معجبة بواحد وخايفة يكسر قلبك؟ متخافيش .. مشاعرك مهمة بالنسبالنا، وعشان كدة هنقولك على كام علامة كدة لازم تعرفيهم عشان تقدري تحددي إذا كان اللي “الكراش” ناوي على علاقة بجد ولا بيتسلى بيكي والموضوع اصلا مش في دماغه، تابعي معانا المقال ده واعرفي حقيقة مشاعره عشان تلحقي نفسك قبل فوات الأوان.
سألك على رقمك، لكن عمره ما اتصل
حطي في اعتبارك إن الرجالة احياناً ممكن يتعرفي على بنت بدافع الفضول مش أكتر وميكونش عندهم أي نية للدخول في علاقة من أي نوع، وعشان كدة ممكن جداً تلاقي “الكراش” بيطلب رقمك وبعدها ميفكرش يتصل، وده معناه إنك مش في دماغه اصلاً.
بيقرب منك من باب الفضول
رجالة كتير بيحبوا التشويق والمغامرة، وده بيخليهم عندهم رغبة في إنهم يقربوا من اي بنت شايفينها بعيدة ومش قادرين يطولوها، لكن بمجرد ما بيوصلولها بتخلص الحكاية وبيبدئوا يدوروا على مغامرة تانية مع بنت تانية، من باب الفضول من أكتر، بيلعبوا يعني، والنوع ده من الرجالة مينفعش تتعلقي بيه لانه هيكسر قلبك بسهولة جداً من غير ما حتى يرمشله جفن.
بتاع كلام وفعل مفيش
الأسوأ بقى من كل ده هو الراجل اللي بيقضيها وعود عمال على بطال من غير ما ينفذ منهم أي حاجة، من الأخر يعنى “كلامنجي”، يضحك عليكي بكلمتين حلوين ويعيشك الوهم وانتي زي الهبلة بتصدقي، فا لو كان “الكراش” من النوع ده لازم تهربي فوراً وتنفدي بجلدك.
بيقول إنه مش بتاع جواز
وأخيراً بقى، لو كنتي كل ما تفتحي معاه موضوع الجواز تلاقيه بيقولك انا مش بتاع جواز ومسئولية والكلام ده، اعرفي إنه بيتسلى بيكي وبيقضيله يومين حلوين مش أكتر، لإن ببساطة جداً اللي بيحب واحدة بيتمنى يعيش معاها حياته كلها وعمره ما هيفكر يخلقلها اعذار عشان يهرب منها.
وفي الحقيقة بقى اللي بيضايق وبيتعب اكتر من كل ده، هو إنك تحسي إنك بتيجي على حساب نفسك وبتضحي بحاجات كتير عشان حد ميستاهلش، عشان كدة احب اقولك حبي نفسك شوية ولو حسيتي إنك بتئذيها بعلاقة متعبة ومش بتحققلك السعادة اللي تستاهليها يبقى بناقص منها، ومهما كنتي بتحبي حد او متعودة عليه وحسيتي إنه بيئذيكي نفسياً ابعدي عنه وصدقيني انتي الكسبانة، الحياة مبتقفش على حد..
