء صغير جدا من الوقت اللي ضيعوه في شغل زيادة في انهم يعملوا مشروع خاص بيهم, و كتير قال ان كان زمان مشاريعهم بقت حاجة كبيرة و معروفة دلوقتي… بغض النظر عن حجم اللي انت عايز تعمله, كل حاجة ليها اول و طريق الاف ميل بيبدأ دايما بخطوة, لكن تاني في ناس فضلت انها ماتجازفش لما حست بالامان في شغلها و افتكروه حاجة دايمة… و دول من الناس اللي هانتكلم عليهم في النقطة الجاية.
مفيش حد اتولد من غير موهبة
في كتاب يوميات نص الليل للدكتور مصطفي محمود بيقول فيه (نحن في العادة نموت قبل أن نكتشف مواهبنا وقبل أن نتعرف على مميزاتنا .. نموت بحسرة أننا أناس عاديون .إن أم كلثوم كان من الممكن ألا تكتشف صوتها .. وكان من الممكن أن تضيع كأي فتاة قروية تسرح في الحقل وتقضي حياتها تربي الدجاج وتطعم البط .. لولا أن اكتشفها الملحنون واحتضنوا صوتها, و كمال الطويل ضاع نصف حياته في محاولة الغناء قبل أن يكتشف أنه ملحن وعبد الحليم حافظ ضاع نصف حياته في محاولة التلحين قبل أن يكتشف أنه مغن .من قبل أن يكتشف كل واحد من هؤلاء الثلاثة موهبته كانوا جميعاً مجرد أناس عاديين .. ولكن الحقيقة أنهم لم يكونوا أبداً عاديين .. وإنما كل واحد منهم كان من البداية عنده هذا الشيء الذي ينتظر معجزة الكشف عنه)
كلنا عندنا موهبه بس في اللي بيكتشفها و في اللي بيموت من غير ما بيحاول حتي…و الغريب ان لو بس الانسان يعرف قد ايه موهبته سبب في سعادته مش هايبطل يحاول يكتشفها.. يعني كان في واحدة مديرة شركة عندها حب للفضة جدا و فجأه لاقيناها سابت شغلها و فتحت ورشة بتعمل فيها شغل فضة؛ و لما سألناها قالت دي احسن حاجة عمتلها و كان لازم تاخد القرار ده من زمان… و واحدة تانية لما قعدت في البيت عملت مشروع للأكل و نجحت في جدا عشان عندها حب للطبخ برغم انها كانت في وظيفة بنات غيرها يحلموا بيها… و غيرهم كتير
الوقت مش متأخر انكم تراجعوا نفسكم في الحاجات دي
مهما وصل سنك و مهما عدي من وقت بتقول لنفسك كمل في طريقك؛ راجع نفسك انت متعرفش قرارك ده ممكن ينتج عليه ايه و متعرفش انت علي بعد قد ايه من السعادة.
