بقلم عمرو صبرى
المجتمع في السنين الاخيرة ابتدي يظهر فيه بشدة ظاهرة الطلاق و الخناقات الاسرية و التعقيد من الجواز و الارتباط و بوستات “كلهم مصطفي ابو حجر” و الذي منه
و كل دا مش بسبب ان الارتباط و العلاقات حاجة وحشة .. لكن عشان approach الارتباط نفسه سواء في جيلنا الحالي او الاجيال الفاتت نوعا ما مغلوط شوية
الاجيال الي فاتت, الا من رحم ربي, كانت بترتبط و تتجوز عشان “تستقر” .. كان الشخص يبتدي يعدي ال 28 سنة يحس انه عيب و ميصحش انه متجوزش لغاية دلوقتي و محتاج “يستقر” و لحد انهردا معني الكلمة دي مش مفهوم معرفش هيستقر فين اما يتجوز ماهو قاعد يعني
المهم بمجرد ما بتنقح الحاجة للاستقرار علي الواحد من دول يروح رايح شايف امه او خالته تجيبله صور بنات يختار اكتر واحدة عاجباه .. يحددوا معاد .. و في ظرف يومين بيبقوا متفقين مين الي هيجيب العفش و الستاير و طقم الحلل.. smooth as hell و الله! ولا تلميحات بقي ولا نيلة
نيجي بعد الشهرين الحلوين بتوع اول الجواز نكتشف اننا مش عارفين حاجة عن بعض و نبتدي نتفاجئ بصفات مكانتش باينة قبل كدا و كل طرف يتهم التاني انه ضحك عليه و ما الي ذلك
و طبعا مش هنسيب بعض لان يا اما خلاص بقي بيننا اولاد يا اما لان الطلاق دي وصمة عار في مجتمعنا طبعا فا نفضل
نبهدل في بعض و في الغلابة الي جم دول 30 سنة كمان لحد ما البيت كله يولع
الجيل الحالي العكس بقي .. بي underrate العلاقات و يستخف بيها و كل واحد ماشي يحب علي نفسه ولا كأنه دور برد .. مفيش اي تخطيط ولا تفكير في الموضوع .. all it takes is the moment of “ايه دا شايف البنت دي يلا .. تراهني علي كام اني في اسبوعين اصاحبها” .. و يفضل الطرفين ينزلوا ف بوستات علي انستجرام مليانة كلمة forever و هما الاتنين عارفين انهم هيفركشوا كمان ساعة الا تلت اصلا.
طيب و ايه الحل؟؟ single forever?! نموت virgins?!
اكيد لأ .. الحل انك ت develop ريليشن شيب .. و مع انها حاجة risky شوية بس يا سلام لو كان الطرفين صحاب اوي .. ساعتها بيبقوا عارفين و فاهمين بعض .. مفيش حاجة مستخبيه .. الاتنين شافوا بعض و هما بيضربوا 3 شاورما بعد البيتزا و بيوقعوا علي هدومهم عادي و متقبلين الموضوع .. محدش محتاج يخفي حاجة
الموضوع مفيد في انك بتاخد steps في معرفتك بالشخص و بيبتدي الموضوع يتطور من معارف لصحاب ل besties لحد ما واحد يتشد للتاني و يبتدي الموضوع يتطور
في رأيي .. البيوت دي من اسعد البيوت .. تخيل ان اكتر شخص بتلجأله و تحب تقعد و تتكلم معاه معاك طول الوقت و جنبك
فكروا كويس عشان الموضوع مش مجرد كان ستارة و بوتاجاز ولا هو عادي كل يوم الصبح علي الريق .. و الكراش الي نعرفه احسن من الكراش الي منعرفوش
