فكرة انك “كراجل” تعبر عن مشاعرك  أكيد مفيهاش أي مشكلة، بالعكس تماماً، الراجل اللي بيقدر يعبر عن اللي بيحس بيه عادة بيكون جذاب جداً في عيون البنات لإنه بيتخلى عن جموده وقسوته وبيتحرر من قيود المجتمع اللي بتجبر الراجل على إنه يكبت مشاعره وميعبرش عنها، لكن للاسف فيه فرق شاسع بين إنك تعبر عن مشاعرك وإنك تكون “مسهوك”، لإنك بكدة بتكون اكتسبت صفة من الصفات الأنثوية وده بيخلي البنات تنفر منك.

انهاردة ومن خلال المقال ده هقولك على شوية حاجات من اللي ممكن تخلي رجولتك تتهز في عيون البنات..

  1. ممكن تعيط قدام اي حد

“البكاء” في حد ذاته حق من حقوقك كـ”إنسان” لكن لازم تعرف إزاي تستخدم الحق ده، يعني تقدر تعيط قدام اقرب الناس ليك، قدام اهلك، حبيبتك، لكن مينفعش تبقى ماشي تعيط عمال على بطال وقدام أي حد.

 

  1. بتتصور سيلفي كتير وبتهتم جدا باللايكات

الصور السيلفي أكيد مش مقتصرة على البنات، لكن كترها أكيد مش مناسب مع كونك “راجل”، وخصوصاً لو كنت بتتصور كتير بهدف تجميع أكبر عدد من اللايكات على السوشيال ميديا.

 

  1. بتهتم بشعرك وبشرتك أكتر من البنات

مش معنى إنك لما بتهتم بنفسك بتعجب البنات إنك تزود جداً اهتمامك ده وتفتكر إنك هتعجبهم أكتر، للاسف كل حاجة بتزيد عن حداها بتتقلب ضدها، والراجل اللي بيهتم بشعره أو ببشرته بشكل مبالغ فيه بيخلي البنت تحس جمبه ان هي الراجل!

  1. صحابك البنات أكتر من الولاد

البنت عادة بتقفل من الولد اللي كل صحابه بنات، وده لإن رجولتك مش بعدد البنات اللي حواليك بالعكس، كل ما قل عدد صحابك البنات كل ما زادت رجولتك في عيون البنات.

 

  1. بتلبس هوت شورتات وبنطلونات ضيقة جداً

الشورتات عموما مفهاش مشكلة، لكن اللي منها بيكون قصير جداً “هوت شورت” يعني ومبين رجلك كلها ده حقيقي مستفز جداً، اما بالنسبة للبنطلونات “السكيني” فا تقدر تلبسها برده، لكن من غير ما تبقى “محزقة” يعني!

 

  1. بتاخد وقت طويل عشان تجهز

ممممممممممم …. يعني انت لا بتعمل شعرك ولا بتحط ميكاب ولا بتحتاج تقلع وتلبس 100 مرة عشان تستقر على الطقم اللي هتنزل بيه، ايه طيب اللي ممكن يخليك تاخد وقت طويل عشان تجهز ويمكن اكتر من الوقت اللي بتاخده البنات؟!

 

  1. بتحط رجل على رجل طول الوقت

حط رجل على رجل عادي مفيش مشكلة، بس بلاش تبقى قعدتك المفضلة، ولو كان ولابد يعني بلاش تبقى نفس قاعدة البنات، حاول تقعد القاعدة اللي بيكون كعب رجلك هو اللي على رجلك التانية من غير ما تشبك رجليك الاتنين ببعض.

  1. بتاكل ببطء شديد

لإن الطبيعي إن الولد يبقى بياكل أسرع كتير من البنت، فا لما واحدة تلاقيك بتاكل ابطأ منها أكيد هتستغرب، ولو الموضوع ده اتكرر كتير للدرجة اللي فيها بقى الطبيعي انها تخلص أكل قبلك أكيد هتقفل منك!

 

  1. متعلق جداً بمامتك

أكيد سمعت كتير جملة “ابن أمه” اللي بتتقال على أي ولد متعلق جداً بمامته ومبيعملش حاجة غير لما ياخد رأيها، مش عيب إنك تبقى قريب منها لكن مينفعش تتعدى الحدود للدرجة اللي فيها تبقى “دلوعة ماما”.

 

  1. بتحب الرغي والحوارات أكتر من البنات

كلنا عارفين طبعاً إن “الستات” رغايين وبيحبوا النم والحوارات والكلام الكتير زي عنيهم، لكن تفتكر لما
يلاقوا راجل “رغاي” أكتر منهم هيحسوا بإيه من ناحيته؟!