في وقت من السنة بتلاقي حنفية الخطوبات والجواز اتفتحت، وافراح وكتب كتاب وعقبالك وهنفرح بيكي امتي، المشكلة مش في الفرح او الجواز نفسه وانما في اللي بيحصل بعد كده، في البروفايلات البنات لما تتجوز وتجنبا للوقوع في بروفايل اي واحدة لسه متجوزة جديدة خدنلك لفة في بعض البروفايلات وده أهم الحاجات اللي بتكون على صفحاتهم:يوميات زوجة حديثة على الفيسبوك
القهوة
أول حاجة هتلاقية مشيراها الصبح وأول ما تصحي من النوم هي صورة فطارها مع زوجها العزيز الحنون او فنجان القهوة مع تعليق فيها فوائد احتساء القهوة مع الزوج وان الفطار بيكون طعمه مختلف.
أسعد زوجين
طبعا من الطقوس الزوجة الحديثة هو صورة ليها هي وجوزها قبل الجواز او بعد الجواز اللي هتلاقيه قصدها او لو محطتش صورة هحط صورة من كرتون او مسلسل تركي.
ثقف نفسك
على طريقة كريم عبد العزيز في فيلم محطة مصر ” متغمضلش عين غير لما اشير بوست من الصفحة منعرفش بتجيب معلوماتها منين ولا مصدرها مين، المهم انها بتقول نصايح كويس وكلام حلو .
كلام ستات
في الجروبات النسائية المعروفة على الفيسبوك بمعدل كل خمس دقايق في اليوم هتلاقي بوست من النوعية لو عايزة اعمل غداء مختلفة هيكون ايه، الرز بيتعمل جنبه ايه، اللي الكريمات اللي متوقعش الشعر
يوميات زوجة مفروسة أوي
الصفحة الأكثر إنتشارا من بين الزوجات حديثي العهد، هي صفحة متكاملة متنوعة بين مشاكل الجواز بطريقة كوميدية لواصفات تجميلية لطيفة، لكيف تجعلين زوجك لا ينظر لغيرك، ولو لعب بديله هنقولك تعمل ايه بالظبط.
الحسد
فكرة الحسد مرتبطة ارتباط وثيقة، بالجواز والخطوبة يعني لو واحدة دبوسها ضاع من الطرحة يبقي اتحسدت لما اتجوزت أو اني الطبق اتكسر منها، أما الزوجة الحديثة فتلاقي معظم بوستاتها الوقاية من الحسد والحاجات اللي اتقول ان في حد حطط عينه في حياتك ومش عايزاك مبسوطة.
بإختصار لو اتزوجت بلاش تخلي الناس تعرف عنك كل حاجة، وكمان بلاش مبالغة في كتابة البوستات والأسئلة مالهاش لازمة على بروفايلك أو جروبات الستات، بيتك وجوزك اولي بيك، ولو انتي صاحبة العروسة الجديدة اعمليها unfollow وريحي دماغك.
