ليه لازم تبطل كلام فالسياسة علي السوشيال ميديا؟

نصيحة مني بلاش جدال، ونصيحة كمان، بلاش جدال في السياسة، وأزيدك من النصيحة شبرين تلاتة أربعة: بلاش سياسة ع السوشال ميديا.

بصحي م النوم الصبح، طبعا زي أي انسان معاصر ع الموبايل، ف الساعة مثلا تكون ستة صباحا، أربعة بتوقيت القاهرة، أشوف التايم لاين، ألاقي واحد بيتكلم بحماسة عن أزمة الغذاء في دارفور، أو عن مشكلة قوات حفظ السلام في مالي، وغيرها من أمور السياسة الداخلية اللي مش هنتكلم فيها اطلاقا، بستغرب جدا، بتتكلم ف السياسة الفجر، معلش يابني، ده أكبر دليل انك: معندكش حياة تعيشها.

من قلبي بقدملك النصيحة، ومش النصيحة وبس، لا، النصيحة ومعاها خمس أسباب بيدعموها، ليه لازم تبطل سياسة ع السوشال ميديا؟ وهتقتنع هتقتنع، ماهو يااقنعك يا أطلقك “بصوت كريم عبد العزيز”

1. السبب رقم واحد: ابعت عن الشر..وغنيله

سمعت عن “ادوارد سنودن”؟ طب عارف مين هو “جوليان أسانج”؟ لو مش عارف قشطة، بس لو عارف يبقي أكيد انت متأكد ان كل الحكومات بتراقب كل الانترنت، بشكل أو بآخر، لذلك، ليه تفتح لنفسك ملف ع الفاضي وانت مناضل حنجوري، مش هتتحرك من أوضتك وتنزل مظاهرة وقت الجد؟ للأسف فيه ناس كتير اتاخدت ف الموضوع ده غلط، ومحدش يعرف ليهم طريق لحد دلوقتي، ف ليه؟ فكك يابني، وتعال علي السبب التاني.

2. السبب رقم اتنين: صحتك بالدنيا

أثبتت الدراسات الحديثة، اللي معرفش مين درسها بالظبط، ان الجدال مع الأغبياء بيرفع الضغط، والسكر، وبيفقع المرارة، وبيشل الدماغ، ف ليه تقعد تتخانق مع جهلاء وأغبياء طول الوقت، مع ان ف ايدك يا تعملهم بلوك يا تبطل كتابة كلام بيستفزهم؟ م الاخر انت لو بتقضي أكتر من خمس دقايق ف الجدال مع واحد غبي، او مش هيتبني وجهة نظر تانية، ف دي مضيعة لصحتك مش أكتر، وصحتك بالدنيا..!

3. السبب رقم تلاتة: روق بالك

صدقني مش الكلمتين الي هتكتبهم اللي هيصلحوا الكون، واسمعها مني، أيوة الثورة قامت بجروب ع الفيسبوك، بس دلوقتي الوضع مختلف، انا لو منك، أحط خطة للهروب السريع من مصر، أستمتع بالصفاء الذهني، أخد كورس في الحياكة والكروشية، أي حاجة جميلة وهادية كدة.

4. السبب رقم أربعة: التفاهة حلوة..مفيش كلام

لسه برضه مقتنعتش؟ صدقني التفاهة حلوة، الكوميكس حلوة، الأفلام حلوة، صفحات الكورة الي بتطحن بعض حلوة، صفحات العربيات حلوة، صفحات موديلز فيكتوريا سيكرت حلوة، أي حاجة ف الدنيا حلوة والله، صدقني التفاهة دي هي الشئ اللي بيخليك علي قيد الحياة بعيدا عن الهم والغم.

5. السبب رقم خمسة والاخير: بطلت تجيب سكة مع البنات من زمان

لو كل الأسباب الي فوق لسه مأقنعتكش، ولسه بتفكر، أحب أقولك الكبيرة،  السياسة بطلت تبقي Catchy للبنات من زمان، دلوقتي البنت من دول ممكن تعجب بواحد بي Get Sexy for marasi واحد بيقضي الصيف ف كل مصايف العالم AKA  شريف فايد، واحد ملوش شغلة ولا مشغلة وقاعد ف الساحل طول السنة، كدة، لكن واحد بتاع سياسة، تيجي تخرج معاه ف Date  يكلمها عن أزمة اللاجئين في كردفان وتأثيرها علي مدار السرطان؟ أكيد لأ..!

وفي النهاية، طول ما خالتك بتراقب بوستاتك، وبتقول لمامتك عليها، هتفضل مامتك خايفة عليك، يرضيك مامتك تبقي خايفة عليك يا حمادة؟ دي ماما برضه !!