معظم الوقت بنستخدم افيهات يوسف عيد في كلامنا او في تعليق على موقف وأحيانا صور من مشاهده في الأفلام، و في جملة كان المعلق الرياضي كابتن ميمي الشريبني بيقولها عن الإمبراطور حازم إمام”التاريخ يرفع يديه عن الموهوبين وينسى دون اعتذار أنصاف اللاعبين” وده اللي ممكن نقوله على كوميديان بحجم موهبة يوسف عيد .
في إحدي مقالات الكاتب بلال فضل كان بيحكي ان في كواليس فيلم رسالة إلى الوالي كان في زيارة للفنان عادل إمام بيسمع يوسف عيد بيغني أغنية شعبية للفنان شعبي معروف واستني لحد ما خلص وراح الزعيم قاله ده أعرفك على “فنان محصلش” ورد بلال فضل مين ميعرفش يوسف عيد.
ممثل صايع
في أحدي لقاءات يوسف عيد كان بيحكي ازاي كبار المخرجين اتعلموا معه وازاي هو استغرب تعاملهم بيحكي عن فيلم مع المخرج الكبير سعيد مرزوق وقاله “انت ممثل صايع” ومن وقتها كان سعيد مرزوق كان بيبادر بالسلام لما يشوفه .
وفي فيلم اليوم السادس استعان به يوسف شاهين في مشهد مع داليدا وعلى حسب رواية الراحل يوسف عيد اللي قال “انا لو اتكبر عليا همشي واسيب البلاتوه كله” وبمجرد دخول عيد البلاتوه قابله يوسف شاهين بالحضن وبكلمة “أزيك ياجو” لدرجة انه دمع، وقتها كانت داليدا في أيامها الأخيرة وكان مشهد يوسف عيد مع داليدا انه هيوقعها في الأرض فكان خايف عليها، جاله يوسف شاهين وقاله متخافش انا عارف انك ممثل حاسس وقوعها في الأرض.
ليه مطلعتش ملك
“يا دنيا أنا.. أنا بسألك ليه أنا مطلعتش ملك” ده من أشهر مونولجهات اللي قدمها يوسف عيد في تاريخه وممكن تكون معبرة عن حياته، المونولج ده فيلم يا مهلبية يا إخراج شريف عرفة وبطولة ليلي علوى.
رسالة إلى الوالي
من المشاهد اللي هنعقد نتفرج عليها ونعيد فيها مرة واتنين وتلاته وهنضحك نفس ضحك وأكتر ، المشهد فيلم رسالة إلى الوالي اللي بيوصف فيه لعادل إمام ازاي يروح قلعة محمد علي.
مين اللي قتل على بيه الكبير
“زكريا الدريري” مدرس فرنساوي وتاريخ ورياضيات، بمجرد ما يطلع على الشاشة من غير ما ينطق الجملة اللي احنا حفظناها نبدا في الضحك