رمضان قرب وكل سنة وانتم طيبين، وزي ما كلنا عارفين إن الشهر ده هو الموسم الرئيسي والأهم لكل المسلسلات العربية، وده معناه إن اللي بيتفرج على التليفزيون مش هيلاقي مكان يهرب منه من سيل المسلسلات العربي اللي جايلنا!
بس لو كنتم زي حالاتي مالكمش في العربي، هرشحلكم شوية مسلسلات أجنبي حلوة.. صراحة الاختيار كان صعب جدًا إني اختار عدد معين من المسلسلات اللي تستاهل تتشاف، خصوصًا إن الحاجات الحلوة كتيرة فعلًا، بس قررت –في المقال ده واللي بعديه- إني أركز على حاجات معينة أرشحهالكم.
في حاجات مش هتكلم عنها.. يعني مثلًا المفروض إن الكل شاف Friends، وحاجات قديمة نوعًا أغلب الناس شافوها زي Lost و Fringe و Prison Break و Heroes، وحاجات أحدث شوية شافها أغلبهم برضه زي The Walking Dead و Game of Thrones و Breaking Bad و Dexter، وحاجات سوبرهيروز زي The Flash و Daredevil و Gotham، فاحنا الحاجات دي كلها مش هنتكلم عنها هنا، وهنركز على حاجات تانية أقل شهرة وتستاهل تتشاف.
Da Vinci’s Demons
المسلسل بيحكي عن جانب محدش يعرفه عن حياة الفنان العبقري ليوناردو دافنشي وحياته في فلورنسا، وتدخله في الصراع السياسي والعسكري اللي كان بين فلورنسا والكنيسة الكاثوليكية، واللي لقى نفسه جزء حيوي منه.. المسلسل بيركز كمان على سعيه إنه يلاقي كتاب نادر بينتمي لجماعة كانت أمه منضمة ليهم.
تريلر المسلسل:
Go On
المسلسل بيحكي عن مذيع برامج رياضية في الراديو، بتموت مراته فبتقابله فترة من أسوأ من فترات حياته ويدخل في مرحلة مظلمة من الاكتئاب؛ ويسيب شغله لفترة قبل ما يقرر من نفسه إنه بقى أحسن نفسيًا ويرجع يكمل شغل تاني، بس بيضطر تحت إلحاح من مديره إنه يحضر جلسات علاج جماعي مع ناس بتعاني من حالات شبيهة بحالته، فتبدأ حياته تتغير مع الناس الجديدة اللي دخلتها.
تريلر المسلسل:
Touch
المسلسل بيحكي عن طفل صغير مصاب بنوع من أنواع التوحد، عايش مع أبوه الأرمل.. الطفل مبيتكلمش بس مغرم بالأرقام، وبيقضي ساعات طويلة بيكتب فيها أرقام غريبة، بيكتشف الأب مع الوقت إنها بترمز لحاجات معينة، وبيكتشف كمان إن ابنه عنده نوع معين من القدرات الخاصة؛ وبيقدر يربط أحداث وأشخاص في أماكن متفرقة من العالم، فبيكون دور الأب إنه يكون حلقة الوصل بين أرقام ابنه والحاجات اللي بترمز ليها دي.
تريلر المسلسل:
Almost Human
المسلسل بيحكي عن ظابط شرطة في مستقبل بيكون فيه لكل ظابط شرطي بشري شريك آلي متجرد الأحساسيس، بس بتحصل حادثة بتخليه يفقد رجله، ولما بيرجع الشغل تاني بيضطر يتعاون مع شريك آلي تاني بس من نوع قديم قريب للبشر، فيبدأ الاتنين بعد فترة يتأقلموا على بعض ويحلوا شوية جرايم سوا.
تريلر المسلسل:
Awake
المسلسل بيحكي عن ظابط شرطة بيتعرض لحادثة مع مراته وابنه، بيصحى منها ويلاقي نفسه عايش حياتين متوازيتين: واحدة فيهم مراته عايشة، والتانية ابنه اللي عايش فيها!.. الموضوع بيجنن طبعًا، فهو مبقاش عارف أنهي فيهم الحياة الحقيقية وأنهي الحلم، بس طبعًا هيكون في جانب بوليسي في الموضوع، وإنه هيكتشف إن الحياتين دول مرتبطين ببعض، وهيستغل ده إنه يحل شوية قضايا في شغله.
تريلر المسلسل:
Suits
المسلسل بيحكي عن شاب عبقري مكملش دراسة حقوق رغم إنه متفوق جدًا فيها، وبتقوده الظروف والصدفة إنه يقابل محامي شهير عبقري كمان، بيقرر إنه يغامر ويعين الشاب مساعد ليه؛ من غير ماحد يعرف حقيقته.. المسلسل بيركز بصفة رئيسية مع حياة الشاب والمحامي جوة الشغل وبراه، والقضايا المختلفة اللي بيمسكوها سوا وإزاي بيتعاملوا معاها، وكمان عن شخصيات تانية مشتركة في حياتهم في الشغل.
تريلر المسلسل:
Continuum
المسلسل بيحكي عن محققة شرطة في مستقبل بتدير حكوماته الشركات الكبيرة، بتشهد محاكمة إعدام مجموعة من أخطر المجرمين المعارضين للشركات دي، بس حادثة بتحصل في المكان، فبتلاقي نفسها معاهم رجعوا بالزمن لكام سنة ورا قبل سيطرة الشركات، وبيتفرق شملهم، فبتنضم للشرطة في الزمن ده وتبدأ تدور على المجرمين؛ اللي بدأوا في نفس الوقت يحاولوا يدمروا نظام الشركات ده إنه يحصل في المستقبل.
تريلر المسلسل:
Orphan Black
المسلسل بيحكي عن شابة بتلاقي نفسها في يوم من الأيام قدام واحدة بتنتحر وكانت طبق الأصل منها، فتقرر إنها تنتحل شخصيتها وتعيش حياتها بدل حياتها المدمرة، بس بتكتشف مع الوقت إن في أكتر من نسخة تانية منهم هم الاتنين، وإنهم كلهم نتيجة تجارب جينية معينة، فبتبدأ النسخ دي تتجمع عشان يحاولوا يكتشفوا إيه اللي بيحصل بالظبط.
