الأزمة في الكائن الكراش أن مشاعرك بتكون ناحيته أوفر جداً عن الحب، وساعات كتير المشاعر دي بتروح بعد فترة قصيرة اساساً، بس على ما حالة الكراش اللي عندك دي تروح من عندك بتكون هزقت نفسك جامد يا عيني بسبب الفرهدة اللي بتكون فيها كل ما بتشوفه، الموضوع بيكون هين لو أنت بتابع الكراش من ورا شاشة الكمبيوتر عن طريق الفيسبوك، بس لو الكراش معاك في الشغل، الفضايح بتكون علني وبصراحة مش مكانها خالص..
انسى اللي فات
لو ركزت في المصايب اللي عملتها قبل كده هتحس ان مفيش اي حاجة هتصلحها، الكوباية اللي وقعتها على الترابيزة في الإجتماع، وبنطلونك اللي اتقطع في وقت غير مناسب بالمرة، وشعرك اللي مرضيش يتظبط في اليوم اللي هيشوفك فيه اكتر مرة، كل المآسي الحزينة دي انساها خالص عشان تعرف تبدأ على جديد وبنضافة، خلاص واتص ضن إز ضن، خلينا نفكر في المستقبل.
نام وانت ساكت
شريط الأحداث اللي بتجريه قبل النوم ده عن كل الحاجات اللي كنت مفروض تقولها وتبهره بيها ومخطرتش في بالك ساعتها، والافيهات الرائعة اللي كان هيسخخ عليها والوحي منزلش بيها عليك الا قبل النوم، كل ده ملوش اي لازمة دلوقتي ومش هيجيب لك الا توتر رهيب قبل النوم والتوتر الرهيب ده هيبجلك كوابيس ان الكراش دخل عليك الشغل وفي ايده عروسة/عريس وعمل الفرح ادام مكتبك، وهتصحى متنكد وهتروح تعمل مواقف محرجة تانية ونحاول ننساها ونرجع لنقطة الصفر
انت جميل
لازم تواجه نفسك بالحقيقة، الكراش بتاعك مش اجمد حد في الكون، هو مهم وبيوترك عشان انت اللي عندك كراش من ناحيته، ممكن جدا يكون محدش بيطيق يبص له وانت اللي نفسك حلوة اساسا، فبلاش تاخد الموضوع على أعصابك أوي كده، ولازم تفهم انك حد جامد بردو يعني مش قليل، أقعد فخم في نفسك بينك وبين نفسك كده وخليك على سنجة عشرة وخليك كده واثق الخطى وامشي ملكاً ولا يهمك يا معلم/معلمة.. ده كراش يعني مش اخر حلقة من جيم اوف ثرونز .. أجمد سيكا
اتبسط
اصلا ايه هو الغرض من الكراش، زي ما قولنا الكراش مش دايما بيكمل ويكون حب حقيقي وعلاقة جد، الفكرة من الكراش اساسا انك تستمتع بمشاعر الحب والإثارة والنظرات من بعيد لبعيد والفراشات في البطن والتلميحات وحركات الثانوية العامة الرخيصة دي، فليه بقى تدي الموضوع اكبر من حجمه وتدخل عليه المشاعر المعقدة بتاعت العلاقات العاطفية المكلكعة، اتبسط بالموضوع، وبص من بعيد ولما يبص دور وشك الي اخر هذا العبث بعدين ابتسم بخباثة وسيبله شيكولاتة الصبح ع المكتب وخلي الموضوع خفيف لطيف على قلبك كده لحد ما يخلص.
النصيحة الأهم في كل دول أن طالما الكراش زميلك في الشغل حاول على قد ما تقدر ما تخليش الموضوع يزيد عن أنه مشاعر فياضة مفاجئة وهتنهي بسرعة، لأن الارتباط بحد في الشغل من أسوأ الحاجات اللي ممكن تعملها في نفسك الصراحة . إلا بقى لو اكتشفت ان هو ده ايوة ده هو ده الحب الحقيقي ساعتها ابقى دوس وربنا معاك.
