بقلم : مي مجدي
المواطن المصرى غلبان بطبعه – أى والله – وبسبب رحلة المعاناة اللى هو عايشها يومياً فى مصر فتلاقى أن أقل حاجة طبيعة ممكن تحصل لأى حد فى أى دولة تانية بتفرحه وتخليه يرقص من السعادة لأ وكمان يروح يسجل أحداث اليوم ده فى دفتر مذكراته. تعالوا أقولكم على شوية لحظات سعيدة فى حياة هذا الكائن المتبهدل وعليكم أنتوا تضيف الباقى :
1. من لحظات السعادة فى حياة المصرى لما يلاقى مكان يركن فيه تحت العمارة بالظبط سواء عمارة الشغل أو البيت أو أى حتة تانية.
2. لما يضطر آسفاً أنه يركب المترو علشان يهرب من الطريق اللى مبيمشيش ويجى يدى موظف قطع التذاكر جنيه من تذكرة المترو فيرجعه ربع جنيه ويقوله “بمناسبة عيد البيئة” أموت أنا فى البيئة
3. لما يصحى بالعافية علشان يروح الشغل ويكتشف أن النهاردة الجمعه. ياسلااااااااااااااام وجون وجون وجووووون.
4. لما يروح يدفع فواتير أى حاجة ويقف فى طابور ويلاقى نفسه فى أول الطابور.
5. لما يروح أى مول ويلاقى مكان فاضى يقعد فيه فى الفود كورت.
6. لما يجى الأتوبيس اللى هو مستنيه وفى تلك الأثناء يتردد على مسامعه أغنية ” مبروك مبروك …مبروك عليكم وعلينا”
7. لما يجى يشترى حاجة ويجى يحاسب عند الكاشير ويلاقى الراجل بيرجعله باقى ويقوله أصل عليها خصم 30 %
8. لما حد يصوره وهو مش واخد باله -وكمان شوف ياأخى القدر -تطلع الصورة حلوة
9. لما تجيله أجازة بعدها جمعه وسبت وهنا ترن فى أذنه أغنية المطرب عمرو دياب ” ده اللى كان نفسى فيه ..”
10. لما يقابل التلفزيون فى الشارع ويسألوه عن رأيه فى موضوع ما.
11. لما يروح الشغل ويطلعوه نص يوم بمناسبة أى حاجة.
12. لما يركب المترو ويلاقيه فاضى (أهو ده اللى مش ممكن أبداً على رأى الست أم كلثوم)
13. لما يحل وحش أووى فى الامتحان وفى الآخر يطلع بتقدير جيد جداً (وده العادى من بنك مصر)
14. لما يلاقى حد يغششه فى لجنة الامتحان ده بقى اللى بيقولوا عليه الصديق وقت الضيق.
15. لما يخرب الرجيم (تورتة وشيكولاته وخلافه) ويلاقى وزنه مزدش (لا سحر ولاشعوذة)
16. لما يبقى يصاحب حد وصاحبه ده يبقى مشهور.
17. لما يخبط على التلفزيون اللى مهنج فيشتغل.
18. لما يقابل واحد أجنبى ويقوله سلام عليكوم.
19. لما يركب التاكسى الأبيض وميضحكش عليه وياخد باقى ال50 جنيه.
20. لما يتفرج على فيديو على النت ويشتغل دفعة واحدة من غير مايعمل لودينج.
21 لما يطلع على كوبرى أكتوبر ويلاقيه ماشى.
22. لما يشترى هدوم شتوى ويلبسها فى الشتا مش فى الصيف.
23. لما بيسافر أى حته بره مصر إن شاء الله السودان حتى.
