إحنا الصنف الأكثر تكاثرا في الأرض، إحنا المدخنون نزيد يوميا بشكل كبير،وكمان إحنا بنحترق من أجل الأخرين حرفيا بسبب الضرائب على السجائر فلو إحنا كنا من اصحاب الرئة السودة لكن لينا ايادي بيضاء على كل الناس شوفوا كام مستشفى اتعملت بفلوسنا عموما إحنا نعمل في صمت وما بنحبش نتكلم عن نفسنا.
أعزائي المدخنين الجدد التدخين زي السواقة ذوق و اخلاق وقواعد ومن أجل حياة سالكة مش مكتومة ولا منفسه مع التدخين في شوية قواعد تحطوهم حلقة في ودانكم.
1– كلنا إشتراكيين.
عيب أوي لما تكون مدخن وأي عابر سبيل يوقفك في الشارع ويقولك ” ممكن سوجارة” وتقوله لاء، زي ما المثل بيقول ” المية ماتفوتش ع العطشان” في كمان مثل بيقول ” التبغ ما يفوتش ع الخرمان” سجايرك مشاع للي يطلب.
2 – قواعد القعدة الحلوة
قاعد ع القهوة مع اصدقاءك في رسائل شفرية ميعرفهاش غير المدخن الأراري يعني مثلا علبة السجاير لما تتحط ع الترابيزة معني كدة إن العلبة مشاع ومن الحق الكل يشارك فيها ” إنظر للقاعدة الاولى” لكن لو في حد طلع العلبة من جيبة وولع لنفسه سيجارة من غير ما يعزم وحطها في جيبه تاني، إعرف إن علبته ملكية خاصة وقدامك حل من اتنين يإما تنسى إنه بيدخن أصلا، أو إنك تعزم عليه بسجارة من معاك فيبقى مجبر يعزم ع الكل أو يسيب العلبة على الترابيزة.
3 – لولا إختلاف الأذواق لبارت السلع معروفة دي
مش معنى إن صاحبك بيدخن سوبر وانت بتدخن مالبورو إنه طمعان في علبتك ولا غنه ها يفضل طول القعدة بيبص لها بصه حمدي الوزير عايز يستفرد بيها هو كيفه كدة صدره بيصهلل بالسيجارة السوبر وشايفها أعظم إختراع في العالم بعد الواي فاي، فبلاش تحسسه إنك قاعد قدام مغتصب أطفال.. عيب.
4- سن المراهقة
التدخين درجات ومراحل زي الحياة بالظبط:
مرحلة الأطفال: وده اللى بيروح يسحب من الكشك سيجارتين تلاتة فرط يقزقز فيهم طول اليوم.
مرحلة المراهقة: وده بقى سن خطر ومتعب لأن المدخن فيه بيكون هوائي ولعبي ومش قد المسئولية وده بتلاقيه كل يومين مع علبة شكل، يجيب إل أم يزهق منها بعد يومين وتلاقيه شابك في دراعة علبة كنت وبعدها يمشي مع علبة ميريت، ده مراهق سيبك منه بكرة يكبر بعد ما صدرة يصفر.
مرحلة الشباب: وده الشاب بيبقى حاجة كدة نص سوى بيدور على السجارة الحامية أوي أو الخفيفة أوي ويعمل فيها عنتر زمانة و يفضل يحرق لحدة ما وشه يحمر بس هو كدة حط رجله على اول طريق النضج.
مرحلة النضج : هنا بنفتكر كلنا أغنية محمد منير ” بعد مالف وبعد ما دار.. بعد ما هدى و بعد ما سار.. بعد ما داب و إشتاق وإحتار” بيكون المدخن عرف شريكة حياتة اللى هاتعيش معاه في قفصه الصدري للأبد و استقر عليها وبقت العلاقة ما بينهم علاقة حب وجواز كاثوليكي.
5- التغيير إستثناء يثبت القاعدة
صاحبك أبو سيجارة سوبر من حقه إنه يسحب من علبتك سيجارة أو اتنين او أكتر كمان.. أولا هو مش مغرم بسيجارتك لانه خلاص استقر ودخل في علاقة الجواز الكاثوليكي مع السيجارة المفضلة ليه، بس زي ما كلنا عارفين النزوات خطر ممكن يدق الباب في أي وقت.
6 اللف للحريفة
من فترة رجعت السجاير اللف تاني.. ودي بقى قصة لوحدها بس نصايح لو كان صاحبك غاوي لف:
ماتروحش تقوله لفلي سيجارة.. مش ورق عنب هوه.. بتعرف تلف لف لنفسك ما بتعرفش يبقى استنى هو يلفلك.. السيجارة يعني أو يعرض عليك يلفلك.. السيجارة برضوا من غير ما تطلب.
ثانيا : ماتبعش نفسك.. مش من سيجارتين تكسر حصلتك وىتزل تشتري كيس تبغ وبفرة وفلاتر وتعمل حله سجاير لف خد وقت في التفكير وإعرف غن السجاير اللف ماينفعش تلفها وإنت سايق أو وانت ماشي وماينفعش وانت متعصب تلفلك سيجارة وتشربها علشان تهدى لانك ها تهدى على ما تلفها وما ينفعش تسيب الماتش وتلفلك سيجارة.
ثالثا : التخصص مطلوب ماتروحش تسحب من صاحبك ورقتين بفرة لأى هدف أخر غير لف سجاير التبغ كل حاجة وليها حاجة وكل لفة وليها ورقتها ومش ها افسر اكتر من كدة.
أما إنت يا عزيزي اللى بتشرب سجاير لف
أولا : لو ما بتعرفش تلف ما تشتريهاش أو اشتريلك مرل بدل ما تبقى ماسك سيجارة شبه البطارخ كدة وشكلك هايبقى عار.
ثانيا: إيد اللى بيلف ميزان يعنى لو بتطلع سيجارة مكتومة أو مهوية أقفل على نفسك في معسكر مغلق قيمة يومين واتدرب كويس وإنت ها تبقى إيسترن كومباني.
ثالثا: مش علشان دمك محروق تتسلى على سجاير كل زميلك لما تاخد قرار تكون قده وخصص من وقتك ساعة تلفلك سجاير في البيت و تبقى معاك للطوارئ سايق أو بتتفرج على ماتش في إجتماع مع المدير.
رابعا :لو إنت زملكاوي ماتشربش سجاير لف أقولك ماتشربش سجاير من اصله إنت صحتك على قدك ودمك محروق واعصابك بايظة أقولك قضيها شيشية أه إنت في الماتش ها تحرقلك بتاع 45 حجر بس ده ماتش كل اسبوع.
