طبعا كلنا عارفين “سي السيد” و”الست امينة”، اشهر شخصيات الدراما المصرية اللي فضلت لحد دلوقتي هي الرمز اللي بيعبر عن قهر وظلم الراجل الشرقي لمراته واولاده وازاي بيحلل لنفسه كل حاجة وبيحرمها على اهل بيته، هو مسموحله الخروج والسهر والرقص وكل حاجة تيجي على باله وتعدل مزاجه وتبسطه وهما مالهوش غير حاضر وطيب ونعم.
وعلى الرغم من التغير الكبير والانفتاح اللي بنعيشه، إلا ان “سي السيد” لسة موجود، بكل التناقض اللي في شخصيته، لسة المجتمع مقدرش يتحرر من افكاره تجاه العادات والتقاليد اللي اتربينا عليها وصدقناها من غير تفكير، سواء كانت صح او غلط، وده اللي بتأكده حاجات كتير في علاقة الراجل بالست سواء كانت علاقة عاطفية بس او علاقة زوجية او غيرها ن انواع العلاقات المختلفة اللي بتجمع الراجل والست في إطار اجتماعي مشترك.
1-انا راجل وانتي بنت!
طبعا الجملة دي مفيش بنت مسمعتهاش من حبيبها لما فكرت تلومه على اي تصرف بيعمله بيضايقها، وخصوصا لو كان ليه علاقة بإنه بيدي لنفسه حقوق كتير جدا وبيسلب منها كل حقوقها، ودي حاجة من الحاجات اللي بتأكد ان جوة كل راجل شرقي “سي السيد” بيطلع وقت اللزوم.
2-انا اول راجل في حياتك؟
اول سؤال بيسأله اي راجل لما بيجي يرتبط ببنت هو “كان ليكي علاقات قبل كدة” ولو كانت الاجابة اه ممكن جدا يكون سبب قوي يخليه يبعد عنها وينهي العلاق فورا من قبل ما تبدأ، على الرغم من إن هو نفسه جايز جدا يكون ارتبط بخمسين واحدة قبلها.
3-انا الراجل وكلامي هو اللي هيمشي
“اه انا سي السيد وكلامي هو اللي هيمشي” .. ده مش مجرد كوبليه في اغنية لتامر حسني، ده احساس داخلي عايش جوة كل راجل شرقي، بيمده بالقوة اللي بتساعده يكسر شخصية اي بنت بيرتبط بيها ويحولها لألة تنفذ بس الأمر اللي هو يديهولها من غير ما يكون ليها الحق في المناقشة او الإعتراض.
4-بيتك اولى بيكي
جايز يكون الموضوع ده نسبي ومش بينطبق على كل الرجالة لكنه موجود، كتير منهم بيشوف ان الست متخلقتش عشان تشتغل وان دورها في الحياة بيقتصر على بيتها وجوزها لكن طموحها هي الشخصي او رغبتها في النجاح وإثبات كونها شخصية مستقلة مادياً ومعنوياً تقدر تعتمد على نفسها ده مش مهم، وده نفسه اللي كان بيعمله سي السيد مع الست امينة.