طبعاً كلنا عارفين إن كل البنات عموماً بيحبوا يحسوا باهتمام حبيبهم بيهم طول الوقت سواء عن طريق الغيرة أو الدلع أو غيرها من التفاصيل التانية، وعشان كدة الاهتمام بالنسبالهم بيكون هو الدليل الوحيد على الحب، لكن على قد ما الاهتمام والدلع دول مهمين في أي علاقة، في ناس ممكن يتغاضوا عنهم مقابل حاجات تانية، وفي غيرهم ميقدروش يستغنوا عنهم مهما حصل، وممكن يقرروا انهم ينهوا العلاقة وفوراً لو ملاقوش الاهتمام بالشكل اللي يرضيهم.
انهاردة ومن خلال المقال ده هنقولكوا على الـ5 أبراج اللي البنات فيهم بيعشقوا حاجة اسمها “دلع” واهتمام ومش بيتهاونوا أبدا في أي تقصير في الموضوع ده، ركزوا بقى كدة معايا شوية….

برج العقرب

1

أولاً برج العقرب، وهو برج أصحابه بيكونوا حساسين بزيادة، وده بيخلي أقل كلمة وأصغر موقف يأثر فيهم، وخصوصاً البنات، لو مخادتش بالك من كل تفصيلة في حياتهم واهتميت بيهم وبكل حاجة بيحبوها هتشوف ايام سوده.

برج السرطان

2

البنت السرطان هي كمان شخصية حساسة جداً ورومانسية لابعد الحدود، وحساسيتها دي بتخليها واحدة من أكتر الأبراج اللي بتحتاج للدلع ومش ممكن ابدا تتنازل عن جرعة الحنان بتاعتها، ده غير طبعاً انها بتعشق المفاجأت والورد والهدايا والحاجات الرومانسية دي، ولو معملتش كدة تبقى أكيد مبتحبهاش.

برج الحوت

3

زيها زي باقي الأبراج المائية، الأنثى الحوت تعتبر واحدة من الأبراج اللي بتعشق الدلع والكلام الحلو، وده لإنها شخصية عاطفية وحساسة جداً، بتهتم بالتفاصيل وبتحب دايماً تكون محط إهتمام حبيبها ومحور حياته كلها.

برج القوس

4

مواليد برج القوس، وخصوصاً البنات، بيتمتعوا بالجاذبية والجمال اللي بيخليهم محط أنظار كل اللي حواليهم، وده بيخليهم يحبوا يسمعوا كلام حلو، طبعاً ماهو زي ما بيقولوا كدة “من حق الجميل يتدلع”، وعشان كدة لو معجب بحد من البرج ده اياك متاخدش بالك من النقطة دي لانهم مبيتنازلوش عنها.

برج الجدي

5

على عكس ما بيبان عليهم إنهم عمليين جداً ومالهومش في الحب والرومانسية والكلام ده، إلا إنهم من أكتر الأبراج اللي بتحب الاهتمام والدلع حتى لو مبينوش، وده لإنهم بيستنوا الحاجة تجيلهم من غير ما يطلبوها أو حتى يحسسوا اللي قدامهم إنهم محتاجينها، وإنت عليك بقى إنك تفهم لوحدك عشان تقدر تكسب قلبهم.