للرجال فقط

كتابة: منى المتيم

على الرغم من أن الستات هي فاكهة الدنيا اللي مانقدرش نعيش من غيرها، إلا أن الحقيقة بردو في ستات نكدية، أيوة والله، زي ما بقولك كده، بالنسبة للأخت اللي بتعترض هناك ، شششش أيوة في ستات نكدية اقعدي بقى.

 وعشان كده  في مقالي ده بكلم الرجالة، النهارده هنقولكم سر الخلطة، إزاي تنكد على الستات النكدية في عدة خطوات

رقم 1: متردش مع ابتسامة بلهاء

خليك ناصح وذكي، أكيد هي مجهزة ردود لكل الحجج اللي ممكن تقولهالها في الوقت ده، عشان كده أحسن حل لما مراتك او حبيبتك تيجي تتخانق معاك، متردش مع ابتسامة أحمد حلمي في فيلم الناظر.

يعني مثلاً لما تقولك أنت مابقتش تهتم بيا زي الأول، أنت أكيد تعرف واحدة غيري، زي ما اتفقنا ” ابتسامة احمد حلمي و قولها ” اه” على سبيل أن الموضوع تافه ومش مستاهل انك تتكلم فيه.

رقم 2: حاول تغير الموضوع وتتكلم في أي حاجة

يعني مثلاً ممكن تقولك أنت ليه ما سألتش على ماما ليه، أنت مش عارف أنها تعبانة؟ أوعي بقى .تجادل معاها وتقولها مانا لسا كنت عندها والحوارات دي

أنت أول ما تكلمك في موضوع مش عجبك، هوووب روح أنت داخل على موضوع تاني على مزاجها، زي مثلاً “مش أنا سألتك على الخاتم اللي كان نفسك فيه ولقيت تمنه مش غالي”، هتنسى حوار ماما وتلاقيها بتتكلم معاك في الموضوع الجديد، عشان زي ما انت عارف الستات مش ماديين خالص.

رقم 3: خد الموضوع على صدرك

سيبها تتكلم تتكلم ، وامسك في كلمة مش عجباك، هوووب اقلب الطرابيزة يا معلم، زعق واتنرفز وانفخ عروقك، عرفها قد أيه هي جات على كرمتك وجرحتك في مشاعرك، ساعتها هاتخرج من الموضوع زي الشعره من العجين #فكر_شيطاني_لعين.

رقم 4: طريقة سابَلو

 سواء كنت رومانسي أو مش رومانسي،  الطريقة دي لازم تستعين بيها في أوقات معينة، يعني مثلاً لو لاقيتها قالبه على نكد والموضوع ليه علاقة بالاهتمام أو المشاعر، يبقى ماقدمكش غير Plan B يا معلم.

سيبها تزعق وهوب قرب عليها واعمل أي حركة من اللي بتحبها، مثلا قرب عليها خدها في حضنك، امسك ايدها، قولها كلمة حلوة، هتلاقيها دابت معاك زي البسكوت في الشاي.

رقم 5: اهرب يا ياسين

أول لما تلاقي مراتك شكلها كده قالب نكد واليوم شكله مش هايعدي بسلام، اسلم حل في المواقف دي، أنك تعمل نفسك “مقموص”  أيوة واهرب وسيب البيت واقفل تليفونك، ساعتها دماغها هاتفضل تودي وتجيب، ولما ترجع هتحاول تصالحك، اعمل نفسك مقموص شويه وبعدين صالحها واجري على شغلك قبل ما تفكرلك في حاجة جديدة.

 من الآخر، على قد ما في ستات حنينة وبتعرف ازاي تحتوي  اللي قدامها، على قد ما في ستات مابتعرفش تعبر عن مشاعرها، يمكن الحلول دي تقدر تغيرها ولو ماتغيرتش، اديك هربت من الخناقة يا معلم.