العلاقات العاطفية في هوليوود معقدة جدًا وده مش هزار.. يعني وارد جدًا تكون نايم وانت أخر حاجة عارفها إن فلان مصاحب فلانة، فتصحى تلاقيهم سابو بعض –عادي جدًا وبتحصل كتير- وبعد كام يوم تلاقي كل واحد عاش حياته وراح مصاحب حد تاني.
في حالات كتيرة معروفة في هوليوود من النوعيات دي، وهتلاقي أغلب الناس عارفة إن براد بيت مثلًا كان مرتبط في فترة من الفترات بجوينث بالترو، وإن جاستين تيمبرلك مثلًا برضه كان مرتبط في فترة تانية مع بريتني سبيرز، وإن بين أفليك وجينيفر لوبيز كانوا مخطوبين في وقت ما، وأمثلة تانية كتيرة مشهورة.
بس في المقال ده؛ حاولنا نبعد عن الحالات المشهورة دي، ونجيب حالات تانية مش ناس كتيرة تعرفها.. حالات اعترف بيها شوية من أصحابها، وحالات تانية كانت شاهدة عليها كاميرات الباباراتزي اللي مبتسيبش حد في حاله!
جانيت جاكسون وماثيو ماكونهي
نبدأ القايمة الغريبة بـ couple غير متوقع أبدًا.. الاتنين بدأوا علاقة رومانسية سريعة خلال سنة 2002 بعد ماتقابلو في حفلة الجرامي.. ورغم إن ماثيو كان قال بعدها إنهم كانو مجرد صحاب، بس جانيت اعترفت إنهم كانوا أكتر من كدة في الفترة القصيرة اللي قعدوها مع بعض.
ساندرا بولوك ورايان جوزلينج
الاتنين كانوا couple من سنة 2002 لحد 2003.. في مقابلة معاه؛ قال رايان “إنه كان عنده 2 من أعظم الـ girlfriends في التاريخ (يقصد ساندرا وريتشيل ماك أدامز اللي صاحبها بعدها)، وإنه مقابلش حد زيهم.”
كورتني كوكس ومايكل كيتون
الاتنين ربطتهم علاقة حب طويلة نوعًا في الفترة من 1989 لحد 1995، بس كانوا مكتمين عليها نوعًا ومكنوش بيحبوا يظهروا كتير سوا.
جوليا روبرتس وليام نيسون
علاقة رومانسية تانية قصيرة كانت بين جوليا وليام اللي اتقابلو وقت تصوير فيلم Satisfaction سنة 1987، وقت ما كان ليام عنده 35 سنة وجوليا 19 سنة بس.. الاتنين فضلو ساكنين مع بعض لسنة تقريبًا لحد ما علاقتهم انتهت.
سارة جيسيكا باركر وروبرت داوني جونيور
رغم انهم فضلوا مع بعض لفترة طويلة (من سنة 1984 لحد 1991)، إلا إن روبرت اعترف بعد كدة إن إدمانه وحبه للشرب كانوا هما أكبر سببين لفشل علاقته بيها.
بينلوبي كروز وجوش هارتنيت
الاتنين ربطتهم علاقة حب قصيرة في سنة 2007 واتصوروا كتير وهم سوا، ومحدش فيهم أنكر الموضوع.
باريس هيلتون وفال كيلمر
Couple تاني غريب وغير متوقع.. الاتنين صدموا العالم بعلاقتهم سنة 2006 لما صور حميمية ليهم اتسربت على الإنترنت، واتقال وقتها ان الصور دي بترجع لسنة 2002 لما كانو بيصوروا سوا فيلم Wonderland.
ميشيل رودريجز وزاك إيفرون
علاقة من نوع “في الصيف لازم نحب”.. ميشيل وزاك اتصاحبوا لفترة في صيف 2014، وقضوا وقت لطيف مع بعض على شواطئ إيطاليا، وانتهت علاقتهم فجأة زي ما بدأت فجأة.
جيسيكا ألبا ومارك والبرج
علاقة تانية بدأت فجأة في 2003 وانتهت فجأة في نفس السنة، بس المرة دي اتشافوا في صور حميمية على شاطئ ميامي.
كاميرون دياز وجاريد ليتو
كاميرون وجاريد ارتبطوا ببعض سنة 2002، والصحافة وصفتهم وقتها إنهم أكتر couple بيطلعو حلوين في صورهم مع بعض، رغم إنهم نادرًا ما الكاميرا بتعرف تصورهم سوا.
بريتني سبيرز وكولين فاريل
الاتنين اتصاحبوا لفترة في سنة 2003، وحضروا مع بعض كذا premiere لفيلم كولين The Recruit.
كريستين دانست وجايك جيلينهال
لو اتكلمنا عن النجمات اللي ارتبط بيهم جايك في هوليوود هنحتاج لمقال كامل لوحده!، فهنا هنركز بس على فترة ارتباطه مع كريستين في الفترة من 2002 لحد 2004.
