كتبت دينا بدر
بما إن عيد الأم قرب، أكيد كلكوا دلوقتي بتفكروا ومحتارين تشتروا هدية ايه، سواء لأمهاتكوا أو حماتكوا، عشان كدة هنساعدكوا من خلال الأبراج انكوا تختاروا الهدية المناسبة ليها حسب شخصيتها.
الحمل .. موبايل
أفضل هدية لامرأة برج الحمل هي الأجهزة الذكية زي الموبيلات، وده لإنها بتحب الهدايا اللي تقدر تستخدمها في حاجة مفيدة وعملية.
الثور .. أجهزة منزلية
أفضل هدية ممكن تختارها لإمرأة برج الثور هي الأجهزة والأدوات المنزلية، وده لإنها شخصية عملية وروتينية مش بتحب الهدايا المبتكرة أو الجديدة.
الجوزاء .. تذكرة سفر
أما برج الجوزاء بقى فا اكتر هدية ممكن تعجبه هي انك تحجزله تذكرة سفر، أو توديه رحلة لمكان جديد، لإنه شخصية بتحب السفر والمغامرة واستكشاف الأماكن الجديدة.
السرطان .. ألبوم صور
امرأة برج السرطان بتحب الهدايا غير التقليدية، وعشان كدة ممكن مثلاً تجيبلها ألبوم فيه مجموعة صور ليكوا مع بعض أو برواز كبير فيه صورتكوا سوا، ودي اعتقد ممكن تكون هدية مناسبة جداً ولطيفة.
الأسد .. خاتم دهب
برج الأسد بيهتم جداً بنفسه وبيحي الهدايا الغالية والثمينة، وعشان كدة أحسن هدية لمواليد البرج ده هي المجوهرات والدهب أو مستحضرات التجميل الغالية من ماركة زي ديور أو لويس فويتون أو شنطة وجزمة شانيل أو بيربري أو اي حاجة سينيه.
العذراء .. مجموعة كريمات للعناية بالبشرة
برج العذراء بيحب جداً يهتم بنفسه، وعشان كدة أحسن هدية تجيبها لامرأة برج العذراء هي مجموعة من كريمات للعناية بالبشرة والشعر.
الميزان .. علبة مكياج
امرأة برج الميزان بتحب تهتم جداً بنفسها وبتفضل الهدايا اللي تساعدها على ده، وعشان كدة علبة مكياج أو مجموعة من مستحضرات التجميل تعتبر أنسب هدية لامرأة الميزان.
العقرب .. سلسلة فضة
برج العقرب بيحب جداً الهدايا الرمزية، ومش بيهتم بالهدية نفسها قد ما بيهتم بالهدف من ورا الهدية، وعشان كدة سلسلة أو ميدالية فضة تعتبر هدية مناسبة جداً لمواليد البرج ده.
القوس .. ساعة قيمة
بالنسبة لامرأة برج القوس فالهدايا العملية والقيمة تعتبر الأنسب ليها، زي مثلاً ساعة من ماركة معروفة أو طقم مجوهرات شيك وأنيق.
برج الجدي .. اديها الفلوس تجيب بنفسها
مولودة الجدي إمرأة عملية جداً، وعشان كدة بتحب تختار هديتها بنفسها لإنها أكتر واحدة عارفة الأنسب ليها، فا احسن حل هو انك تديها الفلوس وتسيبها هي تختار هديتها بنفسها.
الدلو .. طقم حلو وشيك
من أفضل الهدايا اللي ممكن تقدمها لامرأة برج الدلو هي طقم جديد يناسب ذوقها أو شنطة وجذمة حلوين وعلى الموضة أو برفان من النوع اللي بتحبه.
الحوت .. بوكيه ورد
برج الحوت واحد من أكتر الأبراج رومانسية، وعشان كدة الورد والشيكولاتة وغيرها من الهدايا الرومانسية تعتبر مناسبة جداً لمواليد برج الحوت.
